2 Korinti 10:1-18
10 Aku Paulus, mindo man kena alu lembut ras mehuli bagi Kristus.+ Lit si akapna aku lemah adi jumpa langsung ras kena,+ tapi perpang adi la langsung jumpa.+
2 Ngarap aku gelah adi reh pagi aku, la perlu aku merawa man piga-piga kalak si erpengakap maka kami nggeluh menurut perukuren doni.
3 Amin pe kami nggeluh bas doni enda, la kami erperang menurut perukuren doni,
4 sebap senjata perang kami labo bas doni enda nari,+ tapi bas kuasa Dibata si megegeh,+ si ngasup engkernepken kai pe si ibentengi alu paguh.
5 Runtuhken kami cara rukur si salah bage pe kerina si erlawanen ras pemeteh kerna Dibata.+ Taban kami tiap perukuren gelah tiap perukuren jadi patuh man Kristus.
6 Kenca cidahken kena maka kena enggo tuhu-tuhu patuh, kami pe enggo ersikap guna ngukum ise pe si la patuh.+
7 Kena ngenen menurut kai si teridah. Adi lit kalak si akapna ia pengikut Kristus, arus ingetna maka kami pe pengikut Kristus, bagi ia.
8 Bere Tuan kami kuasa guna mpegegehi kena, labo erban kena lemah.+ Adi banggasa pe aku kerna si e, labo aku mela.
9 Labo ateku gelah akap kena kupebiar-biar kena alu surat-suratku.
10 Sebap lit si ngataken, “Surat-suratna tegas ras keras, tapi adi ia ras kita, ia lemah janah kata-katana labo lit ertina.”
11 Kalak si ngataken bage perlu tehna maka kai si kataken kami bas surat-surat e, pasti pagi lakoken kami sanga kami ras kena.+
12 Labo kami pang mpeseri diri kami ntah pe mbandingken diri kami ras kalak si mujiken bana.+ Kalak si bage la lit pengangkanna sebap nenna e menurut perukurenna janah bandingkenna bana ras dirina.+
13 Si banggaken kami labo si lit i darat daerah pendahin kami, tapi si banggaken kami eme daerah si enggo tentuken Dibata man kami, kena pe ikut bas si e.+
14 Sanga reh kami ndahi kena, situhuna kai pe la lakoken kami i darat daerah pendahin kami, sebap kami si pertama mberitaken berita si meriah kerna Kristus man kena.+
15 Labo banggaken kami kerja keras kalak si deban si lit i darat daerah pendahin kami, tapi ngarap kami gelah kiniteken kena terus reh tambahna, alu bage hasil kerja keras kami pe reh tambahna i daerah pendahin kami. Daerah si dahiken kami pe reh belangna,
16 emaka banci beritaken kami berita si meriah ku negri-negri si terdauhen arah ingan kena nari. Jadi, la kami bangga perban hasil pendahin kalak si deban bas daerahna.
17 “Ise pe si bangga, banggalah ia perban Jahwe.”*+
18 Kalak si ngena ate Jahwe,*+ labo kalak si mujiken bana tapi kalak si pujiken Dibata.+
