1 Samuel 9:1-27
-
Samuel jumpa ras Saul (1-27)
9 Lit sekalak dilaki si seh kel bayakna arah suku Benyamin nari,+ gelarna Kis.+ Ia anak Abiel, Abiel e anak Seror, Seror e anak Bekorat, Bekorat e anak Apia.
2 Lit sekalak anak Kis gelarna Saul.+ Ia nguda denga janah ganteng. La lit kalak Israel si gantengen asangken ia janah la lit si gedangen asangken ia.*
3 Sanga bene kelede-kelede Kis, katakenna man Saul anakna, “Ajaklah sekalak suruh-suruhen, jenari daramilah kelede-kelede e.”
4 Lewati kalak e daerah pegunungen i Eperaim bage pe daerah Salisa, tapi la datna kelede e. Lewati kalak e ka daerah Salim, tapi la dat kalak e kelede ndai. Lewati kalak e kerina daerah kalak Benyamin, tapi i je pe la dat kalak e.
5 Kenca seh kalak e i daerah Sup, nina Saul man suruh-suruhenna, “Mulih sajalah kita, gelah ula latihen kari akap bapakku ngukuri kita asangken kelede-keledena si bene ndai.”+
6 Nina suruh-suruhen e ngaloi, “Bas kota enda lit sekalak pelayan Dibata si hamati kalak. Kai si katakenna terjadi kerina.+ Ota sidahi ia, banci saja katakenna kari ku ja kita arusna lawes.”
7 Ngaloi Saul, “Adi sidahi ia, kai kari sibere luahta man bana? Lanai lit roti bas tasta. La lit hadiah si man berenken man pelayan Dibata si benar e. Kai nari kin si lit bas kita?”
8 Nina suruh-suruhen e ngaloi Saul, “Lit bas aku sada logam pirak si kitik.* Kubereken kari e man pelayan Dibata si benar e, jenari katakenna kari ku ja kita arus lawes.”
9 Bas Israel mbarenda, kalak si atena ndarami petunjuk Dibata biasana katakenna, “Ota sidahi kalak si lit pengenehenenna.”*+ Sebap mbarenda, sekalak nabi igelari kap kalak si lit pengenehenenna.
10 Nina Saul man suruh-suruhenna, “Cocok kel si katakenndu e, ota kita lawes.” Emaka lawes kalak e ku kota ingan pelayan Dibata si benar e.
11 Sanga kalak e nangkeng ku kota e, jumpa kalak e ras singuda-nguda si muat lau atena. Emaka nungkun kalak e nina, “I jenda kin kalak si lit pengenehenenna+ e?”
12 Ngaloi kalak e, “Ue, i jenda. Ia enggo leben asangken kena. Meterlah kena, sebap sendah ku kota ia, perban sendah kerina kalak nandangi mpersembahken korban+ bas ingan si meganjang.+
13 Seh kenca kena bas kota e, jumpa nge kari kena ras ia sope ia nangkeng ku das ingan si meganjang guna man. Jelma si enterem e lenga kari man adi lenga ia reh, sebap ia kap si masu-masu korban e. Emaka meterlah kena lawes gelah jumpa kena ras ia.”
14 Emaka lawes kalak e ku kota e. Seh kenca kalak e i tengah kota, ndarat Samuel njumpaisa janah nangkeng kalak e ku ingan si meganjang.
15 Sada wari sope Saul reh, enggo kataken Jahwe man Samuel,
16 “Pagi bas jam si bagenda, Kusuruh sekalak dilaki arah Benyamin nari+ njumpai kam. Arus lantikndu ia jadi peminpin bangsaKu Israel,+ ia pagi si nelamatken kalak e arah tan kalak Pilisti. Sebap enggo Kuidah kiniseran bangsaKu janah enggo Kubegi sora kalak e serko.”+
17 Sanga Samuel ngidah Saul, nina Jahwe man Samuel, “Enda dilaki si Kumaksud sanga Kukataken, ‘Ia pagi si merentah bangsaKu.’”+
18 Kenca si e, jumpai Saul me Samuel si lit i deher gerbang janah nina Saul, “Kataken min man bangku i ja rumah kalak si lit pengenehenenna e.”
19 Nina Samuel, “Aku kap kalak si lit pengenehenenna e. Lebenlah kam ku ingan si meganjang janah bas wari enda ras kita man.+ Pagi erpagi-pagi, kutaruhken kam mulih janah kujawap kerina penungkunenndu.
20 Lanai padah ukurindu kelede-kelede si bene telu wari si lewat,+ sebap kerinana enggo dat. Ise kin si mpuna kerina si merga bas Israel? La kin kam nge ras kerina keluarga bapakndu?”+
21 Nina Saul, “Aku arah suku Benyamin nari, suku si kitikna bas Israel,+ janah keluargaku kap si la pentingna arah kerina keluarga si lit bas suku e. Engkai maka bage nindu man bangku?”
22 Kenca si e, ajak Samuel me Saul ras suruh-suruhenna ku ruangen ingan man, janah suruhna kalak e kundul bas ingan si pentingna arah kerina tamu e. Kalak si lit i je kira-kira 30 kalak buena.
23 Kataken Samuel man si erdakan, nina, “Baba ku jenda daging si kubereken man bandu, si kusuruh gelah serapkenndu.”
24 Emaka baba si erdakan ndai daging bagin pahana, jenari hidangkenna ku lebe-lebe Saul. Nina Samuel, “Daging enda enggo iserapken man bandu. Panlah, sebap e enggo isimpan kalak e gelah panndu bas kesempaten enda, perban enggo kukataken man kalak e, ‘Lit tamu si kuundang.’” Emaka man Saul ras Samuel bas wari e.
25 Kenca si e, nusur kalak e arah ingan si meganjang ndai,+ jenari lawes ku kota. Samuel terus ngerana ras Saul i atap* rumah.
26 Paginna, lampas kalak e medak. Sanga enggo nandangi terang, lebuh Samuel me Saul si lit i atap rumah, nina, “Ersikaplah kam, gelah kutaruhken kam mulih.” Emaka ersikap Saul jenari lawes ia ras Samuel ndarat.
27 Sanga kalak e nusur janah seh i tepi kota, nina Samuel man Saul, “Kataken man suruh-suruhenndu+ gelah leben ia lawes, tapi kam, tetaplah kam i jenda gelah kukataken man bandu kai nina Dibata.” Emaka leben suruh-suruhenna e lawes.
Cataten i teruh
^ As. “janah kerina kalak ngayak barana ngenca gedangna.”
^ Bas bahasa Heber, kata enda ngertiken kengasupen sekalak jelma si bereken Dibata guna meteh sura-suraNa.
^ Buen rumah si i je rata atapna janah melala si banci ilakoken i je.
