2 Kronika 14:1-15
14 Dungna, mate Abia janah ikuburken i Kota Daud.+ Anakna si nggantiken ia jadi raja eme Asa. Bas pemerentahen Asa, lit sepuluh tahun dekahna dame negri e.
2 Lakoken Asa kai si mehuli ras si benar menurut Jahwe Dibatana.
3 Hancurkenna ingan nutung* persembahen man dibata-dibata asing+ bage pe ingan-ingan ersembah,* hancurkenna ka tugu-tugu si badia+ ras tiang-tiang si badia.*+
4 Selain si e, suruhna kalak Juda ndarami Jahwe Dibata nini bulang kalak e. Suruhna ka kalak e ndalanken Undang-Undang Musa bage pe perentah Dibata.
5 Kernepken Asa ingan-ingan ersembah bage pe ingan nutung kemenyan+ arah kerina kota si lit bas Juda, emaka dame kerajan e bas masa pemerentahenna.
6 Bangunna ka kota-kota si erbenteng i Juda.+ Bas piga-piga tahun e, la lit si ngganggu negri e janah la lit si erperang ngelawan ia, sebap bereken Jahwe kedamen man bana.+
7 Kataken Asa man kalak Juda, “Marilah sibangun kota-kota e janah siban tembokna, menarana,+ gerbangna ras palangna i sekeliling tembok e. Kita denga si nguasai negri enda, perban enggo sidarami Jahwe Dibatata. Perban sidarami Ia, berekenNa kedamen man banta janah bebas arah kerina musuh si lit i sekelilingta.” Bage me pembangunen e berhasil ilakoken.+
8 Lit 300.000 prajurit Asa arah Juda nari si make perisai* si galang ras tombak. Arah Benyamin nari lit 280.000 pejuangna si megegeh si make perisai si kitik* ras panah.+
9 Piga-piga waktu kenca si e, reh Sera arah Etiopia ngelawan kalak e. Babana 1.000.000 prajuritna ras 300 gereta perangna.+ Sanga seh kalak e i Maresa,+
10 ndarat Asa ngelawan Sera. Jenari, aturken kalak e barisen perang i Lembah Sepatah i Maresa.
11 Erlebuh Asa man Jahwe Dibatana,+ nina, “O Jahwe, ise pe banci sampatiNdu, la soal enterem ntah sitik, la soal megegeh ntah lemah.+ O Jahwe Dibata kami, sampati min kami sebap Kam kap si andalken kami.+ Reh kami ngelawan pasuken si enterem e bas gelarNdu.+ O Jahwe, Kam kap Dibata kami. Ula min pediatNdu manusia menang ngelawan Kam.”+
12 Emaka taluken Jahwe kalak Etiopia i lebe-lebe Asa ras kalak Juda. Jenari kiamen kerina kalak Etiopia e.+
13 Ayaki Asa ras pasukenna kalak e seh ngasa Gerar.+ Reh teremna kalak Etiopia si maten seh ngasa lanai lit sada pe si nggeluh, sebap kerina kalak e taluken Jahwe ras pasukenNa. Jenari mulih pasuken Juda janah melala kel babana hasil jarahen.
14 Kenca si e, ban Jahwe kerina penduduk kota i sekeliling Gerar mbiar man baNa. Emaka serang pasuken Juda kerina kota e, jarahna erta pendudukna sebap i je melala kel si banci ijarah.
15 Serang kalak e ka perkemahen permakan-permakan janah jarah kalak e melala kel kambing, biri-biri, ras unta. Jenari mulih kalak e ku Jerusalem.
Cataten i teruh
^ As. “ingan-ingan si meganjang.”
^ Ntah “ampang-ampang.”
^ Biasana enda perisai si ibaba sekalak pemanah.
