1 Samuel 7:1-17
7 Emaka reh kalak Kiryat Jearim, baba kalak e Peti Perjanjin* Jahwe ku rumah Abinadap+ si lit i datas bukit. Pilih* kalak e anak Abinadap, eme Eleasar guna njagai Peti Perjanjin Jahwe.
2 Enggo ndekah Peti Perjanjin e tading i Kiryat Jearim, lit 20 tahun dekahna. Kenca si e, kerina kalak Israel mulai ndarami* Jahwe.+
3 Jenari kataken Samuel man kerina kalak Israel, “Adi ate kena mulihken ku Jahwe alu bulat ukur,+ ambekkenlah dibata-dibata si deban+ ras patung-patung Astarte+ arah tengah-tengah kena nari. Berekenlah pusuh kena alu bulat ukur man Jahwe, janah Ia sajalah si layani kena.+ Alu bage, selamatkenNa kena arah tan kalak Pilisti nari.”+
4 Emaka, ambekken kalak Israel kerina patung Baal ras patung Astarte, janah Jahwe saja ngenca layani kalak e.+
5 Kenca si e, nina Samuel, “Pepulunglah kerina kalak Israel i Mispa,+ gelah ertoto aku man Jahwe guna kepentingen kena.”+
6 Emaka pulung kalak e i Mispa. Buat kalak e lau, jenari amburken kalak e i lebe-lebe Jahwe, janah erpuasa kalak e bas wari e.+ I je kataken kalak e, “Enggo erdosa kami man Jahwe.”+ Sanga si e mulai Samuel jadi hakim+ man kalak Israel i Mispa.
7 Kenca begi kalak Pilisti maka kalak Israel enggo pulung i Mispa, berkat penguasa-penguasa kalak Pilisti+ nyerang kalak Israel. Megi si e, mbiar kalak Israel man kalak Pilisti.
8 Emaka nina kalak Israel man Samuel, “Ula kam ngadi ngelebuh Jahwe Dibatata, gelah sampatiNa kita+ janah selamatkenNa kita arah tan kalak Pilisti.”
9 Buat Samuel sada anak biri-biri janah tutungna kibul-kibul jadi persembahen+ man Jahwe. Kenca si e, erlebuh Samuel man Jahwe mindo penampatNa guna kepentingen kalak Israel. Jawap Jahwe ia.+
10 Sanga persembahken Samuel korban tutungen e, serang kalak Pilisti kalak Israel. Emaka ban Jahwe lenggur si seh kel gangna+ guna ngelawan kalak Pilisti, janah kacaukenNa kalak e,+ alu bage talu kalak Pilisti ban kalak Israel.+
11 Ndarat kalak Israel i Mispa nari, jenari ayakina janah bunuhina kalak Pilisti seh ku arah selatan Bet-Kar.
12 Kenca si e, buat Samuel sada batu,+ tamakenna i antara Mispa ras Jesana. Gelarina batu e Ebeneser,* janah nina, “Sampati Jahwe kita seh asa gundari.”+
13 Bage me kalak Pilisti italuken, janah lanai kalak e reh ku daerah Israel.+ Lalap lawan Jahwe kalak Pilisti sedekah Samuel nggeluh.+
14 Bage ka pe, kota-kota Israel si enggo kuasai kalak Pilisti iulihken man kalak Israel, mulai Ekron nari seh ku Gat, janah dat Israel mulihi daerahna arah tan kalak Pilisti.
Kalak Israel ras kalak Amori pe enggo erdame.+
15 Samuel terus jadi hakim man kalak Israel segedang geluhna.+
16 Tiap tahun, dahina daerah Betel,+ Gilgal,+ bage pe Mispa.+ Ia jadi hakim man kalak Israel si lit i daerah e.
17 Tapi biasana mulih ka ia ku Rama,+ sebap i je rumahna janah jadi hakim ia i je man kalak Israel. Banna ka i je ingan nutung* persembahen man Jahwe.+
Cataten i teruh
^ As. “Pebadia.”
^ Ntah “Peti Perpadanen.”
^ Ntah “mulai nderkuh man.”
^ Ertina “Batu Penampat.”
