2 Korinti 7:1-16
7 Emaka turang senina si kelengi kami, perban enggo sidat janji-janji e,+ mari sibersihken dirita arah kai pe si banci erban dagingta ras perukurenta najis,+ gelah badia kita alu sempurna perban mbiar man Dibata.
2 Banlah ingan kami bas pusuh kena.+ La pernah lit salah kami man ise pe, la pernah rugiken kami ise pe, janah la pernah manpaatken kami ise pe.+
3 Bage ningku labo guna nalahken kena perban bagi si enggo kukataken, kena lit bas pusuh kami, mate ras kami janah nggeluh ras kami.
4 Bebas aku ngerana man kena, janah bangga aku man kena. Tuhu-tuhu terapuli kel aku, janah mbelin keriahen ukurku amin pe melala kiniseran nanami kami.+
5 Sanga kami seh i Makedoni pe,+ la tenang akap kami, lalap nanami kami erbage-bage kiniseran. Lit perlawanen arah darat runggun nari, janah lit kebiaren bas runggun nari.
6 Tapi Dibata si lalap ngapuli kalak si latih rukur,+ enggo ngapuli kami arah kerehen Titus.
7 Terapuli kami labo saja perban kerehenna, tapi perban pengapul si datna arah kena nari. Katakenna man kami kerna uga tedehna ate kena man bangku, kerna uga cedana ukur kena, janah kerna uga ermediatena kena man bangku, alu bage reh tambahna keriahen ukurku.
8 Amin pe sedih kena iban suratku e,+ labo aku menyesal. Sebap ntisik ngenca kena sedih perban suratku e. Emaka amin pe tangtangna aku menyesal,
9 gundari enggo senang kuakap, labo perban kena sedih, tapi perban sedih e erban kena teriahken gelah robah. Perban sedih kena e sesuai ras peraten Dibata, alu bage la rugiken kami kena.
10 Sedih si sesuai ras peraten Dibata ngasilken pertobaten si maba keselamaten, janah la erban kalak menyesal.+ Tapi kesedihen doni enda ngasilken kematen.
11 Jelas kel maka sedih kena e sesuai ras peraten Dibata, alu bage usahaken kena kel ngelakoken kai si benar. Bersihken kena gelar kena, merawa kel kena ngidah perbahanen si salah, mbiar kena man Dibata, tutus kel ate kena robah, semangat kena mpekena kesalahen kena.+ Bas si e, lakoken kena kai si benar.
12 Kutulis surat enda man kena labo guna kepentingen kalak si ersalah+ ntah pe kalak si isalahken. Tapi kutulis surat enda gelah buktiken kena i lebe-lebe Dibata maka merhat kena megiken kami.
13 Enda kap si erban kami terapuli.
Tapi selain terapuli, reh riahna ukur kami perban Titus pe ermeriah ukur, perban kerina kena mpegegehi ia.
14 Pernah kupujiken kena man Titus, janah la aku mela. Kai si pujiken kami man bana payo tuhu, bage ka pe kerna kerina si kataken kami man kena.
15 Selain si e, reh kelengna ate Titus man kena, perban ingetna uga patuhna kena kerina+ janah mehamat kel kena ngalo-ngalo ia.
16 Meriah ukurku perban bas kai pe banci aku tek man* kena.
Cataten i teruh
^ Ntah banci saja “banci aku sabar perban.”
