2 Kronika 10:1-19
-
Pemberontaken Israel ngelawan Rehabeam (1-19)
10 Lawes Rehabeam ku Sikem,+ sebap enggo reh kerina kalak Israel ku Sikem guna njadiken ia raja.+
2 Kenca begi Jerobeam+ kerna si e, lawes ia nadingken Mesir. Sanga si e, Jerobeam anak Nebat sangana i Mesir. Kiam ia ku Mesir perban Raja Salomo.+
3 Kenca si e isuruh me sekalak jelma ndahi Jerobeam, jenari Jerobeam ras kerina kalak Israel reh ndahi Rehabeam janah nina,
4 “Enggo ban bapakndu mberat baban kami.+ Tapi adi banndu reh nahangna baban kami e ras pendahin si bereken bapakndu e, layani kami pagi kam.”
5 Megi si e, nina raja, “Telu wari nari reh ka kena ku jenda.” Emaka lawes kerina kalak e.+
6 Kenca si e, sungkuni Raja Rehabeam tua-tua* eme penasehat Salomo bapakna sanga ia nggeluh denga, nina, “Menurut kena, kai nge ningku man kalak e?”
7 Nina tua-tua e, “Adi mehuli kam man kalak e, meriah banndu ukur kalak e, adi mehuli jawapen si berekenndu, pasti lalap pagi kalak e jadi pelayanndu.”
8 Tapi tulakna nasehat tua-tua e, janah sungkunina pendapat anak muda eme temanna sebaya si gundari jadi pelayanna,+
9 nina, “Bagenda kataken kalak e, ‘Banlah baban kami reh nahangna.’ Menurut kena, kai nge ningku?”
10 Nina temanna sebaya e, “Man kalak si ngataken, ‘Enggo ban bapakndu baban kami jadi mberat. Tapi banlah baban kami reh nahangna,’ bagendalah nindu njawapsa, ‘Susahen pagi akap kena kuban asangken si iban bapakku.*
11 Bereken bapakku man kena baban si mberat, tapi reh beratna pagi kuban baban kena e. Hukum bapakku kena alu cambuk si biasa, tapi kuhukum kena pagi alu cambuk si erduri.’”
12 Bas wari si peteluken, reh Jerobeam ras kerina kalak ndai ndahi Raja Rehabeam, sebap enggo kataken Rehabeam, “Telu wari nari reh ka kena ku jenda.”+
13 La ikutken Raja Rehabeam nasehat tua-tua e. Kasar ia njawap rakyat e.
14 Jawapna kalak e menurut nasehat anak muda ndai, nina, “Kuban kari baban kena reh beratna janah kutambahi ka. Hukum bapakku kena alu cambuk si biasa, tapi kuhukum kena alu cambuk si erduri.”
15 La begiken raja pemindon rakyatna e. Kerina e terjadi perban Dibata si benar,+ gelah terjadi kai si kataken Jahwe man Jerobeam anak Nebat si pesehNa arah Ahia+ kalak Silo.
16 Perban la begiken raja pemindon rakyatna e, emaka nina kalak e, “Kai kin urusen kami ras Daud? Labo lit warisen si idat kami arah anak Isai. O kalak Israel, mulihlah kena ku dibata-dibata kena. O keturunen Daud, uruslah diri kena.”+ Kenca si e, mulih kerina kalak Israel ku rumahna.+
17 Tapi Rehabeam terus merentah kalak Israel si tading i kota-kota Juda.+
18 Kenca si e, suruh Raja Rehabeam me Hadoram+ ngawasi kalak si kerja paksa, tapi benteri kalak Israel ia alu batu seh ngasa mate. Raja Rehabeam berhasil kiam nangkih geretana ku Jerusalem.+
19 Mulai je nari kalak Israel mberontak man keluarga Daud seh ngasa gundari.
