1 Samuel 6:1-21
-
Iulihken kalak Pilisti Peti Perjanjin ku Israel (1-21)
6 Lit pitu bulan dekahna Peti Perjanjin*+ Jahwe bas daerah kalak Pilisti.
2 Lebuh kalak Pilisti me imam-imam ras peramal,+ janah nungkun kalak e, “Uga siban Peti Perjanjin Jahwe enda? Kataken man kami uga carana ngulihkenca ku inganna.”
3 Nina kalak e, “Adi ulihken kena ate kena Peti Perjanjin Jahwe Dibata Israel, arus ka bereken kena persembahen. Sanga ulihken kena, bereken ka lah persembahen kesalahen.+ Alu bage banci kena ipepalem, janah teh kena kari engkai maka lalap hukumNa kena.”
4 Sungkun kalak Pilisti, “Persembahen kesalahen kai si arus bereken kami?” Nina kalak e, “Berekenlah seri buena ras jumlah penguasa kalak Pilisti,+ eme lima emas si bentukna bagi ambeien, bage pe lima emas si bentukna bagi menci, sebap seri kap wabah penakit si engkenai kena kerina ras si engkenai penguasa kena.
5 Arus ban kena patung si bentukna bagi ambeien, bage pe patung si bentukna bagi menci+ si ncedai juma kena. Arus ka hamati kena Dibata Israel. Mbera-mbera pengadiNa hukumen man kena, dibata kena, ras juma kena.+
6 Man kade kena kin mekeng* bagi kalak Mesir ras raja Mesir?+ La kin mberat kel hukumen Dibata man kalak e+ janah dungna arus kang pediat kalak e kalak Israel lawes?+
7 Gundari, sikapkenlah gereta lembu si mbaru ras dua indung lembu si la pernah narik gereta. Tamakenlah gereta e ku lembu e, tapi anak-anakna masukken ku bas kandang janah ndauh arah indungna nari.
8 Tamakenlah Peti Perjanjin Jahwe bas gereta e. I sebelahna, tamaken ka kotak si risiken patung-patung emas si ate kena ibereken jadi persembahen kesalahen.+ Jenari, pediatlah lembu-lembu e erdalan.
9 Kenca si e, perdiatekenlah ku ja perlawesna. Adi lawes ia ku daerahna eme Bet-Semes,+ e ertina Dibata kalak Israel si erban bencana e man kita. Tapi adi lang, siteh maka labo tanNa si ngukum kita, janah si e rembang terjadi man banta.”
10 Bage si lakoken kalak Pilisti. Buat kalak e dua indung lembu janah tamakenna gereta ku lembu-lembu e, tapi anak-anakna karangkenna ku bas kandangna.
11 Jenari, tamaken kalak e Peti Perjanjin Jahwe ku bas gereta e, bage pe kotak si isina emas si bentukna bagi menci, ras patung-patung si bentukna bagi ambeien kalak e.
12 Erdalan lembu-lembu e pinter ku arah Bet-Semes,+ la ku kanan ntah pe ku kiri, janah tetap erdalan bas dalan e. Gedang-gedang dalan terus lembu e ermboh-mboh. Penguasa-penguasa kalak Pilisti terus ngikutken lembu-lembu e seh ku perbatasen Bet-Semes.
13 Sanga si e, kalak Bet-Semes sangana rani gandum i lembah. Sanga idah kalak e Peti Perjanjin, meriah kel ukur kalak e.
14 Seh gereta e i juma Josua kalak Bet-Semes. Ngadi gereta e i deher batu si galang. Jenari, potong-potong kalak e kayu gereta e, janah persembahken kalak e lembu-lembu e+ jadi persembahen tutungen man Jahwe.
15 Penusur kalak Lewi+ Peti Perjanjin Jahwe bage pe kotak si isina patung-patung emas si lit i sebelahna, jenari tamakenna ku datas batu si galang ndai. Bas wari e, persembahken kalak Bet-Semes+ korban tutungen ras korban-korban si deban man Jahwe.
16 Sanga limana penguasa Pilisti ngidah kai si terjadi, mulih kalak e ku Ekron bas wari e ka.
17 Enda emas si ikirim kalak Pilisti si bentukna bagi ambeien, guna jadi persembahen kesalahen man Jahwe:+ Sada guna Asdot,+ sada guna Gasa, sada guna Askelon, sada guna Gat,+ janah sada nari guna Ekron.+
18 Buena emas si bentukna bagi menci seri ras jumlah kota-kota si ikuasai limana penguasa kalak Pilisti, termasuk kota si ertembok bage pe kuta si la erbenteng.
Batu galang si lit bas juma Josua kalak Bet-Semes, si i je Peti Perjanjin Jahwe itamaken, jadi saksi seh asa gundari.
19 Tapi bunuh Dibata me kalak Bet-Semes, sebap enggo nen kalak e Peti Perjanjin Jahwe. Lit 50.070 kalak* si ibunuhNa, janah ceda kel ate kalak e sebap enterem kel si bunuh Jahwe.+
20 Emaka nungkun kalak Bet-Semes, “Ise kin si ngasup tedis i lebe-lebe Jahwe, Dibata si badia enda?+ Padin tadingkenNa saja kita, janah lawes Ia ku kalak si deban.”+
21 Emaka suruh kalak e kalak si maba berita lawes ku penduduk Kiryat Jearim,+ janah mberitaken, “Enggo ulihken kalak Pilisti Peti Perjanjin Jahwe. Rehlah kena ngelegisa.”+
Cataten i teruh
^ Ntah “Peti Perpadanen.”
^ As. “Man kade kena kin erban piher ukur kena.”
^ As. “70 kalak, 50.000 kalak.”
