2 Kronika 23:1-21
23 Bas tahun pepituken, alu pang ban Joyada perjanjin ras peminpin-peminpin si ngawasi seratus kalak,+ eme Asaria anak Jeroham, Ismael anak Jehohanan, Asaria anak Obet, Maaseya anak Adaya, bage pe Elisapat anak Sikri.
2 Kenca si e, lawes kalak e ku Juda. Pepulungna kalak Lewi+ arah kerina kota-kota si lit bas Juda bage pe peminpin-peminpin keluarga bapak arah kalak Israel. Sanga reh kalak e ku Jerusalem,
3 kerina si pulung erban perjanjin+ ras raja bas rumah Dibata si benar. Kenca si e, nina Joyada man kalak e,
“Bagi si enggo janjiken Jahwe kerna keturunen Daud, anak raja me si merentah.+
4 Enda si arus lakoken kena: Sepertelu arah imam bage pe arah kalak Lewi si ertugas+ bas wari Sabat jadi penjaga pintu,+
5 sepertelu nari erjaga bas istana,+ janah sepertelu nari erjaga bas Gerbang Pondasi.* Kerina kalak Israel pulung bas halamen rumah Jahwe.+
6 Ula pediat ise pe masuk ku rumah Jahwe selain imam ras kalak Lewi si ndalanken tugas pelayanenna.+ Kalak enda banci masuk perban kalak e kelompok si badia. Kerina kalak Israel arus tetap ndalanken kewajipenna man Jahwe.
7 Kalak Lewi arus lit i sekeliling raja janah tiap kalak Lewi arus njemak senjata. Bunuh ise pe si masuk ku rumah Dibata. Ikutkenlah raja ku japa pe ia lawes.”*
8 Kalak Lewi ras kerina kalak Juda ngelakoken kai si perentahken Imam Joyada. Emaka tiap peminpin maba anggotana si ertugas bas wari Sabat bage pe si la ertugas bas wari Sabat,+ sebap ate Imam Joyada kerina kalak e+ terus ertugas.
9 Kenca si e, bereken Imam Joyada tombak, perisai* si kitik,* bage pe perisai si kibul si mbarenda jang Raja Daud+ si lit bas rumah Dibata si benar,+ berekenna e man peminpin si ngawasi seratus kalak.+
10 Tiap kalak si njemak senjata tamakenna bas sebelah kanan ras sebelah kiri rumah Dibata, i deher ingan nutung* persembahen ras i deher rumah e, eme i sekeliling raja.
11 Kenca si e, baba kalak e anak raja+ ndarat janah tamakenna mahkota ku datas takalna bage pe gulungen si isina Undang-Undang Dibata+ guna njadiken ia raja. Joyada ras anakna si ngelantik ia. Nina kalak e, “Hidup Raja!”+
12 Sanga begi Atalia sora kalak si kiamen janah muji-muji raja, mis dahina kalak e ku rumah Jahwe.+
13 Kenca e, idahna raja tedis i deher tiang bas pintu masuk. Pejabat-pejabat+ ras kalak si ngembus trompet lit ras raja. Kerina kalak ermeriah ukur+ janah ngembus trompet. Kalak si rende minpin ende-enden mereken pujin alu alat-alat musik. Emaka rigatken Atalia pakenna, serko ia, “Penghianaten! Penghianaten!”
14 Tapi baba Imam Joyada ndarat peminpin-peminpin si ngawasi seratus kalak si enggo ipilih ngawasi pasuken si lit i je, nina, “Baba ia ndarat arah barisen e. Ise pe si ngikutken ia, bunuh alu pedang!” Sebap enggo kataken imam e, “Ula bunuh ia bas rumah Jahwe.”
15 Emaka tangkap kalak e ia janah babana ku dalan masuk Gerbang Kuda si lit bas istana raja, kenca si e mis bunuhna ia i je.
16 Jenari ban Joyada perjanjin antara ia ras kerina rakyat bage pe ras raja, maka kalak e lalap jadi umat Jahwe.+
17 Kenca si e, kerina kalak e lawes ku rumah Baal,+ runtuhkenna ingan-ingan nutung persembahen janah hancurkenna berhala-berhalana.+ Bunuhna ka Mattan imam Baal+ i lebe-lebe ingan nutung persembahen e.
18 Kenca si e, lantik Joyada imam-imam ras kalak Lewi jadi pengawas bas rumah Jahwe, menurut pembagin kelompok si enggo ban Daud. Kalak e ertugas bas rumah Jahwe janah mpersembahken korban tutungen man Jahwe,+ bagi si itulisken bas Undang-Undang Musa.+ Kalak enda pe arus rende alu meriah ukur, bagi si enggo itetapken Daud.
19 Lit ka banna kalak jadi penjaga+ bas gerbang rumah Jahwe, gelah kalak najis la banci masuk ku bas.
20 Kenca e, suruhna peminpin-peminpin si ngawasi seratus kalak,+ bangsawan-bangsawan, peminpin-peminpin, bage pe kerina rakyat bas negri e guna ngarak-ngarak raja si ndarat arah rumah Jahwe. Masuk kalak e ku istana arah gerbang si arah datas janah kundul raja bas tahta+ kerajan.+
21 Emaka kerina rakyat bas negri e ermeriah ukur, kota e pe aman perban Atalia enggo ibunuh alu pedang.
Cataten i teruh
^ Ntah “Gerbang Palas.”
^ As. “Ikutkenlah raja sanga ia masuk ntah pe ndarat.”
^ Biasana enda perisai si ibaba sekalak pemanah.
^ Ntah “ampang-ampang.”