2 Korinti 13:1-14
13 Enda petelu kaliken aku ersikap guna ndahi kena. Lit ayat si ngataken, “Sada keterangen ianggap benar adi lit dua ntah telu saksi.”+
2 Amin pe gundari aku la ras kena, begikenlah kata-kataku tempa-tempa aku ras kena pedua kaliken. Emaka kubereken ateku leben persinget man kalak si mbarenda erban dosa, bage pe man kena kerina. Adi reh ka pagi aku, kalak si bage la banci kupediat.
3 Alu bage, kubuktiken pagi man kena maka Kristus ngerana arah aku, janah labo ia lemah man kena, tapi perbahanenna dem alu kuasa.
4 Memang ia ibunuh i tiang* perban keadanna si lemah, tapi gundari ia nggeluh perban kuasa Dibata.+ Gundari pe, kami lemah bagi ia, tapi nggeluh pagi kami ras ia+ perban kuasa Dibata si sangana erdahin bas diri kena.+
5 Teruslah pereksa diri kena, erkiniteken denga kin kena ntah lang? Teruslah pastiken uga kin kena situhuna.+ Sadar nge kena maka Jesus Kristus ersada ras kena? Arusna sadar min kena, pala la kena aloken Dibata.
6 Ngarap kel aku gelah sadar kena maka kami aloken Dibata.
7 Ertoto kami man Dibata gelah la lakoken kena kesalahen kai pe. Tujun kami labo gelah ngena ate kalak kami. Tapi, gelah lakoken kena kai si mehuli, amin pe kami la ngena ate kalak si deban.
8 La banci lawan kami kebenaren, tapi kai pe lakoken kami guna kebenaren.
9 Pasti meriah ukur kami sanga kena megegeh, amin pe kami lemah paksa si e. Ertoto ka kami gelah ban kena perubahen si iperluken.
10 Emaka kutulis kerna si enda sanga aku la ras kena, gelah sanga aku ras kena la perlu aku kerassa man kena, perban enggo bereken Tuan man bangku kuasa+ guna mpegegehi kena, janah labo erban kena lemah.
11 Dungna, o turang senina, teruslah kena ermeriah ukur, teruslah ban perubahen si iperluken, teruslah aloken pengapul,+ teruslah kena seperukuren,+ teruslah nggeluh alu dame.+ Alu bage, Dibata si dem kekelengen ras dem kedamen+ terus ras kena.
12 Alo-alolah sada ras si debanna alu dem kekelengen.*
13 Kerina kalak si badia kirim salam man kena.
14 Mbera-mbera kiniulin si luar biasa arah Tuan Jesus Kristus, kekelengen Dibata, bage pe pasu-pasu arah kesah si badia terus lit ras kena.
