2 Kronika 26:1-23
26 Kenca si e, kerina rakyat Juda ngelantik Ussia+ jadi raja nggantiken Amasia bapakna.+ Sanga si e, umurna 16 tahun.
2 Kenca mate Raja Amasia,+ bangun Ussia mulihi Elot,+ janah banna Elot mulihken jadi jang Juda.
3 Ussia+ jadi raja sanga umurna 16 tahun, janah 52 tahun dekahna ia merentah i Jerusalem. Gelar mamakna Jekolia arah Jerusalem nari.+
4 Lalap lakokenna kai si benar menurut Jahwe, bagi Amasia bapakna.+
5 Sedekah Sakaria nggeluh, lalap daramina Dibata. Sakaria si ngajari ia gelah mbiar man Dibata si benar. Sedekah daramina Jahwe Dibata si benar, ban Dibata ia makmur.+
6 Lawes ia erperang ngelawan kalak Pilisti+ janah hancurkenna tembok Gat,+ tembok Jabne,+ bage pe tembok Asdot.+ Kenca si e, bangunna ka kota-kota bas daerah Asdot bage pe bas daerah kalak Pilisti.
7 Terus sampati Dibata si benar ia ngelawan kalak Pilisti, kalak Meunim, bage pe kalak Arab+ si tading i Gurbaal.
8 Kalak Ammon+ pe mulai mereken upeti* man Ussia. Perban mbelin kel kuasana, terkenal ia seh ku Mesir.
9 Bangun Ussia ka menara-menara+ i Jerusalem i deher Gerbang Suki,+ Gerbang Lembah,+ bage pe Tiang Penyangga, janah pepaguhna kerinana.
10 Selain si e, bangunna ka menara-menara+ i taneh mesawang,* janah melala ka kurakna sumur* perban melala asuh-asuhenna. Banna ka bage bas Sepela ras i dataren tinggi. Lit ka sierdahin bas jumana bage pe bas kebun anggurna si lit i pegunungen bage pe i Karmel, perban meriah akapna erjuma.
11 Melala ka pasuken Ussia si ersenjata. Lawes kalak e erperang menurut kelompokna. Kalak enda ikira ras idaftarken+ Jeiel ras Maaseya. Jeiel e sekertaris+ janah Maaseya e sekalak pejabat. Si ngawasi kalak enda Hanania salah sada pejabat raja.
12 Lit 2.600 kalak jumlah kerina peminpin keluarga bapak arah si minpin pejuang-pejuang si megegeh e.
13 Jumlah prajurit si ipinpin kalak e si enggo ersikap erperang lit 307.500 kalak. Kalak enda pasuken si megegeh si ndukung raja guna ngelawan musuhna.+
14 Perlengkapi Ussia kerina prajuritna alu perisai,* tombak,+ pelindung takal, baju perang,+ panah, ras nali pementer batu si iban arah kulit nari.*+
15 Selain si e banna ka alat-alat perang si irancang kalak si ahli. Tamana alat-alat e bas menara-menara+ bage pe bas sudut-sudut tembok. Alat-alat enda banci nembakken anak panah ras batu-batu si galang. Emaka terkenal ia seh ku ingan-ingan si ndauh sebap melala penampat si alokenna arah Dibata nari janah reh gegehna ia.
16 Tapi kenca mbelin kuasa Ussia, meganjang ukurna,* e me si erbanca ia ndabuh. La ia setia man Jahwe Dibatana sanga masuk ia ku rumah pertoton Jahwe guna nutung kemenyan bas ingan nutung* persembahen.+
17 Imam Asaria ras 80 imam Jahwe si deban si perpang minter masuk ngikutken ia.
18 Ngerana kalak e man Ussia, “O Ussia, labo kam cocok nutung kemenyan man Jahwe!+ Imam-imam ngenca si banci nutung kemenyan, sebap kalak e keturunen Harun+ si enggo ipebadia. Ndaratlah kam arah ingan si badia enda, sebap kam lanai setia janah perban si e labo pagi alokenndu kemulian arah Dibata Jahwe.”
19 Dungna merawa Ussia si sangana njemak ingan nutung kemenyan guna nutung kemenyan.+ Sanga merawa ia man imam-imam e, kena kusta+ ia bas perdempakenna, i lebe imam-imam bas rumah Jahwe, i samping ingan nutung persembahen.
20 Sanga Asaria eme imam kepala ras kerina imam ngenen ia, idah kalak e ia enggo kena kusta bas perdempakenna! Emaka mis baba kalak e ia ndarat, Ussia pe pedas-pedas ndarat, perban ukum Jahwe ia.
21 Raja Ussia sakit kusta seh ngasa ia mate. Ia tading bas rumah si terpisah perban ia kena kusta,+ lanai ia banci masuk ku rumah Jahwe. Emaka Jotam anakna si ertanggung jawap man istana ras jadi hakim man rakyat negri e.+
22 Cerita si deban kerna sejarah Ussia, mulai tangtangna nari seh ku pendungina itulis Nabi Jesaya+ anak Amos.
23 Kenca si e mate Ussia, ikuburken ia ras nini bulangna tapi la bas ingan kuburen raja-raja, sebap ning kalak e, “Ia sakit kusta.” Emaka anakna si nggantiken ia jadi raja eme Jotam.+
Cataten i teruh
^ Maksudna, lubang guna nimpan lau.
^ Taneh si mbelang si jarang iingani.
^ Ntah “ampang-ampang.”
^ Ntah “sombong ia.”