2 Kronika 24:1-27
24 Joas jadi raja sanga umurna pitu tahun,+ janah 40 tahun dekahna ia merentah i Jerusalem. Gelar mamakna Sibiah arah Berseba nari.+
2 Terus lakoken Joas kai si benar menurut Jahwe sedekah Imam Joyada nggeluh denga.+
3 Pilih Joyada dua diberu jadi diberu Joas, dungna lit anak-anakna si dilaki ras si diberu.
4 Bas pudi wari, ersura-sura Joas mpekena rumah Jahwe.+
5 Emaka pepulungna imam-imam ras kalak Lewi, janah nina, “Laweslah ku kota-kota Juda, pepulung sen arah kerina kalak Israel guna mpekena rumah Dibata+ kena tiap tahunna. Minter lakoken kena si e.” Tapi la mis lakoken kalak Lewi.+
6 Emaka lebuh raja me Joyada imam kepala e,+ nina, “Engkai maka la suruhndu kalak Lewi mpepulung pajak si badia arah Juda ras Jerusalem nari bagi si perentahken Musa+ pelayan Jahwe? Kalak Israel arus nggalari pajak e guna kemah ingan ersembah.+
7 Sebap anak-anak Atalia+ eme diberu si jahat e, enggo ncedai rumah Dibata si benar,+ janah pake kalak e kerina barang si badia si lit bas rumah Jahwe guna nembah Baal.”
8 Kenca si e, perentahken raja gelah iban kotak+ janah itamaken bas darat gerbang rumah Jahwe.+
9 Suruhna ka gelah iumumken man kerina kalak si lit i Juda ras Jerusalem gelah maba pajak si badia man Jahwe,+ bagi si perentahken Musa pelayan Dibata si benar sanga kalak Israel bas taneh mesawang.*
10 Meriah ukur kerina pejabat ras kerina rakyat,+ jenari lalap baba kalak e sumbangen janah masukkenna ku bas kotak ndai seh ngasa dem kotak e.*
11 Tiap idah kalak Lewi enggo melala kel sen bas kotak e, babana kotak e ku raja, jenari kotak e ikosongken sekertaris raja ras wakil imam kepala. Kenca si e, tamana ka mulihken kotak e+ ku inganna. Bage si lakoken kalak e tiap wari. Melala kel sen si ipepulung kalak e.
12 Bereken raja ras Joyada sen e man kalak si ngawasi pendahin bas rumah Jahwe. Jenari isewa pengawas e kalak si motong batu ras tukang si deban guna mpesikap rumah Jahwe,+ bage pe tukang besi ras tukang tembaga guna mpesikap rumah Jahwe.
13 Emaka pengawas e erdahin janah terus awasi kalak e pendahin guna mpekena rumah e, seh ngasa mulihken ka rumah Dibata si benar e bagi tangtangna ndube janah paguh.
14 Kenca dung, serahken kalak e sisa sen man raja ras Joyada. Sen e ipake kalak e guna erban peralaten bas rumah Jahwe, peralaten guna ngelayani ras mereken persembahen, cangkir-cangkir, bage pe peralaten si iban arah emas ras pirak nari.+ Sedekah Imam Joyada nggeluh, lalap persembahken kalak e korban tutungen+ bas rumah Jahwe tiap wari.
15 Dungna enggo metua Joyada janah puas kel ia nggeluh. Mate ia sanga umurna 130 tahun.
16 Emaka ikuburken ia bas kuburen raja-raja i Kota Daud,+ sebap enggo lakokenna si mehuli bas Israel+ guna Dibata si benar ras rumahNa.
17 Kenca mate Joyada, reh pejabat-pejabat Juda janah sujud man raja, jenari begiken raja kalak e.
18 Dungna lanai diate kalak e rumah Jahwe Dibata nini bulang kalak e, janah mulai layani kalak e tiang-tiang si badia* ras patung berhala. Emaka merawa Dibata man kalak Juda ras Jerusalem perban dosa si lakoken kalak e.
19 Lalap suruh Jahwe nabi-nabiNa ndahi kalak e gelah mulihken kalak e man baNa. Nabi-nabi pe terus mpersingeti* kalak e, tapi la nggit kalak e megikenca.+
20 Kenca si e, nusur kesah si badia Dibata man Sakaria anak Imam Joyada.+ Emaka tedis ia bas ingan si ganjangen asangken ingan kalak si enterem e, nina, “Bagenda si kataken Dibata si benar, ‘Engkai maka langgar kena perentah Jahwe? Labo kena banci berhasil sebap enggo tadingken kena Jahwe emaka tadingkenNa ka kena.’”+
21 Dungna ersada arih kalak e ngelawan Sakaria.+ Bagi si perentahken raja, benteri kalak e ia alu batu seh ngasa mate i halamen rumah Jahwe.+
22 Lupaken Raja Joas bapak Sakaria eme Joyada si enggo ncidahken kekelengenna si setia man bana. Em si erbanca bunuhna anak Joyada e. Sanga nandangi mate Sakaria, serko ia, “Mbera-mbera idah Jahwe perbahanenndu e janah balasNa kai si lakokenndu e.”+
23 Bas awal* tahun, reh pasuken Siria nyerang Joas. Serbu kalak e Juda ras Jerusalem.+ Bunuh kalak e kerina pejabat+ bas negri e. Kerina si ijarah kalak e kirimkenna man raja Damaskus.
24 Amin pe enterem kel pasuken Juda janah sitik ngenca pasuken Siria si nyerang Juda e, ban Jahwe menang pasuken Siria,+ sebap kalak Juda enggo nadingken Jahwe Dibata nini bulang kalak e. Bage me Dibata make pasuken Siria guna ngukum Joas.
25 Sanga kalak Siria mundur arah Joas, enggo parah luka* Joas. Janah hianati pelayan-pelayanna ia perban enggo bunuhna anak-anak* Imam Joyada.+ Bunuh kalak e ia bas ingan medemna.+ Emaka mate ia janah ikuburken bas Kota Daud,+ tapi la bas kuburen raja-raja.+
26 Kalak si ersada arihna+ ngelawan Joas eme Sabad ras Josabat. Mamak Sabad eme Simeat kalak Ammon, janah mamak Josabat eme Simrit kalak Moap.
27 Cerita kerna anak-anak Joas ras kerna melala kel berita penghukumen si alokenna,+ bage pe kerna uga ia mpekena* rumah Dibata si benar,+ kerinana itulisken* bas Buku Raja-Raja. Kenca si e, anakna si nggantiken ia jadi raja eme Amasia.
Cataten i teruh
^ Taneh si mbelang si jarang iingani.
^ Ntah banci saja “seh ngasa kerina kalak mere.”
^ Ntah “terus mere kesaksin man.”
^ As. “pergantin.”
^ Ntah “enggo melala penakit.”
^ Ntah “anak.” Mungkin kata enda ipake guna ncidahken kelebihenna.
^ As. “mbangun mulihi.”
^ Ntah “iceritaken; ijelasken.”
