2 Kronika 12:1-16
12 Kenca paguh kerajan Rehabeam janah ia pe jadi megegeh,+ tadingkenna undang-undang Jahwe.+ Kerina kalak Israel si ikut ras ia pe bage perbahanenna.
2 Bas tahun pelimaken pemerentahen Raja Rehabeam, serang Raja Sisak+ arah Mesir me Jerusalem, sebap kalak e lanai setia man Jahwe.
3 Baba Raja Sisak 1.200 gereta perang, 60.000 prajurit si erkuda, bage pe prajurit si deban si lanai terkira buena. Prajurit si deban e eme kalak Mesir, kalak Libia, kalak Suki, ras kalak Etiopia.+
4 Rebutna kota-kota si erbenteng si lit i Juda, dungna seh kalak e i Jerusalem.
5 Pulung Rehabeam ras peminpin-peminpin kalak Juda perban mbiar kalak e man Sisak, jenari nina Nabi Semaya+ man kalak e, “Enda si kataken Jahwe, ‘Enggo tadingken kena Aku, emaka kena pe Kutadingken+ janah Kuserahken ku tan Sisak.’”
6 Megi si e, peminpin-peminpin Israel bage pe raja mpeteruk dirina,+ nina, “Benar kap si lakoken Jahwe e.”
7 Sanga idah Jahwe enggo peteruk kalak e dirina, ngerana Jahwe arah Semaya, nina, “Perban enggo peteruk kalak e dirina, labo pagi Kukernepken kalak e,+ janah ntisik nari Kuselamatken kalak e. Labo ateKu Sisak si mpeseh rawaKu man Jerusalem.
8 Tapi jadi pelayan Sisak pagi kalak e, gelah teh kalak e apai ulin: ngelayani Aku ntah ngelayani raja-raja negri si deban.”
9 Emaka serang Raja Sisak arah Mesir Jerusalem. Buatna erta-erta si lit bas rumah Jahwe+ bage pe erta-erta i bas istana raja. Buatna kerinana termasuk perisai* emas si iban Salomo.+
10 Emaka gantiken Raja Rehabeam perisai-perisai e alu erban perisai-perisai tembaga. Percayakenna perisai-perisai e man peminpin-peminpin si njaga pintu masuk ku istana raja.
11 Tiap masuk raja ku rumah Jahwe, mis reh penjaga-penjaga maba perisai e guna ngkawal raja, kenca dung, ulihkenna ka perisai-perisai e ku ingan penjaga-penjaga.
12 Perban peteruk raja dirina janah lit denga si mehuli bas Juda,+ lanai merawa Jahwe man raja+ janah la kerinana hancurkenNa.+
13 Pepaguh Raja Rehabeam kedudukenna bas Jerusalem janah terus ia merentah jadi raja. Sanga Rehabeam jadi raja umurna 41 tahun, janah lit 17 tahun dekahna ia merentah bas Jerusalem. Kota e ipilih Jahwe arah kerina suku Israel jadi ingan man gelarNa. Gelar mamak Rehabeam eme Naama kalak Ammon.+
14 Tapi lakoken Rehabeam kai si jahat, sebap la lit sura-surana ndarami Jahwe.+
15 Rehabeam ras Jerobeam+ lalap erperang. Sejarah kerna Rehabeam mulai tangtangna nari seh ku kedungenna icatat bas silsilah keluarga, si itulis Nabi Semaya+ ras Iddo+ si lit pengenehenenna* e.
16 Dungna mate Rehabeam janah ikuburken ras nini bulangna i Kota Daud.+ Anakna si nggantiken ia jadi raja eme Abia.+
Cataten i teruh
^ Ntah “ampang-ampang.”
^ Eme kerna kai pe si cidahken Dibata ku bas pikiren sekalak jelma.
