2 Kronika 19:1-11
19 Kenca si e, mulih Raja Josapat. Selamat ia mulih+ ku istanana i Jerusalem.
2 Lit sekalak dilaki gelarna Jehu.+ Jehu e anak Hanani+ si lit pengenehenenna.* Lawes Jehu ndahi Raja Josapat, nina, “Cocok kin sampatindu kalak si jahat?+ Cocok kin kelengindu kalak si segat atena Jahwe?+ E me sebapna merawa kel Jahwe man bandu.
3 Amin pe bage, idah Dibata kai si mehuli bas kam,+ sebap enggo hancurkenndu tiang-tiang si badia* bas negri enda, janah enggo sikapkenndu pusuhndu ndarami Dibata si benar.”+
4 Josapat lalap tading i Jerusalem. Dahina ka rakyatna mulai Berseba nari seh ku daerah pegunungen Eperaim,+ guna maba kalak e mulih ku Jahwe Dibata nini bulang kalak e.+
5 Pilihna ka hakim-hakim bas tiap kota si erbenteng i kerina negri Juda.+
6 Nina man hakim-hakim e, “Ukurilah kai si lakoken kena, sebap kena ngakimi labo guna manusia tapi guna Jahwe. Sanga kena ngakimi, lit Ia ras kena.+
7 Mbiarlah kena man Jahwe.+ Hati-hatilah kena kerna kai pe si lakoken kena, Jahwe Dibatata adil kap,+ la erpilihen,+ janah la ngaloken sogok.”+
8 Bas Jerusalem pe pilih Josapat ka piga-piga kalak Lewi, imam, ras peminpin keluarga bapak arah kalak Israel. Tugas kalak e ngelayani jadi hakim-hakim guna Jahwe bage pe guna ndungi perkara-perkara penduduk Jerusalem si lit hubungenna ras undang-undang.+
9 Perentahkenna man kalak e, “Arus dalanken kena tugas kena alu mbiar man Jahwe, alu setia, janah bulat ukur.
10 Katawari pe adi reh senina-senina kena arah kotana, janah pesehna man kena perkara kerna pemunuhen,+ ntah si lit hubungenna ras undang-undang, kerna perentah, peraturen, ntah pe keputusen tertentu, persingetilah kalak e gelah ula ersalah i lebe-lebe Jahwe. Adi lang, merawa kel pagi Ia man kena bage pe man senina-senina kena. Bagenda si arus lakoken kena gelah ula kena ersalah.
11 Enda Amaria, imam kepala si minpin kena bas kerinana si lit hubungenna ras Jahwe.+ Sebadia anak Ismael si minpin kalak Juda bas kerinana si lit hubungenna ras raja. Janah kalak Lewi si ngawasi kena. Megegehlah kena janah lakokenlah. Mbera-mbera Jahwe lit ras kerina kalak si ngelakoken kai si mehuli.”+
