1 Tesalonika 5:1-28
5 O turang senina, la perlu kutulisken man kena ndigan waktu si itetapken e terjadi.
2 Sebap tuhu-tuhu teh kena maka kerehen wari Jahwe* e+ bagi kerehen pinangko bas berngi wari.+
3 Sanga kataken kalak e, “Dame ras aman!” i je pagi kalak e rempet ikernepken bas waktu si ntisik,+ bagi suina akap diberu si nandangi melahirken. La banci elakken kalak e.
4 Tapi kena turang senina, kena labo bas kegelapen. Emaka sanga reh wari e, labo kena sengget perban kena la bagi pinangko si sengget sanga enggo terang wari.
5 Sebap kerina kena anak-anak terang ras anak-anak suari.+ Kita labo anak-anak berngi bage pe labo anak-anak kegelapen.+
6 Emaka ula kita medem bagi kalak si deban.+ Tapi tetaplah kita medak+ ras erjaga-jaga.+
7 Sebap kalak si medem, medem bas berngi wari. Kalak si mabuk, mabuk bas berngi wari.+
8 Perban kita anak-anak suari, tetaplah kita erjaga-jaga. Banlah kiniteken ras kekelengen bagi baju si ngelindungi dadata. Banlah arapen keselamaten bagi topi si ngelindungi takalta.+
9 Pilih Dibata kita labo gelah ihukum, tapi gelah ngaloken keselamaten+ arah Jesus Kristus Tuanta.
10 La soal kita nggeluh ntah pe mate,* kita nggeluh ras Jesus,+ perban ia enggo mate guna kita.+
11 Emaka, teruslah kena siiah-iahen janah mpegegehi sada ras si debanna,+ bagi si sangana lakoken kena.
12 O turang senina, pindoken kami man kena gelah ergai kena min kalak si kerja keras i tengah-tengah kena, si minpin kena bas ngelayani Tuan bage pe si mpersingeti kena.
13 Buktiken maka tuhu-tuhu kelengi kena ras ergai kena pendahin kalak e.+ Usahakenlah gelah erdame sada ras si debanna.+
14 Selain si e, pindoken kami man kena o turang senina, persingetilah kalak si la tertip,+ apuli kalak si susah,* sampati kalak si lemah, janah sabarlah man kerina kalak.+
15 Pastikenlah gelah ula lit si mbalas kejahaten alu kejahaten man ise pe,+ tapi lakokenlah kai si mehuli man si deban bage pe man kerina kalak.+
16 Tetaplah ermeriah ukur.+
17 Teruslah ertoto.+
18 Katakenlah bujur bas kai pe.+ Enda kap si ngena ate Dibata arah kena nari selaku pengikut Kristus Jesus.
19 Ula halangi pendahin kesah si badia bas kena.*+
20 Ula sepele man nubuat.+
21 Pastikenlah kerinana,+ janah teruslah lakoken kai si mehuli.
22 Ula lakoken kejahaten kai pe.+
23 Mbera-mbera Dibata si mereken kedamen erban kena tuhu-tuhu badia. Mbera-mbera kesah, kegeluhen, bage pe daging kena tetap bersih sanga kerehen Tuanta Jesus Kristus.+
24 Dibata si ngelebuh kena e setia janah pasti lakokenNa bage.
25 O turang senina, teruslah totoken kena kami.+
26 Alo-alolah kerina turang senina alu dem kekelengen.*
27 Kupindoken man kena bas gelar Tuan, gelah surat enda ibacaken man kerina turang senina.+
28 Mbera-mbera kiniulin si luar biasa arah Tuan Jesus Kristus lit ras kena.
Cataten i teruh
^ As. “kita medak ntah pe medem.”
^ Ntah “kitik ukur.”
^ As. “Ula mateken api kesah si badia.”
^ As. “alu ciumen si badia.”
