2 Kronika 3:1-17
3 Mulai bangun Salomo rumah Jahwe+ i Jerusalem bas Gunung Moria.+ E me ingan si enggo sikapken Daud bapakna.+ I je pernah cidahken Jahwe diriNa man Daud eme bas ingan ngerik* Ornan+ kalak Jebusi.
2 Mulai ia mbangun bas wari si peduaken i bulan si peduaken, bas tahun si peempatken ia merentah.
3 Ban Salomo pondasi man rumah Dibata si benar e, gedangna kira-kira 27 meter janah belangna kira-kira 9 meter.*+
4 Ganjang teras rumah e kira-kira 9 meter,* janah gedangna kira-kira 9 meter* bagi belang rumah e. Arah bas ilapisi alu emas murni.+
5 Lapisina ruangen si galang* alu papan arah kayu juniper, jenari lapisina alu emas si mejile.+ Kenca si e, banna i je ukiren batang kurma+ janah pasangna rante-rante.+
6 Hiasina rumah e alu batu-batu si merga ras si mejile,+ janah emas+ si pakena eme emas arah Parwaim nari.
7 Lapisina ka rumah e alu emas. Si ilapisina eme balok-balok atap rumah e, dingdingna, kusen pintuna, ras pintu-pintuna.+ Janah banna ukiren kerubim-kerubim i dingdingna.+
8 Kenca si e, ban Salomo ka Ingan Sibadiana.+ Belangna bagi belang rumah e, eme kira-kira 9 meter janah gedangna kira-kira 9 meter.* Lapisina alu emas si mejile si buena 20 ton 520 kilo.*+
9 Berat emas si ipake guna erban paku-pakuna 570 gram.* Lapisina ka ruangen-ruangen si lit i teruh atap alu emas.
10 Jenari, banna dua patung kerubim i bas Ingan Sibadiana, janah lapisina alu emas.+
11 Kerina kabeng kerubim+ e gedangna kira-kira siwah meter.* Sembelah kabeng kerubim si pertama gedangna kira-kira dua meter* janah kena ku dingding rumah e. Sembelah nari pe gedang kabengna kira-kira dua meter janah kena ku kabeng kerubim si peduaken.
12 Sembelah kabeng kerubim si peduaken gedangna kira-kira dua meter janah kena ku dingding rumah e. Sembelah nari pe gedang kabengna kira-kira dua meter janah kena ku kabeng kerubim si pertama.
13 Belang kerina kabeng kerubim-kerubim e kira-kira siwah meter. Duana patung kerubim e tedis janah pengalana ku bas.*
14 Ban Salomo ka tirai+ arah benang si warna biru, wol ungu, benang si warna megara, ras kain linen. Janah lit gambar kerubim-kerubim i tirai e.+
15 Banna ka dua tiang+ i lebe-lebe rumah e ganjangna kira-kira 16 meter,* tiap tiang e lit takalna si ganjangna kira-kira 2 meter.*+
16 Banna rante-rante janah tamakenna e bas takal tiang e. Banna ka 100 hiasen si bentukna bagi buah delima janah tamakenna i rante-rante e.
17 Tamakenna tiang-tiang e i lebe-lebe rumah pertoton, sada i sebelah kanan,* sada nari i sebelah kiri.* Si sebelah kanan gelarina Jakin,* si sebelah kiri gelarina Boas.*
Cataten i teruh
^ As. “gedangna 60 hasta janah belangna 20 hasta.” Banci saja bas waktu si la seri, ukuren hasta si ipake bas jaman Israel pe la seri. Nen Ket. B14.
^ Lit manuskrip si nulis “120,” tapi lit ka manuskrip ras terjemahen si nulis “20 hasta.”
^ As. “rumah si galang.” Mungkin maksudna Ingan si Badia.
^ As. “600 talenta.”
^ As. “gedangna 5 hasta.”
^ Maksudna, ku Ingan si Badia.
^ As. “ganjangna 5 hasta.”
^ Ntah “selatan.”
^ Ntah “utara.”
^ Ertina “Mbera-Mbera BanNa [maksudna, Jahwe] Paguh.”
^ Mungkin ertina “Alu Paguh.”