2 Kronika 29:1-36
29 Hiskia+ jadi raja sanga umurna 25 tahun, janah lit 29 tahun dekahna ia merentah i Jerusalem. Gelar mamakna Abia anak Sakaria.+
2 Lalap lakokenna kai si benar menurut Jahwe,+ bagi si lakoken Daud nini bulangna.+
3 Bas tahun pertama pemerentahenna, bas bulan si pertama, bukana pintu-pintu rumah Jahwe janah pekenana.+
4 Suruhna imam-imam ras kalak Lewi pulung bas halamen ingan pulung si lit i sebelah timur.
5 Nina man kalak e, “O kalak Lewi, begiken aku. Gundari, pebadia diri kena+ bage pe rumah Jahwe Dibata nini bulang kena. Ambekkenlah kai pe si najis arah ingan si badia nari.+
6 Bapak-bapakta lanai setia janah lakokenna kai si jahat menurut Jahwe Dibatata.+ Tadingken kalak e Ia, lanai diate kalak e ingan guna nembah Jahwe. Pudiken kalak e ka Ia.+
7 Tutup kalak e dalan-dalan masuk ku teras rumah Dibata,+ janah mateken kalak e lampu-lampuna.+ Lanai tutung kalak e kemenyan+ janah lanai persembahkenna korban tutungen+ bas ingan si badia guna Dibata Israel.
8 Emaka merawa kel Jahwe man Juda ras Jerusalem.+ BanNa kalak e kena bencana. Ise pe si ngidah kalak e ras si megi kerna si e dungna mbiar, jengang, janah nokoh. Kena sendiri pe idah kena nge kerna si e.+
9 E me sebapna nini bulangta ibunuh alu pedang,+ anak-anakta si dilaki ras si diberu pe itaban radu ras diberu-diberuta.+
10 Gundari ersura-sura aku erban perjanjin ras Jahwe Dibata kalak Israel,+ gelah lanai Ia merawa banta.
11 O anak-anakku, gundari lanai waktuna santai-santai,* sebap enggo pilih Jahwe kena tedis i lebe-lebeNa, ngelayani Ia,+ janah mpersembahken persembahen tutungen man baNa.”+
12 Megi si e, tedis kalak Lewi: arah keturunen Kohat+ eme Mahat anak Amasai ras Joel anak Asaria. Arah keturunen Merari+ eme Kis anak Abdi ras Asaria anak Jehalelel. Arah keturunen Gerson+ eme Joah anak Simma ras Eden anak Joah.
13 Arah anak-anak Elisapan eme Simri ras Jewel. Arah anak-anak Asap+ eme Sakaria ras Mattania.
14 Arah anak-anak Heman+ eme Jehiel ras Simei. Arah anak-anak Jedutun+ eme Semaya ras Ussiel.
15 Kenca si e, pepulung kalak e senina-seninana janah pebadia kalak e dirina. Jenari lawes kalak e mpebadia rumah Jahwe bagi si perentahken raja. Perentahna e cocok ras kai si kataken Jahwe.+
16 Kenca e masuk imam-imam ku rumah Jahwe guna mpebadiasa, janah pedaratna kerina si najis si datna bas rumah pertoton Jahwe. Jenari tamana ku halamen+ rumah Jahwe. Kenca si e, buat kalak Lewi janah babana ku darat eme ku Lembah Kidron.+
17 Mulai pebadia kalak e rumah Jahwe bas wari pertama bulan si pertama. Bas wari si pewaluhken bas bulan e, enggo seh bas teras dahin mpebadia e.+ Waluh wari dekahna pebadia kalak e rumah Jahwe, janah enggo dung dahin e bas wari si pe-16-ken bas bulan pertama.
18 Kenca si e, lawes kalak e njumpai Raja Hiskia, nina, “Enggo pebadia kami rumah Jahwe, ingan nutung* persembahen+ ras kerina peralatenna,+ bage pe meja guna roti persembahen*+ ras kerina peralatenna.
19 Enggo ka sikapken kami janah pebadia kami+ kerina peralaten si enggo buat Raja Ahas sanga la ia setia man Dibata+ bas masa pemerentahenna. Gundari kerina peralaten e lit i lebe-lebe ingan nutung persembahen man Jahwe.”
20 Emaka lampas Raja Hiskia medak janah pepulungna kerina pejabat kota jenari lawes kalak e ku rumah Jahwe.
21 Baba kalak e pitu lembu jantan, pitu biri-biri jantan, pitu anak biri-biri jantan, ras pitu kambing jantan jadi persembahen dosa man kerajan e, man ingan si badia, bage pe man Juda.+ Suruhna imam-imam keturunen Harun mpersembahken kerinana bas ingan nutung persembahen Jahwe.
22 Kenca si e, geleh imam-imam lembu e,+ buatna darehna janah percikkenna ku ingan nutung persembahen.+ Jenari gelehna biri-biri jantan e janah percikkenna darehna ku ingan nutung persembahen. Gelehna ka anak biri-biri jantan e janah percikkenna darehna ku ingan nutung persembahen.
23 Kenca e, baba kalak e kambing-kambing jantan e guna persembahen dosa ku lebe-lebe raja ras ku lebe-lebe kerina kalak si pulung, janah tamaken kalak e tanna ku datas kambing-kambing e.
24 Jenari geleh imam-imam kambing-kambing e janah persembahkenna jadi persembahen dosa. Tamaken kalak e darehna bas ingan nutung persembahen guna erban pendamen man kerina kalak Israel, perban enggo kataken raja maka persembahen tutungen ras persembahen dosa arus ibereken man kerina kalak Israel.
25 Tugasken Raja Hiskia kalak Lewi bas rumah Jahwe gelah mainken kalak e simbal, harpa,*+ bage pe alat musik si ersenar. Si e bagi si perentahken Daud,+ Nabi Natan,+ ras Gat+ eme kalak si mpeseh pengenehenen* arah Dibata nari. Bage lakoken kalak e sebap bage si perentahken Jahwe arah nabi-nabiNa.
26 Emaka tedis kerina kalak Lewi njemak alat-alat musik si ban Daud. Imam-imam tedis njemak trompet.+
27 Emaka perentahken Hiskia gelah ipersembahken korban tutungen i datas ingan nutung persembahen.+ Sanga korban mulai itutung, iendeken lagu man Jahwe. Trompet iembus janah alat-alat musik si iban Daud raja Israel pe imainken.
28 Sujud kerina kalak si pulung sanga lagu iendeken bage pe sanga trompet iembus. Bage me si terus lakoken kalak e ngasa dung korban e itutung.
29 Kenca dung persembahen e ibereken, mis sujud raja ras kerina kalak si lit ras ia.
30 Raja Hiskia ras pejabat-pejabat mindo man kalak Lewi gelah ipuji kalak e Jahwe alu kata-kata Daud+ ras Asap+ eme kalak si lit pengenehenenna. Meriah kel ukur kalak e mereken pujin janah sujud kalak e.
31 Kenca e nina Hiskia, “Gundari kena enggo ikhususken man Jahwe, rehlah ku rumah Jahwe. Baba korban bage pe persembahen pengatan bujur.” Emaka baba kalak si pulung e korban bage pe persembahen pengatan bujur. Ise pe si tersuruh ukurna babana persembahen tutungen.+
32 Baba kalak e 70 lembu, 100 biri-biri jantan, ras 200 anak biri-biri jantan. Kerina e jadi persembahen tutungen man Jahwe.+
33 Baba kalak e ka persembahen si badia eme 600 lembu bage pe 3.000 biri-biri ras kambing.
34 Tapi imam-imam e la ngasup nguliti kerina persembahen tutungen. Emaka senina-seninana eme kalak Lewi si nampatisa+ ngasa dung dahin e, ras ngasa banci pebadia imam-imam dirina,+ sebap semangaten kalak Lewi mpebadia dirina asangken imam-imam.
35 Melala ka persembahen tutungen+ ras lemak arah korban persadan,+ bage pe persembahen inemen si ipersembahken radu ras persembahen tutungen.+ Bage me pelayanen i rumah Jahwe ilakoken mulihi.
36 Meter kel dung kerina pendahin e sebap bereken Dibata si benar penampat man bangsa e.+ Emaka meriah kel ukur Hiskia ras kerina bangsa e.
Cataten i teruh
^ Ntah “istrahat.”
^ Ntah “roti lapis.”
^ Eme kerna kai pe si cidahken Dibata ku bas pikiren sekalak jelma.
^ Harpa eme alat musik si ersenar bagi gitar, tapi bentukna beda.
