2 Johanes 1:1-13
1 Aku sekalak pertua,* kutulisken surat enda man Diberu* si ipilih ras anak-anakna si seh kel teku kelengna. Labo aku saja si rate keleng man kena, tapi kerina kalak si meteh kebenaren pe engkelengi kena,
2 sebap kebenaren e tetap ras kita janah lit bas kita seh rasa lalap.
3 Sidat pagi kiniulin Dibata si luar biasa, perkuah ateNa, kedamen, kebenaren, ras kekelengen arah Ia nari eme Bapakta, bage pe arah AnakNa nari, Jesus Kristus.
4 Seh kel riahna ukurku perban kuidah piga-piga anakndu erdalan bas kebenaren,+ bagi si perentahken Bapak man banta.
5 Emaka gundari kupindo man bandu o Diberu, gelah kita sikeleng-kelengen. Kai si kutulis enda labo perentah si mbaru, tapi perentah si enggo sialoken tangtangna nari.+
6 Kekelengen e ertina terus ndalanken perentah-perentahNa,+ bagi si enggo begi kena tangtangna nari. PerentahNa eme: Teruslah buktiken kekelengen kena.
7 Sebap enggo enterem penipu reh ku doni enda+ si la ngakui Jesus Kristus enggo reh selaku manusia.+ Kalak e penipu ras musuh Kristus.+
8 Jagalah diri kena, gelah ula bene kai si enggo dahiken kena e, tapi gelah dem pagi upah si aloken kena.+
9 Ise pe si la tetap bas ajaren Kristus janah ajarkenna kai si salah, la ngena ate Dibata.+ Tapi, kalak si tetap bas ajaren Kristus, ngena ate Bapak bage pe Anak.+
10 Adi lit si ndahi kena janah babana ajaren si la sesuai ras ajaren Kristus, ula aloken kena ia bas rumah kena+ janah ula kataken kena mejuah-juah man bana.
11 Sebap ise si ngataken mejuah-juah man kalak si bage, ikut ia bas perbahanenna si jahat e.
12 Melala kel teku si kukataken man kena, tapi la teku arah surat enda kupeseh, ngarap aku banci kena kudahi ras langsung ngerana ras kena, gelah tuhu-tuhu meriah kel ukur kena.
13 Anak-anak seninandu pe, si enggo ipilih, kirim salam man bandu.
