2 Kronika 17:1-19
17 Kenca si e, anak Asa si nggantiken ia jadi raja eme Josapat.+ Pepaguhna kedudukenna bas Israel.
2 Tamakenna pasuken bas kerina kota si erbenteng i Juda, bangunna ka ingan-ingan pasuken i daerah Juda bage pe bas kota-kota Eperaim si enggo irebut Asa bapakna.+
3 Jahwe lalap ras Josapat sebap ikutkenna dalan Daud nini bulangna+ janah la layanina Baal.
4 Layanina Dibata bapakna+ janah dalankenna perentahNa. La lakokenna kai si lakoken kalak Israel.+
5 Terus ban Jahwe kerajanna reh paguhna bas tanna.+ Kerina kalak Juda terus mereken hadiah man Josapat emaka bayak kel ia janah seh kel muliana.+
6 Dungna pang ia ngikutken dalan-dalan Jahwe janah ingan-ingan ersembah*+ pe hancurkenna bage pe tiang-tiang si badia*+ si lit i Juda.
7 Bas tahun peteluken pemerentahenna, suruhna pejabat-pejabatna eme Benhail, Obaja, Sakaria, Netanel, ras Mikaya guna ngajar bas kota-kota si lit i Juda.
8 Lit ka kalak Lewi ras kalak e eme Semaya, Netani, Sebadia, Asahel, Semiramot, Jehonatan, Adonia, Tobiya, ras Tobadonia. Ikut ka imam-imam ras kalak e eme Elisama ras Jehoram.+
9 Mulai kalak e ngajar i Juda janah babana buku Undang-Undang Jahwe.+ Keliling kalak e guna ngajar bas kerina kota si lit i Juda.
10 Ban Jahwe kerina kerajan i sekeliling Juda jadi mbiar, emaka la kalak e pang ngelawan Josapat.
11 Baba kalak Pilisti man Josapat hadiah bage pe sen jadi upeti.* Baba kalak Arab man bana 7.700 biri-biri jantan bage pe 7.700 kambing jantan arah asuh-asuhen kalak e.
12 Josapat terus reh paguhna+ janah terus bangunna ingan-ingan si erbenteng+ bage pe ingan penyimpanen+ bas Juda.
13 Melala kel proyekna bas Juda, lit ka prajurit-prajuritna eme pejuang-pejuang si megegeh bas Jerusalem.
14 Kalak e ibagiken ku bas kelompok arah keluarga bapakna: arah suku Juda, Adnah si minpin 300.000 pejuang si megegeh+ (Adnah eme salah sada peminpin si ngawasi seribu kalak).
15 Bawahenna eme Jehohanan si minpin 280.000 kalak.
16 Selain si e, lit ka bawahenna si deban eme Amasiah anak Sikri, ia nggit mereken dirina ngelayani Jahwe, janah pinpinna 200.000 pejuang si megegeh.
17 Arah suku Benyamin+ eme Eliada, ia sekalak pejuang si megegeh. Pinpinna 200.000 kalak si make panah bage pe perisai.*+
18 Bawahenna eme Josabat, pinpinna 180.000 prajurit si make perlengkapen perang.
19 Kalak e si ngelayani raja selain kalak si enggo tamaken raja bas kota-kota si erbenteng si lit bas kerina daerah Juda.+
