2 Kronika 16:1-14
16 Bas tahun pe-36-ken pemerentahen Asa, reh Baasa+ raja Israel nyerang Juda. Bangunna* Rama+ gelah ise pe la banci masuk ntah pe ndarat ku daerah Asa raja Juda.+
2 Buat Asa pirak ras emas arah ingan nimpan erta bas rumah Jahwe+ bage pe arah istana, jenari kirimna man Benhadat raja Siria+ si tading i Damaskus, nina,
3 “Lit perjanjin antara aku ras kam bage pe antara bapakku ras bapakndu. Kukirim man bandu pirak ras emas. Emaka batalkenndu min perjanjinndu ras Baasa raja Israel, gelah mundur ia arah aku nari.”
4 Begiken Benhadat me Raja Asa janah suruhna peminpin-peminpin arah pasukenna nyerang kota-kota Israel. Taluken kalak e Ijon,+ Dan,+ Abel Maim, bage pe kerina ingan-ingan penyimpanen si lit bas kota-kota Naptali.+
5 Sanga begi Baasa kerna si e, mis pengadina pembangunen Rama janah tadingkenna dahinna e.
6 Kenca si e, pepulung Raja Asa kerina kalak Juda janah suruhna kalak e maba batu-batu ras kayu-kayu si ipake Baasa guna mbangun+ Rama.+ Jenari pakena e guna mbangun Geba+ ras Mispa.+
7 Bas sada wari, reh Hanani+ si lit pengenehenenna* njumpai Raja Asa i Juda, nina, “Perban labo Jahwe Dibatandu si andalkenndu tapi raja Siria si andalkenndu, emaka bene kesempatenndu naluken raja Siria.+
8 La kin enterem kel pasuken Etiopia ras Libia? La kin melala kel gereta perangna ras prajuritna si erkuda? Tapi perban andalkenndu Jahwe paksa si e, serahkenNa kalak e ku tanndu.+
9 Mata Jahwe mperdiateken belang-belang doni enda+ guna ndarami kalak si nembah Ia alu bulat ukur, gelah banci berekenNa gegehNa* man kalak e.+ Tapi enggo motu kel perbahanenndu e, mulai gundari nari lalap kam ikut erperang.”+
10 Megelut kel Asa janah merawa ia kenca begina ranan kalak si lit pengenehenenna e. Emaka masukkenna ia ku penjara* jenari siksana ka piga-piga rakyatna.
11 Sejarah kerna Asa mulai tangtangna nari seh ku pendungina itulis bas Buku Raja-Raja Juda ras Israel.+
12 Bas tahun pe-39-ken pemerentahen Asa, kena penakit nahena janah mekelek kel dungna penakitna e. Amin pe bage, la ia mulih ku Jahwe tapi daramina penampat dokter-dokter.
13 Dungna mate Asa bas tahun pe-41-ken pemerentahenna, jenari ikuburken ia ras nini bulangna.+
14 Ikuburken ia bas kuburen si mewah si enggo banna bas Kota Daud.+ Amparken kalak e mayatna i datas ingan si enggo melala itama minak balsem* bage pe minak wangi khusus si iban arah campuren rempah-rempah.+ Kenca si e, ban kalak e api si galang guna ia.*
Cataten i teruh
^ Ntah “Bangunna mulihi.”
^ Bas bahasa Heber, kata enda ngertiken kengasupen sekalak jelma si bereken Dibata guna meteh sura-suraNa.
^ Ntah “dukungenNa.”
^ As. “ku rumah ingan ipasung.”
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Enda labo maksudna nutung mayat Asa, tapi nutung rempah-rempah.
