1 Samuel 31:1-13
-
Saul ras telu anakna si dilaki mate (1-13)
31 Erperang kalak Pilisti ngelawan kalak Israel.+ Dungna kiam kalak Israel nelamatken diri arah kalak Pilisti, enterem kalak si mate ibunuh i Gunung Gilboa.+
2 Lalap ayaki kalak Pilisti Saul bage pe anak-anakna. Bunuh kalak e anak-anak Saul,+ eme Jonatan,+ Abinadap, ras Malkisua.
3 Emaka reh beratna akap Saul peperangen e. Sanga pemanah ngidah Saul, panah kalak e ia, parah kel lukana.+
4 Nina Saul man si maba senjatana, “Buat pedangndu, tebak aku, gelah ula aku itebak ras isiksa kalak si la isunat ah.”+ Tapi la nggit si maba senjata Saul e, sebap mbiar kel ia. Emaka buat Saul pedang e, tebakna bana.*+
5 Sanga idah si maba senjatana maka Saul enggo mate,+ tebakna ka bana alu pedangna,* ia pe mate ras Saul.
6 Emaka bas wari e, mate Saul ras telu anakna si dilaki, si maba senjatana, bage pe kerina prajuritna.+
7 Sanga kalak Israel si lit i daerah lembah bage pe si lit i daerah Lau Jordan ngidah pasuken Israel enggo kiam, Saul ras anak-anakna pe enggo mate, kiam kalak e nadingken kota-kotana.+ Emaka reh kalak Pilisti janah tading i je.
8 Paginna, sanga reh kalak Pilisti guna njarah barang-barang kalak si enggo mate e, dat kalak e mayat Saul ras teluna anakna si dilaki i Gunung Gilboa.+
9 Emaka potong kalak e kerahung Saul janah buatna senjatana. Jenari suruh kalak e kalak si maba berita lawes ku kerina daerah kalak Pilisti, guna mpeseh berita e+ man kerina rakyat bage pe bas kerina ingan kalak e nembah berhala.+
10 Kenca si e, tama kalak e senjata Saul bas ingan nembah patung Astarte janah pakuken kalak e mayatna i tembok Bet-San.+
11 Kenca begi kalak Jabes si lit i Gileat+ kai si ilakoken kalak Pilisti man mayat Saul,
12 lawes kerina pejuang kalak e, sada berngi kalak e erdalan ku Bet-San, jenari buatna mayat Saul ras anak-anakna si dilaki si ipakuken i Bet-San. Kenca si e, mulihken kalak e ku Jabes, tutungna mayat kalak e i je.
13 Jenari buat kalak e tulan-tulan kalak ndai+ janah kuburkenna i teruh batang kayu tamariska i Jabes,+ puasa kalak e pitu wari dekahna.
