2 Korinti 12:1-21
12 Arus aku bangga. Amin pe la erguna, terus kucakapken kerna pengenehenen*+ bage pe kai si kataken Tuan.+
2 Lit kutandai sada dilaki si ersada ras Kristus, si 14 tahun si lewat rempet iangkat ku surga si peteluken. La kuteh ia iangkat ras dagingna ntah lang. Dibata si metehsa.
3 Payo, kutandai dilaki e, tapi la kuteh ia iangkat ras dagingna ntah lang. Dibata si metehsa.
4 Rempet ia ibaba ku pardis, begina kata-kata si la banci ikataken ntah pe ibelasken manusia.
5 Kubanggaken dilaki e. Tapi aku, kelemahenku saja si kubanggaken.
6 Adi bangga pe ateku, labo aku jadi la masuk akal sebap kai si kukataken benar. Tapi labo aku bangga, alu bage puji kena aku menurut kai si enggo idah kena ras si begi kena arah aku nari,
7 janah labo perban kai si luar biasa si enggo ikataken man bangku.
Gelah la aku sombong, ibereken duri bas dagingku,+ tempa-tempa lit malekat Setan si terus mekpeki aku, alu bage la aku sombong.
8 Enggo telu kali aku mindo man Tuhan* gelah ibuat duri e arah aku nari.
9 Tapi katakenNa bangku, “KiniulinKu si luar biasa enggo bias man bandu, sebap sanga kam lemah, kuasaKu jadi sempurna bas kam.”+ Emaka alu ermeriah ukur, bangga aku man kelemahenku gelah kuasa Kristus tetap lit bas aku bagi kemah.
10 Emaka senang kuakap sanga aku lemah, sanga ihina, sanga kadeku pe kurang, sanga isiksa, bage pe sanga ngadapi kiniseran guna Kristus. Perban sanga aku lemah, aku jadi megegeh.+
11 Aku memang la masuk akal. Kena nge si maksa aku gelah kupujiken diriku, arusna kena nge si mujiken aku. Amin gia aku labo kai pe, situhuna labo sitik pe aku ketadingen ibandingken rasul-rasul kena si seh kel hebatna e.+
12 Enggo langsung idah kena maka aku enda rasul, perban terus aku sabar*+ janah kulakoken melala tanda si luar biasa, mukjizat-mukjizat, ras perbahanen si dem kuasa.+
13 Selain aku la jadi tanggungen kena, me labo lit kurangna kena ibandingken runggun si deban?+ Maapkenlah aku perban kesalahen enda.
14 Situhuna, enda petelu kaliken enggo ersikap aku ndahi kena. Bagi si mbarenda, gundari pe aku labo jadi tanggungen kena sebap si kuarapken labo erta kena,+ tapi kena. Labo anak-anak+ si mpepulung erta man orang tuana, tapi orang tua si mpepulung erta man anak-anakna.
15 Adi aku, meriah ukurku mereken kerinana ras ngorbanken kerinana guna kena.+ Keleng kel ateku kena, emaka patut kin kurang kekelengen kena man bangku?
16 Amin pe bage, la aku jadi tanggungen man kena.+ Tapi, kataken kena aku “licik,” kataken kena kutokohi kena alu “tipun.”
17 Me labo pernah kubuat untung bas kena nari arah kalak si kusuruh ndahi kena?
18 Sanga kusuruh Titus ras sekalak turang senina ndahi kena, me labo buatna untung arah kena nari?+ La kin seri nge perukuren ras perbahanen kami?
19 Akap kena kin kami sangana mbela diri? Tentu lang. Kami ngerana alu jujur i lebe-lebe Dibata selaku kalak si ersada ras Kristus. Turang senina si kukelengi, situhuna kerina si lakoken kami guna mpegegehi kena kap.
20 Bicara reh kari aku, kuatir aku adi kena la bagi si kuarapken, janah aku pe la bagi si arapken kena. Kuatir aku adi lit si gejek, cian, merawa, erjengil, ngataken si la tuhu kerna kalak si deban, cikurak, sombong, ras rubati.
21 Banci saja sanga reh pagi aku mulihi, ban Dibataku aku mela i lebe-lebe kena, janah sedih kel aku perban melala kalak si mbarenda erban dosa lenga ka ertobat arah perbahanenna si najis, perbahanen seks si salah,* ras perbahanen si la meteh mela.*
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah “megenggeng.”
