2 Kronika 25:1-28
25 Amasia jadi raja sanga umurna 25 tahun, ia merentah sedekah 29 tahun i Jerusalem. Gelar mamakna Jehoadan arah Jerusalem nari.+
2 Lalap lakokenna kai si benar menurut Jahwe, tapi la bulat ukurna.
3 Kenca enggo paguh kuasana bas kerajan, mis bunuhna pelayan-pelayanna si mbarenda munuh raja, raja e bapakna.+
4 Tapi la bunuhna anak kalak e, sebap ikutkenna Undang-Undang si itulisken bas buku Musa, i je perentahken Jahwe, “Bapak la banci mate perban dosa anakna, janah anak la banci mate perban dosa bapakna. Tiap kalak arus mate perban dosana.”+
5 Pepulung Amasia kalak Juda janah suruhna kalak e tedis menurut keluarga bapakna, menurut peminpin-peminpin si ngawasi seribu kalak bage pe si ngawasi seratus kalak. Bage me si lakokenna man kerina kalak Juda ras Benyamin.+ Daftarkenna kalak e si umurna 20 tahun ntah pe lebih,+ janah lit datna arah kalak e 300.000 pejuang si terlatih erperang. Kalak e jadi prajurit si beluh make tombak ras perisai* si galang.
6 Sewana ka 100.000 pejuang si megegeh arah Israel nari, janah upahina kalak e alu 3 ton 420 kilo* pirak.
7 Tapi lit sekalak pelayan Dibata si benar reh ndahi ia, nina, “O Raja, ula kam lawes ras pasuken Israel, sebap Jahwe labo ras kalak e,+ janah labo ka ras kalak Eperaim.
8 Kam saja si lawes, lakokenlah, janah perpanglah kam bas perang e. Adi lang, Dibata si benar banci erban kam ndabuh i lebe-lebe musuhndu, sebap lit kuasa Dibata guna nampati+ bage pe erban ndabuh.”
9 Megi si e, nina Amasia man pelayan Dibata si benar e, “Tapi uga kerna 3 ton 420 kilo pirak si enggo kubereken man pasuken Israel?” Nina pelayan Dibata si benar, “Banci kari bereken Jahwe man bandu ndauh buen asangken si e.”+
10 Emaka suruh Amasia pasuken si reh arah Eperaim e mulih ku inganna. Tapi merawa kel pasuken e man kalak Juda. Mulih kalak e ku inganna janah ngilas kel atena.
11 Kenca si e, usahaken Amasia kel gelah pang ia janah pinpinna pasukenna ku Lembah Sira.+ Bunuhna 10.000 pasuken Seir.+
12 Lit ka 10.000 kalak si itangkap pasuken Juda nggeluh-nggeluh. Babana kalak e ku tebing batu jenari benterkenna ku teruh, emaka hancur kerina daging kalak e.
13 Tapi anggota pasuken si isuruh Amasia mulih gelah la ikut erperang,+ dungna nyerang kota-kota si lit i Juda, mulai Samaria+ seh ku Bet Horon.+ Lit 3.000 kalak si ibunuh kalak e janah melala barang-barang si ijarahna.
14 Tapi kenca taluken Amasia kalak Edom, mulih ia janah babana dibata-dibata kalak Seir jenari banna e jadi dibatana.+ Sujud ia nembah berhala e janah tutungna* korban man berhala e gelah ku das asapna.
15 Emaka merawa kel Jahwe man Amasia, janah suruhNa sekalak nabi ngerana man bana, “Engkai sembahndu dibata-dibata arah bangsa si la nelamatken bangsana arah tanndu?”+
16 Sanga ngerana denga ia, nina raja, “Ndiganai kin kam pilih kami jadi penasehat raja?+ Sinikken!+ Adi teruskenndu ngerana, kubunuh kam.” Emaka sinik nabi e, tapi muatna lawes, nina, “Gundari enggo kuteh maka hancur pagi kam ban Dibata, sebap bagenda perbahanenndu janah la begikenndu nasehatku.”+
17 Kenca Amasia raja Juda arih-arih ras penasehat-penasehatna, kirimna pesan man Joas anak Jehoahas kempu Jehu raja Israel. Nina Amasia, “Mari, jumpai aku gelah erperang kita.”+
18 Joas raja Israel ngirim pesan man Amasia raja Juda, nina, “Peren duri i Libanon ngirim pesan man kayu aras i Libanon, ‘Berekenlah anakndu si diberu gelah jadi diberu anakku.’ Tapi, lewat binatang liar i Libanon, perjakina peren duri e.
19 Nindu, ‘Edom enggo kutaluken.’+ Dungna sombong kam janah merhat kam imuliaken. Tapi gundari tetaplah kam bas istanandu. Man kadendu kin ndarami masalah si erban kam ras kalak Juda jadi susah?”
20 Tapi la diate Amasia pesan e.+ Situhuna, serahken Dibata si benar ateNa Amasia ku tan musuhna,+ perban enggo sembah kalak e dibata-dibata Edom.+
21 Emaka maju Joas raja Israel guna erperang ngelawan Amasia raja Juda ku Bet-Semes+ si lit i Juda.
22 Talu pasuken Juda ban pasuken Israel, emaka tiap prajurit kiamen ku rumahna.*
23 I Bet-Semes, Joas raja Israel nangkap Amasia raja Juda. Amasia e anak Joas kempu Jehoahas.* Kenca si e, babana ia ku Jerusalem janah hancurkenna tembok Jerusalem, mulai Gerbang Eperaim+ nari seh ku Gerbang Suki,+ gedangna lit kira-kira 178 meter.*
24 Buatna kerina emas, pirak, barang-barang si merga bas rumah Dibata si benar si ijaga Obet Edom, bage pe erta-erta si lit bas istana raja.+ Lit ka piga-piga kalak si itaban. Kenca si e mulih ia ku Samaria.
25 Kenca mate Joas anak Jehoahas raja Israel,+ Amasia+ anak Joas+ raja Juda nggeluh 15 tahun nari.
26 Cerita si debanna kerna sejarah Amasia, mulai tangtangna nari seh ku pendungina, itulis bas Buku Raja-Raja Juda ras Israel.
27 Kenca Amasia nadingken Jahwe, lit kalak ersekongkol+ ngelawan ia i Jerusalem, emaka kiam ia ku Lakis. Tapi lit kalak si isuruh ngayaki ia ku Lakis, janah ibunuh ia i jah.
28 Emaka baba kalak e mayatna mulih tare kuda, janah ikuburken ras nini bulangna i kota Juda.
Cataten i teruh
^ Ntah “ampang-ampang.”
^ Ntah “janah banna asap.”
^ As. “ku kemahna.”
^ Igelari ka ia Ahasia.
