1 Tesalonika 1:1-10
1 Surat enda arah Paulus nari, Silvanus,*+ bage pe Timotius.+ Surat enda man runggun i Tesalonika si ersada ras Dibata eme Bapakta bage pe ras Tuan Jesus Kristus:
Mbera-mbera kiniulin si luar biasa ras kedamen lit bas kena.
2 Lalap kataken kami bujur man Dibata sanga totoken kami kena kerina,+
3 perban i lebe-lebe Dibata, Bapakta, lalap inget kami uga kerja keras kena perban kiniteken ras kekelengen kena, janah uga kesetian kena perban arapen+ man Tuanta Jesus Kristus.
4 O turang senina si kelengi Dibata, teh kami maka kena enggo pilih Dibata,
5 perban berita si meriah si peseh kami man kena labo saja alu kata-kata, tapi pe alu kuasa, kesah si badia, bage pe kiniteken si paguh. Sanga kami lit i tengah-tengah kena, teh kena nge kai si lakoken kami guna kepentingen kena.
6 Enggo usih kena kami+ ras Tuan,+ aloken kena kata Dibata alu keriahen ukur si rehna arah kesah si badia nari, amin pe nanami kena melala kiniseran.+
7 Alu bage kena jadi usihen man kerina pengikut Tuan si lit i Makedoni ras Akaya.
8 Gundari, labo saja kalak si lit i Makedoni ras Akaya ngenca si megi kata Jahwe* perban kena, kiniteken kena man Dibata pe enggo terbegi ku japa pe,+ emaka lanai lit si perlu man katanken kami.
9 Rusur cakapken kalak e kerna uga tangtangna kita jumpa, janah uga kena nadingken berhala-berhala kena+ guna jadi budak Dibata si nggeluh ras benar,
10 bage pe kerna uga kena nimai kerehen AnakNa arah surga nari,+ eme Jesus si ipegeluh arah si mate nari guna nelamatken kita arah rawa Dibata si nandangi reh.+
