1 Samuel 4:1-22
4 Lalap peseh Samuel kata arah Dibata nari man kerina kalak Israel.
Bas pudi wari, erperang kalak Israel ngelawan kalak Pilisti. Kalak Israel erkemah i deher Ebeneser, kalak Pilisti erkemah i Apek.
2 Ban kalak Pilisti barisen prajurit guna ngelawan kalak Israel. Nandangi talu kalak Israel, dungna tuhu-tuhu talu kalak e iban kalak Pilisti. Lit kira-kira 4.000 kalak Israel si ibunuh bas peperangen e.
3 Sanga prajurit Israel mulih ku kemah, nina peminpin-peminpin kalak Israel, “Engkai maka pediat Jahwe kita taluken kalak Pilisti bas wari enda?+ Ota sibuat Peti Perjanjin* Jahwe i Silo,+ gelah Peti e lit ras kita janah pasti selamatkenna kita arah musuh-musuhta.”
4 Emaka suruh kalak e kalak si deban ku Silo muat Peti Perjanjin Jahwe penguasa malekat, si tahtaNa lit i datas* kerubim-kerubim.+ Duana anak Eli eme Hopni ras Pinehas+ pe ikut lawes ras Peti Perjanjin Dibata si benar e.
5 Seh kenca Peti Perjanjin Jahwe i kemah, kerina kalak Israel ersurak alu sora megang, seh maka doni pe mugur-ugur.
6 Sanga begi kalak Pilisti sora ersurak e, nina kalak e, “Engkai maka megang kel kalak Heber ah ersurak-surak bas kemahna?” Dungna teh kalak e maka Peti Perjanjin Jahwe enggo lit bas kemah kalak Israel.
7 Mbiar dungna kalak Pilisti e, nina, “Enggo reh Dibata ku kemah kalak e!”+ Emaka nina kalak e, “Cilaka kel kita, sebap lenga pernah terjadi si bage!
8 Cilaka kel kita! Ise pagi si nelamatken kita arah tan Dibata si hebat e? Dibata e kap si nyerang Mesir alu erbage-bage bencana bas taneh mesawang.*+
9 Perpanglah kena bagi dilaki o kalak Pilisti, gelah ula kena ngelayani kalak Heber bagi kalak e enggo ngelayani kena.+ Erperanglah kena bagi dilaki!”
10 Emaka erperang kalak Pilisti e janah talukenna kalak Israel,+ dungna kiamen kerina kalak Israel ku kemahna. Seh kel teremna kalak si ibunuh. Arah prajurit Israel si erdalan, lit 30.000 kalak si mate.
11 Selain si e, Peti Perjanjin Dibata irampas, duana anak Eli eme Hopni ras Pinehas pe mate.+
12 Lit sekalak dilaki arah suku Benyamin nari si kiam arah peperangen e, janah seh ia i Silo bas wari e. Uisna enggo irigatken janah lit abu i takalna.+
13 Sanga seh dilaki e, Eli sangana kundul bas kursi i tepi dalan janah nimai, sebap kuatir ia man Peti Perjanjin Dibata si benar.+ Lawes dilaki ndai ku kota mpeseh berita, nderkuhen kerina kalak si lit bas kota e.
14 Sanga begi Eli sora nderkuh e, nungkun ia, “Engkai maka gejek kel e?” Reh dilaki e ndahi Eli, ceritakenna kai si terjadi.
15 Sanga si e, umur Eli 98 tahun janah ia lanai banci ngidah.+
16 Kenca si e, nina dilaki e man Eli, “Aku reh arah peperangen e nari! Kiam aku arah peperangen e.” Sungkun Eli ia, “Kai kin si terjadi, Nakku?”
17 Nina si mpeseh berita e, “Enggo kiamen kerina kalak Israel arah kalak Pilisti nari, sebap kalak e enggo talu, enterem kel si mate.+ Duana anakndu pe, Hopni ras Pinehas enggo mate.+ Peti Perjanjin Dibata si benar pe enggo irampas kalak Pilisti.”+
18 Kenca belasken dilaki e kerna Peti Perjanjin Dibata si benar, minter mbulak Eli arah ingan kundulna nari i deher gerbang. Penggel kerahungna janah mate ia, sebap enggo metua kel ia janah mbur dagingna. Lit 40 tahun dekahna ia jadi hakim bas Israel.
19 Permen Eli eme diberu Pinehas, sangana hamil janah nandangi melahirken. Sanga begina berita kerna Peti Perjanjin Dibata si benar enggo irampas, bage pe kerna bengkilana ras dilakina enggo mate, minter mesui kapna jenari melahirken ia.
20 Sanga ia hampir mate, diberu-diberu si tedis i deherna ngataken, “Tenanglah kam, enggo lahirkenndu sekalak anak dilaki.” Tapi la aloina janah la diatena.
21 Banna gelar anakna e Ikabot,*+ sebap nina, “Kemulian Dibata enggo nadingken Israel.”+ Katakenna bage perban Peti Perjanjin Dibata si benar enggo irampas, bengkilana ras dilakina pe enggo mate.+
22 Nina, “Kemulian Dibata enggo nadingken Israel, perban Peti Perjanjin Dibata si benar enggo irampas.”+
Cataten i teruh
^ Ntah “Peti Perpadanen.”
^ Ntah banci saja “i antara.”
^ Taneh si mbelang si jarang iingani.
^ Ertina “I Ja kin Kemulian e?”
