2 Kronika 15:1-19
-
Perubahen si iban Asa (1-19)
15 Kesah Dibata reh ku Asaria anak Oded.
2 Emaka jumpai Asaria me Asa, nina, “O Asa ras kerina kalak Juda bage pe kalak Benyamin, begiken aku! Adi tetap kena ras Jahwe, Ia lalap ras kena.+ Adi darami kena Ia, pediatNa kena jumpa ras Ia,+ tapi adi tadingken kena Ia, tadingkenNa ka kena.+
3 Enggo ndekah Israel la ras Dibata si benar, la lit imam si ngajarisa, janah la lit undang-undang.+
4 Tapi sanga susah akap kalak e, mulihken kalak e ku Jahwe Dibata Israel. Darami kalak e Dibata janah pediat Dibata kalak e jumpa ras Ia.+
5 Bas masa si e, la lit sekalak pe si banci lawes ku jah ku je alu aman, sebap enggo kacau kel kerina daerah e.
6 Hancurken sada bangsa me bangsa si deban, janah hancurken sada kota me kota si deban, sebap Dibata kap si erban kalak e kacau, janah ngenanami erbage-bage kesusahen.+
7 Tapi kena, megegehlah kena janah ula kena mbiar,+ sebap perbahanen kena pasti iupahi.”
8 Kenca begi Asa kata-kata enda ras nubuat si ipeseh Nabi Oded, mis ia pang janah hancurkenna berhala-berhala si ciga ate Dibata bas kerina daerah Juda,+ Benyamin, bage pe kota-kota si lit i daerah pegunungen Eperaim. Janah pesikapna ingan nutung* persembahen Jahwe si lit i lebe-lebe teras rumah Jahwe.+
9 Pepulungna ka kerina kalak Juda ras Benyamin. Pepulungna ka enterem penduduk asing arah Eperaim, Manase, bage pe Simeon nari.+ Enggo sadar kalak e maka Dibata Jahwe lit ras Asa, emaka tadingken kalak e Israel janah erpihak ku Asa.
10 Emaka pulung kalak e i Jerusalem bas bulan peteluken, tahun pe-15-ken bas pemerentahen Asa.
11 Bas wari e persembahken kalak e korban man Jahwe, lit 700 lembu ras 7.000 biri-biri arah hasil jarahenna.
12 Jenari ban kalak e perjanjin guna ndarami Jahwe Dibata nini bulang kalak e alu bulat ukur bage pe asa kerina gegehna.+
13 Ise pe si la nggit ndarami Jahwe Dibata Israel arus ibunuh, la soal nguda denga ntah pe metua, dilaki ntah pe diberu.+
14 Emaka ersumpah kalak e man Jahwe alu sora megang, alu ersurak, bage pe alu ngembus trompet ras trompet tanduk.
15 Meriah akap kerina kalak Juda perban sumpahna e, sebap enggo ersumpah kalak e alu bulat ukur, tutus kel ate kalak e ndarami Jahwe, janah pediatNa kalak e njumpai Ia.+ Lalap banNa kalak e bebas arah kerina musuhna si lit i sekelilingna.+
16 Pengadi Raja Asa ninina Maaka+ arah kedudukenna selaku ratu. Sebap enggo banna patung si ciga ate Dibata janah si e ipake bas penembahen tiang si badia.*+ Runtuhken Asa patung e janah hancurkenna, jenari tutungna i Lembah Kidron.+
17 Tapi ingan-ingan ersembah* si lit bas Israel+ la ihancurken.+ Amin pe bage, Asa tetap bulat ukurna man Dibata segedang geluhna.+
18 Tamakenna ku bas rumah Dibata si benar kerina barang-barang si enggo ipebadiana ras bapakna, eme pirak, emas, ras erbage-bage peralaten.+
19 La lit terjadi perang seh ngayak tahun pe-35-ken pemerentahen Asa.+
