1 Timotius 6:1-21
6 Kerina budak arus hamatina tuanna alu tutus,+ gelah gelar Dibata bage pe ajarenNa la ihina kalak.+
2 Amin pe tuanna e temanna sada kiniteken, arus tetap hamatina ia janah reh ulina min ia ngelayanisa, perban si ndatken ulih bas pelayanenna eme temanna sada kiniteken si ikelengi.
Teruslah ajarken kerna si enda janah berekenlah nasehat-nasehat enda.
3 Adi lit si ngajarken ajaren si deban janah la ia setuju man petunjuk si benar,*+ si rehna arah Tuan Jesus Kristus nari, ntah pe ajaren si ncidahken cara nembah Dibata,+
4 kalak si bage sombong janah la angkana kai pe.+ Meriah kel kapna sijawapen kerna kata-kata.+ Si enda kerina erban cian ate, rubat, pitnah, curiga,
5 bage pe perubaten si la erngadi-ngadi kerna masalah si kitik. Si e ilakoken kalak si ceda perukurenna+ ras lanai angkaina kebenaren, si akapna nembah Dibata eme cara guna ndatken untung.+
6 Situhuna, lit untung si galang man kalak si nembah Dibata+ ras si puas kapna kerna kai si lit bas ia.
7 Sebap labo lit kai pe sibaba ku doni enda janah labo lit kai pe sibaba ndarat arah doni enda.+
8 Emaka puas min siakap adi lit panganta ras pakenta.*+
9 Tapi kalak si usahakenna jadi bayak kena erbage-bage percuban, kena siding,+ janah gedap bas sura-sura si motu ras si la erguna, si erban kalak jadi susah janah mate.+
10 Merangap nandangi sen eme sumber erbage-bage kejahaten, janah perban lalap ngayaki sen, lit piga-piga kalak si dungna lanai erkiniteken janah susahina bana alu erbage-bage kiniseran.+
11 Tapi selaku umat Dibata, kiamlah kam nadingken si e kerina. Ayakilah kai si benar, tutuslah nembah Dibata, erkiniteken, engkelengi, sabar,* janah lembut.+
12 Erjuanglah alu tutus guna kiniteken. Paguhlah ban arapenndu kerna kegeluhen si rasa lalap, guna si e kap kam ilebuh janah ersaksi alu mehuli i lebe-lebe jelma si enterem bage pe i lebe-lebe enterem saksi.
13 I lebe-lebe Dibata si erban kerina tetap nggeluh, janah i lebe-lebe Kristus Jesus si ersaksi kerna kinitekenna man Pontius Pilatus i lebe-lebe jelma si enterem,+ kusuruh kam
14 gelah patuhindu perentah enda janah tetap bersih ras la pandangi kalak seh asa reh Tuanta Jesus Kristus ncidahken dirina+
15 bas waktu si enggo itetapken, icidahken Penguasa si ermeriah ukur e pagi kemulianna. Ia kap Raja kerina si merentah selaku raja janah Tuan kerina si merentah selaku tuan,+
16 ia ngenca si la banci mate,+ si tading bas terang+ eme ingan si la banci ideheri, janah ise pe la pernah ngidah ia ntah pe la banci ngidah ia.+ Man bana kap kehamaten ras kuasa seh rasa lalap. Amin.
17 Berekenlah petunjuk* man kalak bayak si lit bas jaman* gundari gelah ula ia sombong, janah gelah erpengarapen labo man kebayakenna si banci keri,+ tapi erpengarapen man Dibata si nikapken kerinana guna kesenangenta, janah mbue kel sikapkenNa.+
18 Kataken man kalak e gelah lakoken kalak e kai si mehuli, jadi bayak bas perbahanen si mehuli, nggit mere, janah kai si lit bas ia, nggit ia erbagi ras kalak si deban,+
19 pepulungna erta rohani si njamin masa depanna,+ alu bage banci datna kegeluhen situhu-tuhu.+
20 O Timotius, jagalah kai si enggo ibereken man bandu.+ Ula begiken ranan si la erguna si la sesuai ras kai si badia, ntah pe pendapat si akap kalak “pemeteh” tapi situhuna erlawanen ras kai si benar.+
21 Perban ngikutken pemeteh si bage, lit kalak si dungna lanai erkiniteken.
Mbera-mbera kiniulin Dibata si luar biasa lit ras kam.
Cataten i teruh
^ Ntah “erguna.”
^ Ntah banci saja “inganta tading.”
^ Ntah “megenggeng.”
^ Ntah “perentah.”
