2 Korinti 6:1-18
6 Perban kami erdahin radu ras Dibata,+ pindo kami gelah la sia-siaken kena kiniulin Dibata si luar biasa si enggo aloken kena.+
2 Nina Dibata, “Bas waktu si mehuli Kuakap, Kubegiken kam. Bas wari keselamaten, Kusampati kam.”+ Nenlah! Gundari me waktu si mehuli e, janah gundari me wari keselamaten e.
3 Bas kai pe, la ate kami erban kalak tertuktuk, gelah pelayanen kami la banci salahken kalak.+
4 Tapi, bas kai pe cidahken kami maka kami pelayan Dibata.+ Sabar kami ngadapi melala percuban, kiniseran, kekurangen, bage pe kesusahen.+
5 Kami ipekpeki, ipenjaraken,+ ikeroyok, kerja keras, rusur la medem, janah rusur la man.+
6 Bersih geluh kami, perbahanen kami sesuai ras pemeteh kerna Dibata, sabar kami,+ mehuli kami,+ ikutken kami penegu-negu kesah si badia, janah cidahken kami kekelengen bas pusuh nari.*+
7 Jujur kami ngerana, andalken kami kuasa Dibata,+ tagangi kami senjata-senjata kebenaren+ bas tan kanan* kami ras tan kiri* kami.
8 Kami ihamati janah ihina, kami ipandangi janah ipuji. Jujur pe kami, kataken kalak kami penipu.
9 Akap kalak kami la itandai, tapi situhuna itandai, akap kalak kami enggo nandangi mate, tapi situhuna nggeluh denga,+ akap kalak kami enggo ihukum, tapi situhuna la mate,+
10 akap kalak kami erceda ate, situhuna ermeriah ukur, akap kalak kami mesera, situhuna ban kami enterem jelma jadi bayak, akap kalak kade kami pe la lit, situhuna kai pe lit bas kami.+
11 O turang senina i Korinti, enggo ngerana kami alu terus terang man kena janah enggo buka kami pusuh kami.
12 Kekelengen kami man kena la lit batasna,+ tapi kekelengen kena man kami lit batasna.
13 Ngerana aku man kena bagi man anakku, bage ka min ban kena man kami. Pebelin kena min kekelengen* kena man kami.+
14 Ula kena ersada* ras kalak si la tek.+ Sebap lit kin si seri antara kebenaren ras kejahaten?+ Ntah lit kin si seri antara terang ras gelap?+
15 Lit kin si seri antara Kristus ras Belial?*+ Ntah, lit kin si seri antara kalak si erkiniteken ras kalak si la erkiniteken?+
16 Lit kin hubungen rumah pertoton Dibata ras berhala?+ Kita kap rumah pertoton Dibata si nggeluh,+ bagi si kataken Dibata, “Tading pagi Aku ras kalak e, Aku lit i tengah-tengah kalak e.+ Aku kap Dibata kalak e, kalak e jadi umatKu.”+
17 “‘Emaka, ndaratlah kena arah kalak e nari, pisahkenlah diri kena,’ nina Jahwe,* ‘ula nai kuit kai si najis’”,+ “‘emaka Kualoken kena.’”+
18 “‘Aku jadi Bapak kena,+ kena jadi anak-anakKu si dilaki ras si diberu,’+ bage nina Jahwe* Si Madakuasa.”
Cataten i teruh
^ Ntah “kekelengen si la munapik.”
^ Mungkin guna nyerang.
^ Mungkin guna nangkis.
^ As. “Talangi kena min pusuh.”
^ As. “Ula kena teriket bas sada pasangen.” Pasangen eme alat si biasa itama ku kuduk manusia ntah pe binatang guna maba baban.
^ Bas kata Heber nari maksudna “La Erguna,” itujuken man Setan.
