1 Samuel 8:1-22
8 Sanga Samuel enggo metua, pilihna anak-anakna jadi hakim man Israel.
2 Gelar anakna sintua eme Joel, janah si peduaken Abia.+ Duana kalak e jadi hakim i Barseba.
3 Tapi anak-anakna la ngikutken usihen bapakna. Alu cara si la jujur,+ keuntungenna saja ngenca daramina,+ alokenna sogok, janah hakimina kalak alu la adil.+
4 Dungna pulung kerina peminpin Israel janah dahi kalak e Samuel i Rama.
5 Nina kalak e man bana, “Kam enggo metua, tapi anak-anakndu la ngikutken dalan-dalanndu. Emaka angkatlah sekalak raja si jadi hakim man kami, bagi bangsa-bangsa si deban.”+
6 Tapi la senang Samuel sanga kataken kalak e, “Angkatlah sekalak raja jadi hakim man kami.” Emaka ertoto Samuel man Jahwe.
7 Jenari aloi Jahwe me Samuel, nina, “Begikenlah kerina si kataken kalak e. Labo kam si tulakna, Aku nge si tulak kalak e selaku rajana.+
8 Kai si lakoken kalak e seri ras si enggo lakokenna mbarenda. Mulai sanga Kubaba kalak e ndarat Mesir nari seh ngasa gundari, rusur tadingken kalak e Aku+ janah layanina dibata-dibata si deban.+ Bage ka nge si lakokenna gundari man bandu.
9 Gundari, begikenlah kalak e. Tapi persingetilah kalak e alu jelas. Kataken man kalak e maka raja si merentah kalak e pagi lit hakna man kalak e.”
10 Emaka peseh Samuel kerina si kataken Jahwe man kalak si sangana mindo sekalak raja.
11 Nina, “Enda hak raja si merentah kena:+ Buatna pagi anak kena si dilaki+ janah tamana bas gereta perangna.+ Jadikenna ka kalak e jadi prajurit si erkuda,+ janah lit piga-piga si isuruhna kiam i lebe-lebe gereta-gereta perangna e.
12 Pilihna ka pagi peminpin-peminpin si minpin seribu kalak,+ bage pe si minpin lima puluh kalak.+ Lit ka si mbajak jumana,+ si mperanisa,+ bage pe si erban senjata perang ras si erban perlengkapen man geretana.+
13 Buatna ka anak kena si diberu janah suruhna kalak e erban minak wangi, erdakan, ras erban roti.+
14 Buatna pagi kerina si mehulina si lit bas kena, eme juma kena, kebun anggur kena, bage pe kebun saitun kena.+ Jenari berekenna man pelayan-pelayanna.
15 Buatna ka pagi sepersepuluh arah hasil juma gandum kena bage pe hasil kebun anggur kena. Jenari berekenna man pegawai-pegawaina ras pelayan-pelayanna.
16 Buatna ka pelayan-pelayan kena si dilaki ras si diberu, asuh-asuhen kena si mejilena, bage pe kelede kena. Si e kerina pakena guna ngelakoken dahinna.+
17 Buatna ka sepersepuluh arah rarasen biri-biri kena,+ janah banna kena jadi budakna.
18 Sanga si e pagi, nderkuh kel kena perban raja si pilih kena e,+ tapi la begiken Jahwe kena.”
19 Tapi la begiken kalak e kai nina Samuel, janah nina kalak e, “Labo dalih! Pokokna arus lit raja si merentah kami.
20 Alu bage seri kami ras kerina bangsa si deban. Raja kami pagi si ngakimi kami, si minpin kami, janah erperang guna kami.”
21 Kenca begi Samuel kerina si kataken kalak e, pesehna kerina man Jahwe.
22 Nina Jahwe man Samuel, “Begikenlah kalak e, angkatlah sekalak raja guna merentah kalak e.”+ Jenari kataken Samuel man kalak Israel, “Mulihlah kena kerina ku kota kena.”
