2 Kronika 28:1-27
28 Ahas+ jadi raja sanga umurna 20 tahun janah 16 tahun dekahna ia merentah i Jerusalem. La lakokenna kai si benar menurut Jahwe. La ia bagi Daud nini bulangna.+
2 Tapi ikutkenna perbahanen raja-raja Israel+ janah banna patung-patung Baal arah logam nari.+
3 Tutungna ka persembahen tutungen bas Lembah Anak Hinnom.* Anak-anakna si dilaki pe tutungna bas api,+ bagi kebiasan bangsa-bangsa+ si enggo pelawes Jahwe arah lebe-lebe kalak Israel, eme kebiasan si ciga ate Dibata.
4 Lalap banna korban bage pe asap korban arah persembahen e bas ingan-ingan si meganjang,+ bas bukit-bukit, bage pe bas tiap batang kayu si melala bulungna.+
5 Emaka Ahas pe iserahken Jahwe Dibatana ku tan raja Siria.+ Taluken kalak Siria ia janah enterem kel kalak Juda si tabanna ku Damaskus.+ Serahken Dibata ka ia ku tan raja Israel, si enggo munuh enterem kel rakyatna.
6 Lit 120.000 kalak Juda si perpang si ibunuh bas sada wari. Si munuhsa eme Pekah+ anak Remalia. Bunuhna kalak e perban enggo tadingken kalak e Jahwe Dibata nini bulangna.+
7 Sikri sekalak pejuang Eperaim munuh Maaseya eme anak raja ras Asrikam pengawas istana, bage pe Elkana wakil raja.
8 Selain si e, itaban kalak Israel ka 200.000 kalak arah senina-seninana, termasuk diberu, anak-anak si dilaki ras si diberu. Buat kalak e ka melala barang-barang jarahen, jenari babana ku Samaria.+
9 Tapi i jah lit nabi Jahwe gelarna Oded. Jumpaina pasuken si reh ku Samaria, nina man kalak e, “Si e terjadi perban Jahwe Dibata nini bulang kena merawa man kalak Juda, emaka serahkenNa kalak e ku tan kena.+ Tapi perban kejam kel kena munuh kalak e, emaka iteh Dibata kerna si e.
10 Gundari ban kena ate kena kalak Juda ras Jerusalem jadi pelayan-pelayan kena si dilaki bage pe si diberu.+ La kin kena pe ersalah kang i lebe-lebe Jahwe Dibata kena?
11 Gundari begiken aku, ulihken tabanen si buat kena arah senina-senina kena, sebap merawa Jahwe man kena.”
12 Megi si e, piga-piga peminpin kalak Eperaim eme Asaria anak Jehohanan, Berehia anak Mesilemot, Jehiskia anak Salum, ras Amasa anak Hadlai, njumpai prajurit si mulih arah peperangen nari,
13 nina kalak e, “Ula baba tabanen e ku jenda, sebap e banci erban kita erdosa i lebe-lebe Jahwe. Kai si ate kena lakoken kena e nambahi dosa ras salahta ngenca, sebap salahta enggo seh kel belinna janah rawa Dibata enggo gara man Israel.”
14 Emaka serahken prajurit-prajurit kalak si itaban ndai bage pe si ijarah+ ndai ku pejabat-pejabat ras ku kerina kalak si pulung.
15 Kenca si e lawes kalak si enggo itugasken maba tabanen e. Buatna baju-baju si lit bas barang jarahen e janah bajuina tahanen si la ruis. Bereken kalak e ka uis, selop, pangan, inemen, bage pe minak man daging kalak e. Selain si e, kalak si lemah banna nangkih kelede jenari babana ku senina-seninana i Jeriho, kota batang kurma. Kenca si e, mulih kalak e ku Samaria.
16 Paksa si e, pindo Raja Ahas penampat man raja-raja Assur.+
17 Reh ka sekali nari kalak Edom nyerang Juda, janah tabanna penduduk si lit i je.
18 Hancurken kalak Pilisti+ ka kota-kota si lit bas Sepela+ ras Negep* si lit i Juda. Rebutna Bet Semes,+ Ayalon,+ Gederot, Soko ras kota-kota si lit i sekelilingna. Rebutna ka Timnah+ ras kota-kota si lit i sekelilingna, bage pe Gimso ras kota-kota si lit i sekelilingna. Jenari tading kalak e i je.
19 Pediat Ahas raja Israel me kalak Juda rate-ate, dungna melala dosa si lakoken kalak e janah lanai kalak e setia man Jahwe. Emaka peteruk Jahwe kalak Juda.
20 Dungna reh Tilgat-pilneser+ raja Assur labo guna nampati Ahas, tapi ngelawan Ahas janah erban susah akapna.+
21 Enggo buati Ahas erta-erta arah rumah Jahwe nari, arah istana raja,+ bage pe arah rumah pejabat-pejabat nari. Jenari berekenna man raja Assur. Tapi si e labo lit gunana.
22 Sanga susah pe akap Raja Ahas, reh lalana dosa si lakokenna janah sitik pe lanai ia setia man Jahwe.
23 Mulai persembahkenna korban man dibata-dibata kalak Damaskus+ si enggo naluken ia,+ janah nina, “Perban sampati dibata-dibata raja Siria kalak e, emaka kupersembahken ka korban man dibata-dibata e, gelah sampatina aku.”+ Tapi si e erban ia ras kerina kalak Israel jadi hancur.
24 Selain si e, pepulung Ahas kerina peralaten si lit bas rumah Dibata si benar jenari hancurkenna.+ Tutupna pintu-pintu rumah Jahwe.+ Banna ka ingan nutung* persembahen bas tiap tikungen dalan si lit bas Jerusalem.
25 Bas kerina kota Juda, banna ingan-ingan ersembah* guna persembahen tutungen man dibata-dibata si deban.+ Alu bage, merawa kel banna Jahwe Dibata nini bulangna.
26 Cerita si debanna kerna sejarah Ahas, termasuk kerina perbahanenna tangtangna nari seh ku pendungina, itulis bas Buku Raja-Raja Juda ras Israel.+
27 Dungna mate Ahas janah ikuburken ras nini bulangna bas kota Jerusalem, sebap la ia ibaba ku kuburen raja-raja Israel.+ Kenca si e, anakna si nggantiken ia jadi raja eme Hiskia.
