1 Tesalonika 3:1-13
3 Perban lanai tertahanken kami tedeh kami, padin akap kami tading i Aten.+
2 Suruh kami turang seninata Timotius,+ ia pelayan* Dibata, si mberitaken berita si meriah kerna Kristus guna mpegegehi kiniteken kena ras ngapuli kena,
3 gelah ula sada pe kena jadi lemah* perban kiniseran-kiniseran enda. Sebap teh kena maka la banci sielakken kiniseran si bage.*+
4 Sanga kami ras kena denga, enggo rusur kataken kami maka sinanami pagi kiniseran, janah bagi si enggo teh kena, e me si terjadi.+
5 Emaka sanga lanai tertahanku tedehku e, kusuruh Timotius ndahi kena gelah kuteh uga kesetian kena.+ Perban mbiar aku kena enggo tergoda ban Iblis,*+ janah kerja keras kami jadi sia-sia.
6 Tapi gundari, Timotius enggo mulih+ janah babana berita si meriah kerna kesetian ras kekelengen kena. Katakenna ka maka lalap inget kena kai si mehuli kerna kami janah tedeh ka ate kena kami, bagi kami pe tedeh ate kami kena.
7 E me sebapna o turang senina, bas kerina kesusahen ras kiniseran kami, terapuli kami perban kena bage pe perban kesetian si buktiken kena.+
8 Adi tetap kena paguh bas ngelayani Tuan, kami pe terpegegehi mulihi.
9 Bujur kataken kami man Dibata, perban enggo ban kena meriah kel ukur kami i lebe-lebeNa.
10 Tutus kel ate kami ertoto man Dibata suari ras berngi gelah banci langsung jumpa ras kena, janah gelah kai pe si kurang bas kiniteken kena banci itambahken.+
11 Mbera-mbera Dibata eme Bapakta bage pe Tuanta Jesus erban dalan man kami gelah jumpa ras kena.
12 Selain si e, mbera kekelengen kena reh bagesna iban Tuan man sada ras si debanna+ bage pe man kerina kalak, bagi kekelengen kami man kena.
13 Alu bage sanga reh Tuanta Jesus+ ras kerina umatna si badia, pegegehina pusuh kena, banna kena la cacat, janah badia i lebe-lebe Dibata+ eme Bapakta.
Cataten i teruh
^ Ntah banci saja “teman erdahin.”
^ As. “terpengaruh.”
^ Ntah “maka kita enggo ipilih guna si enda.”
^ Ntah “Penggoda.”
