1 Samuel 5:1-12
5 Sanga rampas kalak Pilisti Peti Perjanjin* Dibata si benar,+ baba kalak e Peti e arah Ebeneser nari ku Asdot.
2 Baba kalak Pilisti Peti Perjanjin Dibata si benar e ku ingan Dagon, eme dibata kalak Pilisti. Tamakenna Peti e i samping patung Dagon.+
3 Paginna, sanga medak kalak Asdot pagi-pagi si lampas, idah kalak e patung Dagon enggo telungkup ku taneh i lebe-lebe Peti Perjanjin Jahwe.+ Emaka buat kalak e patung Dagon ndai, tamakenna mulihi ku inganna.+
4 Paginna ka, sanga medak kalak e erpagi-pagi si lampas, idah kalak e enggo ka telungkup patung Dagon ndai ku taneh, i lebe-lebe Peti Perjanjin Jahwe. Enggo penggel takalna ras duana tanna janah ampar i deher pintu. Badanna si bagi ikan nari ngenca si tading.
5 E me sebapna, seh asa gundari imam-imam Dagon bage pe kerina kalak si masuk ku ingan Dagon, la banci merjak bekas ingan Dagon e ampar si lit i deher pintu i Asdot.
6 Mberat kel hukumen si ban Jahwe man kalak Asdot. KernepkenNa kalak Asdot, bage pe kerina kalak si tading i sekelilingna alu wabah penakit ambeien.+
7 Sanga idah kalak Asdot kai si terjadi, nina kalak e, “Mberat kel hukumen si iban Dibata Israel man banta bage pe man dibatata Dagon, emaka ula nai pediat Peti Perjanjin e tetap ras kita.”
8 Jenari, pindoken kalak e gelah pulung kerina penguasa kalak Pilisti, janah nungkun kalak e, “Uga nge siban Peti Perjanjin Dibata Israel enda?” Nina kalak e, “Pindahkenlah Peti Perjanjin Dibata Israel ku Gat.”+ Emaka ipindahken kalak e Peti Perjanjin Dibata Israel ku je.
9 Kenca Peti ndai ipindahken ku Gat, hukum Jahwe kota e, janah guntar kel kota e. BanNa kerina kalak si tading bas kota e kena penakit ambeien.+
10 Perban si e, pindahken kalak e Peti Perjanjin Dibata si benar ku Ekron,+ tapi seh kenca Peti e i Ekron, serko kalak Ekron, nina, “Baba kalak e Peti Perjanjin Dibata Israel ku jenda guna munuh kita bage pe bangsata!”+
11 Pindoken kalak e gelah kerina penguasa kalak Pilisti pulung, janah nina kalak e, “Babalah lawes Peti Perjanjin Dibata Israel e, ulihkenlah ku inganna gelah kita bage pe bangsata la mate.” Bage kataken kalak e perban kerina kalak si lit bas kota enggo mbiar mate, janah Dibata si benar enggo mereken hukumen si mberat kel man kalak e,+
12 janah si la mate pe kena penakit ambeien. Emaka terbegi seh ku langit sora kalak si lit bas kota e mindo penampat.
Cataten i teruh
^ Ntah “Peti Perpadanen.”