2 Kronika 1:1-17
1 Pemerentahen Salomo anak Daud terus reh paguhna. Dibata Jahwe lit ras ia janah banNa ia jadi seh kel hebatna.+
2 Perentahken Salomo gelah pulung kerina kalak Israel, peminpin si ngawasi seribu kalak bage pe si ngawasi seratus kalak, hakim-hakim, kerina peminpin kalak Israel, ras peminpin keluarga bapak arah kalak e.
3 Kenca si e, Salomo ras kerina kalak si pulung ndai lawes ku ingan si meganjang i Gibeon,+ perban i je ingan kemah perjumpan ras Dibata si benar. Musa mbarenda si erban kemah e i taneh mesawang* janah ia sekalak pelayan Jahwe.
4 Tapi enggo baba Daud Peti Perjanjin* Dibata si benar arah Kiryat Jearim+ ku ingan si enggo sikapken Daud. Banna sada kemah jadi ingan Peti e bas Jerusalem.+
5 Mbarenda ban Besalel+ ingan nutung* persembahen arah tembaga nari,+ Besalel e anak Uri kempu Hur. Ingan nutung persembahen e itama i lebe-lebe kemah ingan ersembah man Jahwe. I je biasana Salomo ras umat Dibata ertoto mindo petunjuk man baNa.
6 Bereken Salomo persembahen i je i lebe-lebe Jahwe. Persembahkenna 1.000 persembahen tutungen i datas ingan nutung persembahen si iban arah tembaga nari+ i kemah perjumpan.
7 Bas berngi e, jumpai Dibata me Salomo arah nipi, nina, “Pindolah kai si atendu Kubereken man bandu.”+
8 Megi si e, nina Salomo man Dibata, “Enggo buktikenNdu kekelengenNdu si setia si mbelin man Daud bapakku,+ janah enggo banNdu aku jadi raja nggantiken ia.+
9 Gundari o Dibata Jahwe, buktikenlah janjiNdu man Daud bapakku banci terteki.+ Enggo banNdu aku jadi raja merentah bangsa enda si teremna bagi abu bas doni.+
10 Bereken min man bangku kepentaren ras pemeteh+ guna minpin bangsa enda, ise kin si ngasup ngakimi bangsaNdu si mbelin enda?”+
11 Kenca si e nina Dibata man Salomo, “La pindondu erta, kebayaken, kemulian, ntah pe kematen musuh-musuhndu. La ka pindondu gelah gedang umurndu. Tapi pindondu kepentaren ras pemeteh guna ngakimi bangsaKu, bangsa si enggo Kuban kam jadi rajana.+
12 Emaka Kubereken man bandu kepentaren ras pemeteh. Kubereken ka erta, kebayaken, ras kemulian si la lit bas raja si enggo leben ntah pe pudin asangken kam.”+
13 Emaka mulih Salomo arah ingan si meganjang i Gibeon nari,+ arah lebe-lebe kemah perjumpan, ku Jerusalem. Merentah ia bas Israel.
14 Lalap pepulung Salomo gereta perang bage pe kuda-kuda.* Lit 1.400 gereta perangna ras 12.000 kudana.+ Tamakenna gereta perang e bas kota-kota ingan gereta perang+ si ndeher ku ingan raja i Jerusalem.+
15 Pirak ras emas bas Jerusalem ban raja buena bagi batu,+ janah kayu aras bali buena bagi batang ara kerangen si lit i Sepela.+
16 Kuda-kuda Salomo e ikirim arah Mesir nari.+ Perbinaga si erdahin man raja nukur kuda-kuda e* alu erga si enggo itetapken.+
17 Tiap gereta perang si itukur* arah Mesir nari ergana 600 logam pirak, janah sada kuda ergana 150 logam pirak, jenari dayaken* kalak e man kerina raja kalak Het ras raja-raja kalak Siria.
Cataten i teruh
^ Taneh si mbelang si jarang iingani.
^ Ntah “Peti Perpadanen.”
^ Ntah “si nangkih kuda.”
^ Ntah banci saja “e arah Mesir ras Kewe,” mungkin Kilikia.
^ Ntah “iimpor.”
^ Ntah “ekspor.”
