2 Kronika 18:1-34
18 Josapat seh kel bayakna janah seh kel muliana.+ Tapi aturkenna gelah lit anggota keluargana si erjabu ras keluarga Ahap.+
2 Piga-piga tahun kenca si e, lawes Josapat ndahi Ahap i Samaria.+ Korbanken Ahap melala kel biri-biri ras lembu guna Josapat bage pe kalak si ikut ras ia. Tami-tami Ahap me Josapat gelah nggit ia ikut nyerang daerah Ramot i Gileat.+
3 Kenca si e, nina Ahap raja Israel man Josapat raja Juda, “Nggit nge kam lawes ras aku ku Ramot i Gileat?” Nina, “Banci. Lawes kari aku ras kam, ikut ras prajurit-prajuritku guna nampati kam erperang.”
4 Tapi nina Josapat man raja Israel, “Sisungkunilah lebe kai nina Jahwe.”+
5 Emaka pepulung raja Israel 400 nabi janah sungkunna kalak e, “Arus nge kami erperang ngelawan daerah Ramot i Gileat ntah lang?” Nina kalak e, “Laweslah, pasti serahken Dibata si benar pagi kota e ku tanndu, Raja.”
6 Sungkun Josapat ka, “La kin lit nabi Jahwe i jenda?+ Sipindo ka lebe petunjuk Dibata arah ia.”+
7 Megi si e, nina raja Israel man Josapat, “Lit sekalak nari+ si banci sipindo petunjuk Jahwe arah ia. Gelarna Mikaya anak Imla. Tapi segat teku ia, sebap la pernah ramalkenna* si mehuli kerna aku, si la mehuli lalap si katakenna.”+ Tapi nina Josapat, “Ula min bage nindu, Raja.”
8 Emaka lebuh raja Israel pegawai istana, nina, “Meter baba ku jenda Mikaya anak Imla.”+
9 Sanga si e, raja Israel bage pe Josapat raja Juda sangana bas ingan ngerik* i lebe-lebe gerbang Samaria. Kundul kalak e bas tahtana sekalak-sekalak make baju kerajan. Kerina nabi ngeramal i lebe-lebe kalak e.
10 Kenca si e, Sedekia anak Kenaana erban tanduk-tanduk arah besi nari janah nina, “Enda si kataken Jahwe, ‘Iserang kena Siria alu tanduk-tanduk enda seh ngasa mate kerina kalak e.’”
11 Kerina nabi si deban pe bage ka nina. Ning kalak e, “Laweslah ku daerah Ramot i Gileat, berhasil nge pagi kam.+ Bereken Jahwe pagi kota e ku tan Raja.”
12 Kalak si isuruh ngelegi Mikaya ndai ngataken man Mikaya, nina, “Bagenda, kerina nabi ngataken kai si mehuli man raja. Emaka katakenndu ka min si mehuli bagi kalak e.”+
13 Tapi nina Mikaya, “Ersumpah aku i lebe-lebe Jahwe si nggeluh, kai pe si kataken Dibata, e nge kari si kukataken.”+
14 Kenca si e lawes Mikaya ngadap raja janah sungkun raja ia, nina, “O Mikaya, arus nge aku lawes nyerang daerah Ramot i Gileat ntah lang?” Nina Mikaya ngaloi, “Laweslah kam, berhasil pagi kam. Pasti pagi kalak e iserahken ku tanndu.”
15 Megi si e nina raja, “Piga kali arus kusuruh kam ersumpah gelah si benar ngenca katakenndu bas gelar Jahwe?”
16 Emaka nina Mikaya, “Kuidah kerina kalak Israel merap i gunung-gunung, bagi biri-biri si la lit permakanna.+ Nina Jahwe, ‘La lit tuan kalak e. Pediatlah kalak e mulih ku rumahna alu dame.’”
17 Kenca si e, nina raja Israel man Josapat, “Me enggo ndai kukataken man bandu, ‘Labo kari si mehuli ramalkenna kerna aku, pasti si la mehuli.’”+
18 Jenari nina Mikaya, “Begikenlah kata-kata Jahwe enda: Kuidah Jahwe kundul bas tahtaNa,+ kerina pasuken surga+ tedis i sebelah kanan ras i sebelah kiriNa.+
19 Kenca si e, nungkun Jahwe, ‘Ise si nggit nipu Ahap raja Israel, gelah lawes ia janah mate bas daerah Ramot i Gileat?’ Lit si ngataken bagenda, lit ka si ngataken bagah.
20 Jenari, lit sada malekat+ si maju ku lebe-lebe Jahwe, nina, ‘Aku saja kari si nipu ia.’ Sungkun Jahwe ka, ‘Uga banndu carana?’
21 Nina, ‘Lawes kari aku janah kuban kerina nabina erbual.’ Emaka nina Dibata, ‘Laweslah kam janah lakokenlah bagi si katakenndu ndai. Berhasil nge kari kam.’
22 Emaka pediat Jahwe malekatNa erban nabi-nabindu erbual,+ tapi situhuna enggo kataken Jahwe maka bencana nge pagi si terjadi man bandu.”
23 Kenca bage, deheri Sedekia+ anak Kenaana me Mikaya,+ jenari parapna ayona,+ nina, “Akapmu kin kesah si badia Jahwe enggo nadingken aku, nce ngerana arah engko?”+
24 Nina Mikaya, “Tehndu nge pagi sanga masuk kam ku bas ruangen si mbagesna kel guna cebuni.”
25 Jenari nina raja Israel, “Tangkap Mikaya, serahken ia man Amon peminpin kota, bage pe man Joas anak raja.
26 Kataken man kalak e duana, ‘Bagenda nina raja, “Penjaraken ia.+ Sitik saja bereken roti ras lau man bana seh ngasa mulih aku alu selamat.”’”
27 Jenari nina Mikaya, “Adi mulih kam alu selamat, e tandana Jahwe la ngerana arah aku nari.”+ Nina ka, “Man kena kerina, ingetlah kai si enggo kukataken enda.”
28 Emaka lawes raja Israel ras Josapat raja Juda ku Ramot i Gileat.+
29 Nina raja Israel man Josapat, “Sanga lawes kari kita erperang, menyamar kari aku. Tapi kam, pake paken kerajanndu.” Emaka nyamar raja Israel janah masuk kalak e ku peperangen.
30 Enggo perentahken raja Siria man peminpin-peminpin pasukenna si ergereta, “Ula serang ise pe, la soal peminpinna ntah pe prajuritna. Raja Israel saja serang kena.”
31 Kenca peminpin-peminpin pasuken si ergereta e ngidah Josapat, ning kalak e, “Ah kap raja Israel.” Emaka mutar kalak e guna nyerang Josapat. Serko Josapat mindo penampat,+ janah sampati Jahwe ia. Mis ban Dibata kalak ndai nadingken ia.
32 Kenca sadar peminpin-peminpin si ergereta e maka ia labo raja Israel, mis lanai ayaki kalak e ia.
33 Tapi lit sekalak dilaki si asal-asalen manahken anak panahna, rembang kena raja Israel. Panah e engkenai raja arah salah sada celah baju perangna. Emaka nina raja e man kalak si maba geretana, “Mutar saja kita, ndarat kita arah peperangen e nari, enggo mekelek kel lukaku.”+
34 Perang e terjadi sada warin. Tapi raja Israel arus isampati gelah banci ia tedis bas geretana janah pengalana ku kalak Siria seh ngasa karaben. Mate ia sanga terbenam matawari.+
