2 Korinti 2:1-17
2 Enggo kuputusken maka sanga kudahi pagi kena mulihi, lanai kuban kena sedih.
2 Adi kuban kena sedih, ise nari si ngapuli aku adi la kin kalak si kuban sedih?
3 Kutulis sange surat man kena gelah adi reh pagi aku, la aku sedih ban kalak si arusna erban aku senang, sebap tek aku maka kai si erban aku senang pasti ka erban kena senang.
4 Perban beratna kiniseranku janah latih kel ukurku, kutulisken surat enda man kena alu iluh mambur, si e kukataken labo gelah kena sedih+ tapi gelah teh kena maka tuhu-tuhu keleng kel ateku kena.
5 Adi lit si erban kena sedih,+ situhuna labo aku si banna sedih, tapi kena kerina nge si banna sedih. La ateku terbuen ncakapken kerna si enda.
6 Teremen bas kena enggo mere persinget man bana, janah si e enggo bias.
7 Gundari, alu mehuli ampuni ia janah apuli,+ gelah ula ia nyerah perban sedihsa kapna.+
8 Kupindoken man kena, banlah ia tek maka tuhu-tuhu kelengi kena kel ia.+
9 Kutulis sange surat man kena guna nguji kena, patuh ntah lang kena bas kerinana.
10 Adi ampuni kena sekalak jelma, kuampuni ka ia. Situhuna sanga kuampuni sekalak jelma, si e kulakoken i lebe-lebe Kristus guna kena kerina.
11 Alu bage, la kita imanpaatken* Setan,+ sebap enggo siteh rencanana.+
12 Sanga seh aku i Troas+ guna mberitaken berita si meriah kerna Kristus, enggo lit kesempatenku* ngelayani Tuan,
13 tapi la tenang ukurku sebap la aku jumpa ras seninaku Titus.+ Emaka kenca kukataken man turang senina si lit i je maka arus aku lawes, berkat aku ku Makedoni.+
14 Bujur man Dibata, si rusur minpin kita bas pawai kemenangen ras Kristus. PakeNa kita mberitaken pemeteh kerna diriNa ku japa pe, bagi bau si merim.
15 Sanga siberitaken kerna Kristus, kita bagi bau si merim i lebe-lebe Dibata, si teranggeh i tengah-tengah kalak si iselamatken bage pe si ikernepken.
16 Man kalak si ikernepken, enda bagi bau si maba kematen,+ tapi man kalak si iselamatken, enda bagi bau si maba kegeluhen. Ise si cocok ndahiken dahin enda?
17 Kami kap si cocok ndahikenca, sebap la darami kami untung arah* kata Dibata+ bagi si lakoken enterem jelma. Tapi selaku pengikut Kristus si isuruh Dibata, arah ukur kami si bujur nge kami ngerana i lebe-lebe Dibata.
