2 Kronika 13:1-22
13 Bas tahun pe-18-ken pemerentahen Raja Jerobeam, Abia jadi raja Juda.+
2 Telu tahun dekahna ia merentah i Jerusalem. Gelar mamakna Mikaya+ anak Uriel arah Gibea nari.+ Lit terjadi perang antara Abia ras Jerobeam.+
3 Lawes Abia erperang, babana 400.000 pejuangna si megegeh ras terlatih erperang.+ Lawan Jerobeam kalak e. Jerobeam lit bas barisen perang radu ras 800.000 prajuritna si terlatih erperang eme pejuang-pejuang si megegeh.
4 Tedis Abia i datas Gunung Semaraim, si lit i daerah pegunungen Eperaim, janah nina, “O Jerobeam ras kerina kalak Israel, begiken aku.
5 La kin teh kena maka Jahwe Dibata Israel enggo erban perjanjin ras Daud eme perjanjin si tahan rasa lalap janah la banci iubah?*+ Enggo erjanji Dibata man Daud maka berekenNa kerajan Israel man Daud ras keturunenna+ seh rasa lalap.+
6 Tapi Jerobeam+ anak Nebat eme pelayan Salomo anak Daud, mberontak ngelawan tuanna.+
7 Janah kalak si pengangguren ras kalak si la terpake terus reh ndahi ia. Dungna berhasil kalak e ngelawan Rehabeam anak Salomo. Paksa si e Rehabeam nguda denga janah perbiar, emaka la ia ngasup ngelawan kalak e.
8 “Gundari perban enterem pasuken kena janah lit anak patung lembu emas si iban Jerobeam jadi dibata kena, akap kena enggo ngasup kena ngelawan kerajan Jahwe si enggo berekenNa man keturunen Daud.+
9 Enggo pelawes kena imam-imam Jahwe+ eme keturunen Harun ras kalak Lewi. Jenari angkat kena imam-imam kena bagi si lakoken bangsa-bangsa arah negri si deban.+ Ise pe si reh maba sada anak lembu jantan ras pitu biri-biri jantan, ban kena ia jadi imam guna berhala-berhala si labo dibata.
10 Tapi kami, Dibata kami eme Jahwe,+ janah la tadingken kami Ia. Imam-imam kami eme keturunen Harun si ngelayani guna Jahwe, janah kalak Lewi si ertugas nampati kalak e.
11 Tiap erpagi-pagi ras berngi,+ persembahken kalak e persembahen tutungen man Jahwe. Tutung kalak e ka kemenyan si merim,+ janah tamana roti persembahen*+ i datas meja si iban arah emas murni. Tiap berngi+ pegeluh kalak e lampu si lit bas ingan lampu si iban arah emas nari.+ Lakoken kami kai si wajip lakoken kami man Jahwe Dibata kami. Tapi kena, tadingken kena Ia.
12 Nenlah! Dibata si benar lit ras kami. Ia kap si minpin kami. Imam-imamNa ngembus trompet si jadi tanda perang ngelawan kena. O kalak Israel, ula lawan kena Jahwe Dibata nini bulang kena, sebap labo kari kena banci berhasil.”+
13 Tapi suruh Jerobeam sada kelompok pasukenna nyerang pasuken Juda arah pudi nari. Alu bage serangen man kalak Juda lit arah lebe nari bage pe pudi nari.
14 Sanga inen pasuken Juda ku pudi, idah kalak e maka kalak e iserang arah lebe nari bage pe arah pudi nari. Emaka mulai kalak e serko man Jahwe,+ janah embus imam-imam trompet alu sora megang.
15 Sanga surakken kalak Juda gelah erperang, i je Jerobeam ras pasuken Israel italuken Dibata si benar, i lebe-lebe Abia ras pasuken Juda.
16 Kiamen pasuken Israel arah pasuken Juda nari, jenari serahken Dibata kalak e ku tan kalak Juda.
17 Enterem kel kalak Israel si ibunuh Abia ras pasukenna. Lit 500.000 prajurit Israel si terlatih erperang si ibunuh kalak e.
18 Bagenda me sange cara kalak Israel italuken. Terbukti kalak Juda banci menang perban andalkenna Jahwe Dibata nini bulangna.+
19 Jerobeam terus iayaki Abia, janah rebut Abia kota-kota arah ia nari, eme Betel+ ras kota-kota i sekelilingna, Jesana ras kota-kota i sekelilingna, bage pe Epron+ ras kota-kota i sekelilingna.
20 Bas pemerentahen Abia, kuasa Jerobeam lanai bagi si mbarenda hebatna. Dungna serang Jahwe ia janah mate.+
21 Tapi Abia terus reh gegehna. Lit 14 diberuna+ janah 22 anakna dilaki ras 16 anakna diberu.
22 Kerna sejarah Abia, perbahanenna ras kata-katana kerina itulis bas tulisen Nabi Iddo.+
