2 Kronika 20:1-37
20 Kenca si e, reh kalak Moap,+ kalak Ammon,+ bage pe piga-piga kalak Meun* erperang ngelawan Josapat.
2 Emaka lit si ngataken man Josapat, “Reh enterem pasuken ngelawan kam. Kalak e reh arah Edom+ si lit i daerah laut.* Gundari kalak e enggo bas En-gedi+ si lit bas Hasason Tamar.”
3 Megi si e, mbiar Josapat janah reh tutusna atena ndarami Jahwe.+ Emaka umumkenna gelah kerina kalak Juda erpuasa.
4 Kenca si e, kerina kalak Juda pulung mindo penampat Jahwe.+ Reh kalak e arah kerina kota si lit bas Juda mindo petunjuk man Jahwe.
5 Emaka kerina kalak Juda ras kalak Jerusalem pulung i lebe-lebe halamen si mbaru si lit bas rumah Jahwe. Tedis Josapat i tengah-tengah kalak e.
6 Jenari nina,
“O Jahwe Dibata nini bulang kami, la kin Kam Dibata si i surga?+ La kin Kam si erkuasa nandangi kerina kerajan bangsa-bangsa?+ Kuasa ras gegeh lit bas tanNdu. La lit ise pe si ngasup ngelawan Kam.+
7 O Dibata kami, Kam kap si enggo mpelawes penduduk negri enda arah lebe-lebe umatNdu Israel. BerekenNdu negri enda man keturunen temanNdu eme Abraham gelah jadi jangna seh rasa lalap.+
8 Tading kalak e i je janah bangunna ingan si badia guna gelarNdu,+ nina,
9 ‘Adi reh si la mehuli man kami bagi perang, hukumen, wabah penakit, ntah pe kelihen, pediatlah kami tedis i lebe-lebe rumah enda bage pe i lebe-lebeNdu, sebap i rumah enda lit kap gelarNdu+ janah erlebuh kami mindo penampatNdu sanga susah akap kami. Begiken min kami janah selamatken kami.’+
10 Mbarenda sanga ndarat kalak Israel arah Mesir nari, la pediatNdu serang kami kalak Ammon, Moap, bage pe kalak si lit i daerah pegunungen Seir.+ Emaka la bunuh kami kalak e, tadingken kami kalak e.+ Tapi gundari reh kalak e ku jenda.
11 Bagenda me carana mbalas kami. Pelawesna atena kami arah taneh si enggo berekenNdu man kami jadi warisen.+
12 O Dibata kami, la kin ateNdu ngukum kalak e?+ Sebap la kami ngasup ngelawan pasuken si enterem e. La teh kami kai si arus lakoken kami.+ Tapi Kam kap si itatap kami, sebap perlu kel kami penampatNdu.”+
13 Paksa si e, kerina kalak Juda tedis i lebe-lebe Jahwe radu ras diberu kalak e bage pe anak-anakna,* termasuk si kitik denga.
14 Kenca si e, reh kesah si badia Jahwe ku Jahasiel anak Sakaria si lit i tengah-tengah kalak si pulung e (Sakaria e anak Benaya, Benaya e anak Jeiel, janah Jeiel e anak Mattania. Mattania e kalak Lewi keturunen Asap).
15 Nina Jahasiel, “O Raja Josapat, bage pe kerina kalak Juda ras penduduk Jerusalem, begikenlah! Enda si kataken Jahwe man kena, ‘Ula mbiar ntah pe gentar perban pasuken si enterem e, sebap labo kena si erperang tapi Dibata.+
16 Pagi nusurlah kena ngelawan kalak e. Kalak e nangkeng ngelewati Sis. Emaka jumpa pagi kena bas lembah* i lebe-lebe Taneh Mesawang* Jeruel.
17 Labo kena perlu ikut erperang. Buatlah ingan kena, tetaplah tedis,+ janah nenlah uga Jahwe nelamatken kena.+ O kalak Juda ras Jerusalem, ula mbiar ntah pe gentar.+ Pagi, laweslah kena ngelawan kalak e, Jahwe lit ras kena.’”+
18 Mis sujud Josapat ras kerina kalak Juda bage pe penduduk Jerusalem i lebe-lebe Jahwe guna nembah Jahwe.
19 Kenca si e, tedis kalak Lewi arah keturunen Kohat+ ras keturunen Korah guna muji Jahwe Dibata Israel alu sora si seh kel gangna.+
20 Pagina lampas kalak e medak janah lawes kalak e ku Taneh Mesawang* Tekoa.+ Sanga kalak e muat berkat, tedis Josapat, nina, “O kalak Juda ras penduduk Jerusalem, begiken aku! Erkinitekenlah kena man Jahwe Dibata kena, alu bage ngasup kena setia.* Erkinitekenlah man nabi-nabina,+ pasti kena berhasil.”
21 Kenca arih-arih Josapat ras kalak si pulung e, pilihna piga-piga jadi penyanyi+ guna rende man Jahwe janah mpersembahken puji-pujin man baNa. Penyanyi-penyanyi e arus make paken si badia. Erdalan kalak e i lebe-lebe pasuken janahna rende, “Ngata bujurlah man Jahwe sebap kekelengenNa si setia tetap lit rasa lalap.”+
22 Kenca mulai kalak e ngendeken puji-pujin alu meriah ukur, aturken Jahwe gelah pasuken si atena nyerang Juda ndai eme pasuken Ammon, Moap, ras penduduk daerah pegunungen Seir dungna sibunuhen.+
23 Tangtangna, ersada pasuken Ammon ras pasuken Moap guna nyerang kerina penduduk daerah pegunungen Seir+ ras munuhsa. Kenca dung bunuh kalak e penduduk Seir, sibunuhen ka pasuken Ammon ras pasuken Moap.+
24 Tapi sanga seh kalak Juda bas menara penjaga si lit bas taneh mesawang*+ janah inenna ku ingan pasuken si enterem e, idahna enggo amparen mayat musuh bas taneh.+ Lanai lit sada pe si nggeluh.
25 Emaka dahi Josapat ras pasukenna kalak e guna njarah kai si lit bas kalak e. Melala kel si idat kalak e, lit barang-barang, uis, ras barang-barang si deban si merga. Melala kel si jarah kalak e seh ngasa lanai terbabana.+ Perban lalana, perlu kalak e telu wari muati kerinana.
26 Bas wari peempatken pulung kalak e bas Lembah Berakah, i je puji kalak e Jahwe. E me sebapna ingan e igelari Lembah Berakah*+ seh asa gundari.
27 Kenca si e, ipinpin Josapat kerina pasuken Juda ras Jerusalem mulih ku Jerusalem alu meriah ukur, sebap enggo taluken Jahwe musuh-musuh kalak e.+
28 Emaka seh kalak e i Jerusalem iikuti sora harpa,*+ trompet,+ bage pe alat musik si debanna si lit senarna. Jenari masuk kalak e ku rumah Jahwe.+
29 Kerina kerajan bangsa-bangsa jadi mbiar man Dibata, sebap begina enggo taluken Jahwe musuh-musuh kalak Israel.+
30 Emaka aman kerajan Josapat sebap terus ban Dibata ia bebas arah kerina musuhna si lit i sekelilingna.+
31 Josapat terus merentah bas Juda. Sanga ia jadi raja umurna 35 tahun, janah lit 25 tahun dekahna ia merentah i Jerusalem. Gelar mamakna Asuba anak Silhi.+
32 Lalap ikutken Josapat dalan-dalan Asa bapakna.+ La tadingkenna dalan e janah lakokenna kai si benar akap Jahwe.+
33 Tapi ingan-ingan ersembah* la hancurkenna,+ janah rakyat pe lenga bulat ukurna nembah Dibata nini bulangna.+
34 Mulai tangtangna nari seh ku pendungina, sejarah kerna Josapat ras si debanna si lakokenna lit bas tulisen Jehu+ anak Hanani,+ si termasuk bas Buku Raja-Raja Israel.
35 Kenca si e, erteman Raja Josapat ras Raja Ahasia arah Israel nari. Jahat kel perbahanen Ahasia e.+
36 Kerja sama kalak e erban kapal-kapal si erlayar ku Tarsis.+ Ban kalak e kapal-kapal e bas Esion-geber.+
37 Tapi reh Elieser anak Dodawahu arah Maresa nari. Katakenna kai si nandangi terjadi man Josapat, nina, “Perban erteman kam ras Ahasia, hancurken Jahwe pagi kai si dahikenndu e.”+ Emaka hancur kapal-kapal e+ janah la banci erlayar ku Tarsis.
Cataten i teruh
^ Ntah banci saja “kalak Ammonim.”
^ Mungkin Laut Mati.
^ As. “anak-anakna si dilaki.”
^ Taneh si mbelang si jarang iingani.
^ Ntah “gelah paguh kena.”
^ Taneh si mbelang si jarang iingani.
^ Taneh si mbelang si jarang iingani.
^ Ertina “Pasu-Pasu.”
^ Harpa eme alat musik si ersenar bagi gitar, tapi bentukna beda.
^ As. “ingan-ingan si meganjang.”
