2 Korinti 1:1-24
1 Surat enda bas Paulus nari si jadi rasul Kristus Jesus sesuai ras peraten Dibata, bage pe arah Timotius+ turang seninata. Surat enda man runggun Dibata si lit i Korinti bage pe man kerina kalak si badia si lit i belang-belang Akaya:+
2 Mbera-mbera aloken kena kiniulin si luar biasa ras kedamen arah Dibata, eme Bapakta, bage pe arah Tuan Jesus Kristus.
3 Terpujilah Dibata, Bapak arah Tuanta Jesus Kristus,+ Bapak si perkuah ras lembut,+ bage pe Dibata sumber kerina pengapul.+
4 ApuliNa* kita bas kerina percuban* si adapi kita,+ alu bage banci siapuli kalak si deban+ si ndatken percuban* kai pe alu pengapul si enggo sialoken arah Dibata.+
5 Bali bagi kita ngenanami melala kiniseran perban Kristus,+ melala ka pengapul sialoken arah Kristus.
6 Adi dat percuban* kami, si e guna ngapuli kena ras nelamatken kena. Adi kami iapuli, si e pe jadi pengapul man kena, si nampati kena sabar* ngadapi kiniseran bagi si adapi kami.
7 Pengarapen kami kerna kena nteguh kap, sebap teh kami maka bagi kena ikut ngenanami kiniseran, kena pe ikut ngaloken pengapul.+
8 O turang senina, ate kami gelah teh kena kerna kiniseran si nanami kami i Propinsi Asia.+ La kami ngasup sisada nanggungsa kiniseran si mberat si nindih kami e, seh maka lanai akap kami lit arapen kami nggeluh.+
9 Akap kami enggo idabuhken hukumen mate man kami. Alu bage, la kami erpengarapen man diri kami tapi erpengarapen man Dibata+ si banci mpekeke kalak mate.
10 Enggo selamatkenNa kami arah bahaya kematen janah pasti nge selamatkenNa. Erpengarapen kami man baNa maka pasti nge terus selamatkenNa kami.+
11 Kena pe banci nampati kami alu pertoton kena si bulat ukur,+ sebap toto enterem jelma pasti ijawap Dibata. Alu bage, enterem kalak ngata bujur perban penampat si aloken kami.+
12 Bangga kami perban si enda: Bereken pusuh peraten kami kesaksin maka bas doni enda, terlebih-lebih i tengah-tengah kena, kami nggeluh alu badia ras alu perukuren si bujur si sesuai ras ajaren Dibata. Si enda lakoken kami labo perban kepentaren manusia,+ tapi perban kiniulin Dibata si luar biasa.
13 Kai si tulisken kami man kena eme si banci ibaca* ras angkai kena saja ngenca, ngarap aku gelah tuhu-tuhu* angkai kena kerna si e.
14 Enggo angkai piga-piga kalak arah kena nari maka enggo ban kami kena bangga, bagi ban kena kami pagi bangga bas wari Tuanta Jesus.
15 Perban tek kel aku kerna si e, emaka ersura-sura sange aku leben ndahi kena gelah sekali nari kena ermeriah ukur.*
16 Sebap kudahi ateku kena sange, sanga aku bas perdalanen ku Makedoni, bage pe kenca aku mulih arah Makedoni, kudahi ka teku kena, jenari temani kena kari aku ntisik muat perdalanenku ku Judea.+
17 Sepele kin aku kerna rencana si kuban e? Guna kepentingenku kin rencana e seh maka kukataken “ue” kepeken dungna “lang”?
18 Bagi Dibata banci iteki, kai si kataken kami pe banci iteki. Labo kataken kami “ue” kepeken dungna “lang.”
19 Sebap, Anak Dibata eme Jesus Kristus si kuberitaken radu ras Silvanus* bage pe Timotius,+ labo pernah katakenna “ue,” kepeken dungna “lang.” Tapi adi katakenna “ue,” tetap nge “ue.”
20 La soal uga buena janji Dibata, kerinana enggo jadi “ue” arah ia.+ Emaka arah ia ka maka sikataken “Amin” man Dibata+ gelah simuliaken Dibata.
21 Tapi Dibata kap si mere jaminen maka kena ras kami jang Kristus, janah Dibata kap si milih* kita.+
22 Enggo ka tamaken Dibata meteraiNa man banta+ eme kesah si badia si lit bas pusuhta, e jadi jaminen guna kai si nandangi reh.+
23 Alu kesahku ersumpah aku janah Dibata si jadi saksina maka lenga aku reh ku Korinti perban la ateku erban kena jadi reh sedihna.
24 Kami labo tuan si erkuasa man kiniteken kena,+ tapi kami teman erdahin kena guna keriahen ukur kena. Alu bage tetap paguh pertedis kena perban kiniteken kena.
Cataten i teruh
^ Ntah “kiniseran.”
^ Ntah “kiniseran.”
^ Ntah “PegegehiNa.”
^ Ntah “kiniseran.”
^ Ntah “megenggeng.”
^ Ntah banci saja “si enggo tuhu-tuhu teh kena.”
^ As. “gelah seh ku kedungenna.”
^ Ntah banci saja “gelah dat kena manpaat si pedua kaliken.”
^ Igelari ka Silas.
^ As. “ngelantik.”
