2 Korinti 11:1-33
11 Ngarap aku gelah sabar min kena bangku, amin pe aku kurang masuk akal. Tapi kena memang sabar man bangku!
2 Ermediate kel aku man kena bagi Dibata ermediate man kena, sebap enggo kujadiken kena tunangen Kristus janah kupersembahken ateku kena man bana selaku singuda-nguda si badia.+
3 Tapi mbiar aku adi perukuren kena icedai, bagi Hawa si itipu nipe alu licik,+ banci kena lanai setia ntah lanai badia i lebe-lebe Kristus bagi si arusna.+
4 Aloken kena berita kerna Jesus si deban si la seri ras si beritaken kami. Aloken kena kesah si deban si la seri ras kesah si sedekah enda negu-negu perukuren kena. Aloken kena ka berita si meriah si la seri+ ras si enggo aloken kena.
5 Kuakap labo sitik pe aku ketadingen asangken rasul-rasul kena si seh kel hebatna e.+
6 Bicara la pe aku beluh ngerana,+ tapi lit pemetehku. Si enda enggo cidahken kami alu jelas man kena bas kerinana.
7 Kuberitaken berita si meriah kerna Dibata man kena janah la iupahi.+ Erdosa kin aku adi meriah ukurku ngelakoken si e? Erdosa kin aku adi kupeteruk diriku gelah kena ipeganjang?
8 Kualoken penampat bas runggun-runggun si deban nari, si e erban tempa-tempa kurampas kalak e gelah banci kulayani kena.+
9 Sanga aku ras kena janah lit si kuperluken, labo kususahi ise pe, sebap turang senina si reh arah Makedoni nari enggo mereken kerina keperlunku.+ Kuusahaken kel gelah la kususahi kena bas kai pe, janah lalap nge aku bage.+
10 Sedekah aku jadi pengikut Kristus denga, labo aku erngadi-ngadi bangga+ kerna si e i daerah Akaya.
11 Engkai maka bage kuban? La kin perban keleng ateku kena? Teh Dibata kap maka keleng ateku kena.
12 Lit piga-piga kalak si mujiken bana, katakenna dirina rasul-rasul bagi kami. Emaka terus kulakoken kai si sedekah enda enggo kulakoken,+ gelah la lit alasen kalak e mujiken bana.
13 Kalak si bage eme rasul-rasul si palsu, si nggit nipu, si banna dirina tempa-tempa rasul Kristus.+
14 Labo teku mamang kerna si e, sebap Setan pe terus banna dirina tempa-tempa jadi malekat terang.+
15 Emaka labo teku mamang adi pelayan-pelayanna pe terus banna dirina tempa-tempa jadi pelayan kebenaren. Tapi dungna dat kalak e nge balasen si sesuai ras perbahanenna.+
16 Sekali nari kukataken: Ula ise pe ngataken aku la masuk akal. Tapi adi bage pengakap kena, alokenlah aku selaku kalak si la masuk akal gelah banci aku sitik bangga.
17 Gundari, kai si nandangi kukataken e labo perban kuikutken usihen Tuan, tapi ngerana aku bagi kalak si la masuk akal, si meriah kapna bangga, janah tek man dirina sendiri.
18 Perban enterem kalak si bangga kerna kai si lit bas doni enda, aku pe bangga ka teku kerna si e.
19 Adi “masuk akal” kel kena, uga maka banci aloken kena kalak si la masuk akal?
20 Aloken kena ise pe si erban kena jadi budak, si muat untung bas kena nari, si ngerampas kai si lit bas kena, si sombong man kena, bage pe si marap ayo kena.
21 Situhuna mela kuakap ngataken si e, sebap banci akap kena kami lemah.
Tapi adi kalak si deban pang, aku pe pang nge amin pe aku ngerana bagi kalak si la masuk akal.
22 Kalak Heber kin kalak e? Aku pe.+ Kalak Israel kin kalak e? Aku pe. Keturunen Abraham kin kalak e? Aku pe.+
23 Pelayan Kristus kin kalak e? Ngerana aku bagi kalak adon, kukataken maka aku hebaten asangken kalak e. Buen aku erdahin,+ rusuren aku ipenjaraken,+ rusur aku ipekpeki seh asa lanai terkira piga kali ipekpek, janah rusur aku hampir mate.+
24 Enggo lit lima kesempaten aku icambuk kalak Jahudi, tiap kesempaten lit 39 kali icambuk.+
25 Telu kali aku ipekpeki alu tongkat,+ sekali ibenteri alu batu,+ telu kali karam kapal si kunangkihi,+ janah bombang-bombang aku sedekah sada wari sada berngi i laut.
26 Rusur kuadapi bahaya bas perdalanenku: bahaya arah lau maler, perampok, kalak sebangsaku+ ras bangsa si deban,+ bas kota,+ i taneh mesawang,* i laut, bage pe i tengah-tengah turang senina si palsu.
27 Kerja keras aku, latih kel kuakap, rusur aku la medem,+ kelihen, muas,+ rusur la lit panganku,+ bergehen, janah kurang uisku.
28 Selain si e, tiap wari latih kuakap rukur perban kuatir aku man kerina runggun.+
29 Adi lit si lemah, la kin aku pe lemah? Adi lit si tertuktuk, la kin aku pe merawa?
30 Adi arus kin aku bangga, bangga aku kerna kai si ncidahken maka aku lemah.
31 Dibata, eme Bapak Tuan Jesus si patut ipuji seh rasa lalap, tehNa maka aku labo erbual.
32 I Damaskus, gubernur si ipilih Raja Aretas, banna penjaga i gerbang kota Damaskus guna nangkap aku,
33 tapi aku ipenusur alu keranjang, ipenusur arah jendela si lit i tembok kota e,+ alu bage banci aku bebas arah tanna nari.
Cataten i teruh
^ Taneh si mbelang si jarang iingani.
