2 Kronika 11:1-23
11 Kenca seh Rehabeam i Jerusalem, mis pepulungna 180.000 prajurit si terlatih arah suku Juda ras suku Benyamin.+ Kalak e ipepulung guna ngelawan Israel gelah kerajan e mulihken ku Rehabeam.+
2 Kenca si e, ngerana Jahwe arah Nabi Semaya+ pelayan Dibata si benar, nina,
3 “Kataken man Rehabeam anak Salomo raja Juda bage pe man kerina kalak Israel si lit i Juda ras i Benyamin,
4 ‘Enda si kataken Jahwe, “Ula kena erperang ngelawan senina-senina kena. Mulihlah kena ku rumah kena, sebap Aku kap si erban si enda terjadi.”’”+ Emaka patuhi kalak e kai si kataken Jahwe, jenari mulih kalak e janah la lawanna Jerobeam.
5 Rehabeam tading i Jerusalem janah bangunna kota-kota si erbenteng i Juda.
6 Banna reh paguhna kota-kota Betlehem,+ Etam, Tekoa,+
7 Betsur, Soko,+ Adulam,+
8 Gat,+ Maresa, Sip,+
9 Adoraim, Lakis,+ Aseka,+
10 Sora, Ayalon,+ ras Hebron.+ Si e ndai kerina kota-kota si erbenteng si lit i Juda ras Benyamin.
11 Selain pepaguhna kota-kota si erbenteng ndai, pilihna ka peminpin man tiap kota e janah berekenna man kalak e pangan, minak, bage pe inemen anggur.
12 Man tiap kota berekenna persedian eme perisai* si galang bage pe tombak. Pepaguh Rehabeam kota e jadi seh kel paguhna. Alu bage daerah Juda ras daerah Benyamin tetap kuasaina.
13 Imam-imam ras kalak Lewi si lit bas kerina daerah Israel erpihak man Rehabeam, janah reh kalak e arah kerina daerahna.
14 Tadingken kalak Lewi mbalmbalna bage pe erta-ertana.+ Jenari lawes kalak e ku Juda ras ku Jerusalem, perban kalak e ipengadi Jerobeam ras anak-anakna guna ngelayani jadi imam Jahwe.+
15 Kenca si e, lantik Jerobeam imam-imamna bas ingan si meganjang+ guna ngelayani malekat-malekat jahat si bentukna bagi kambing,+ bage pe guna ngelayani patung anak lembu si banna.+
16 Kerina kalak arah suku Israel si atena ngelayani Jahwe Dibata Israel ngikutken kalak e ku Jerusalem guna mpersembahken korban man Jahwe Dibata nini bulang kalak e.+
17 Sedekah telu tahun, pepaguh kalak e kerajan Juda janah dukung kalak e Rehabeam anak Salomo, sebap ikutken kalak e Daud ras Salomo sedekah telu tahun e.
18 Kenca si e, erjabu Rehabeam ras Mahalat. Bapak Mahalat eme Jerimot, Jerimot e anak Daud. Mamak Mahalat eme Abihail anak Eliap kempu Isai.+
19 La ndekah kenca si e, lahirken Mahalat piga-piga anak dilaki eme Jeus, Semaria, ras Saham.
20 Kenca ia, empoi Rehabeam me Maaka kempu Absalom,+ jenari lahirkenna Abia,+ Attai, Sisa, ras Selomit.
21 Ngenan ate Rehabeam man Maaka kempu Absalom asangken kerina diberuna si debanna bage pe gundikna,*+ sebap lit 18 diberuna janah lit 60 gundikna. Lit 28 anakna dilaki ras 60 anakna diberu.
22 Emaka angkat Rehabeam me Abia anak Maaka jadi kepala ras peminpin nandangi senina-seninana, sebap iban Rehabeam atena Abia jadi raja.
23 Tapi pentar perbahanen Rehabeam. Suruhna piga-piga anakna si dilaki ku kerina daerah Juda ras Benyamin, ku kota-kota si erbenteng,+ janah berekenna melala persedian man kalak e. Berena ka enterem diberu si jadi diberu kalak e.
