2 Kronika 30:1-27
-
Irayaken Hiskia Paskah (1-27)
30 Kirim Hiskia pesan ku kerina kalak Israel+ ras Juda, man kalak Eperaim ras Manase pe tulisna ka surat.+ Suruhna gelah reh kalak e ku rumah Jahwe i Jerusalem ngerayaken Paskah man Jahwe Dibata Israel.+
2 Tapi raja, pejabat-pejabat, bage pe kerina kalak si pulung i Jerusalem, enggo erban keputusen guna ngerayaken Paskah bas bulan si peduaken.+
3 Lenga banci rayaken kalak e bas bulan pertama,+ sebap lenga bias jumlah imam-imam si enggo mpebadia diri,+ janah rakyat pe lenga ka pulung i Jerusalem.
4 Keputusen e mehuli akap raja bage pe kerina kalak si pulung i je.
5 Emaka umumken kalak e ku kerina daerah Israel, mulai Berseba nari seh ku Dan,+ gelah reh rakyat ngerayaken Paskah man Jahwe Dibata Israel i Jerusalem. Sebap lenga rayaken kalak e Paskah secara kelompok bagi si iarusken bas undang-undang.+
6 Bagi si perentahken raja, lawes kalak si mpeseh berita ku kerina daerah Israel bage pe Juda. Babana surat arah raja nari bage pe pejabat-pejabatna, isina, “O kalak Israel, mulihlah kena ku Jahwe Dibata Abraham, Dibata Isak, bage pe Dibata Israel, gelah Ia pe mulih ku kalak si nggeluh denga si bebas arah tan raja-raja Assur.+
7 Ula kena bagi nini bulang kena ras bagi senina-senina kena si la setia man Jahwe Dibata nini bulangna. E me sebapna iban Dibata ise pe si ngidahsa ras si megi kerna kalak e jadi mbiar. Kena pe idah kena nge kerna si e.+
8 Ula kena keras kepala bagi nini bulang kena.+ Patuhlah kena man Jahwe, rehlah kena ku rumah Dibata+ si enggo pebadiaNa seh rasa lalap. Layanilah Jahwe Dibata kena, gelah lanai Ia merawa man kena.+
9 Adi mulih kena ku Jahwe, banci dat senina-senina kena ras anak-anak kena perkuah ate arah kalak si naban kalak e,+ janah pediatna kalak e mulih ku negri enda.+ Sebap Jahwe Dibata si perkeleng ras perkuah.+ Pasti nge kena alo-aloNa adi mulih kena ku Ia.”+
10 Lawes kalak si mpeseh berita e arah kota ku kota bas kerina daerah Eperaim ras Manase+ bage pe Sebulon. Tapi tokohi rakyat janah tawa-tawaina kalak e.+
11 Amin pe bage, piga-piga kalak arah Aser, Manase, ras Sebulon peterukna bana janah reh ia ku Jerusalem.+
12 Dibata si benar masu-masu Juda guna mpersada kalak e ndalanken perentah raja bage pe pejabat-pejabat. Perentah e cocok ras kata Jahwe.
13 Enterem kalak si pulung i Jerusalem ngerayaken Perayan Roti si La Itama Ragi+ bas bulan si peduaken.+ Seh kel teremna kalak si pulung i je.
14 Buat kalak e ingan-ingan nutung* persembahen i Jerusalem,+ bage pe ingan nutung persembahen kemenyan,+ jenari iambekken ku Lembah Kidron.
15 Kenca si e, geleh kalak e korban Paskah bas wari pe-14-ken bas bulan si peduaken. Mela akap imam-imam bage pe kalak Lewi, emaka pebadia kalak e dirina janah babana persembahen tutungen ku rumah Jahwe.
16 Tedis kalak e bas ingan si enggo itetapken menurut Undang-Undang si itulis Musa pelayan Dibata si benar. Kenca si e, percikken imam-imam dareh+ si alokenna arah kalak Lewi.
17 Bas kalak si pulung e enterem denga si lenga pebadiana dirina. Emaka kalak Lewi itugasken nggeleh korban Paskah guna kalak si lenga badia,+ gelah kalak e ipebadia man Jahwe.
18 Kalak si lenga pebadiana dirina e teremen reh arah Eperaim, Manase,+ Isakar, ras Sebulon. Amin pe lenga pebadia kalak e dirina, tapi tetap pan kalak e pangan Paskah, si e la cocok ras kai si tertulis. Emaka ertoto Hiskia guna kalak e, nina, “O Jahwe Dibata si mehuli,+ ampuni min kalak e.
19 O Jahwe, amin pe lenga pebadia kalak e dirina guna perayan si badia e,+ tapi enggo sikapken kalak e pusuhna ndarami Kam Dibata si benar,+ Dibata nini bulangna.”
20 Emaka begiken Jahwe me Hiskia janah ampunina kalak e.
21 Pitu wari dekahna kalak Israel ngerayaken Perayan Roti si La Itama Ragi+ bas Jerusalem. Meriah kel ukur kalak e.+ Kalak Lewi ras imam-imam muji Jahwe tiap wari, janah mainkenna alat musik alu megang man Jahwe.+
22 Selain si e, ngerana Hiskia janah pegegehina kerina kalak Lewi si pentar perbahanenna bas ngelayani Jahwe. Kalak e man sedekah perayan pitu wari e.+ Persembahken kalak e korban persadan+ janah ngata bujur kalak e man Jahwe Dibata nini bulangna.
23 Kerina kalak si pulung e ersada arihna ngerayaken perayan e pitu wari nari. Emaka rayaken kalak e pitu wari nari alu ermeriah ukur.+
24 Sumbangken Hiskia raja Juda man kalak si pulung e 1.000 lembu jantan ras 7.000 biri-biri. Sumbangken pejabat-pejabat ka 1.000 lembu jantan ras 10.000 biri-biri.+ Enterem kel imam-imam si mpebadia diri.+
25 Lalap meriah ukur kerina kalak Juda si pulung, imam-imam, kalak Lewi, kerina kalak si reh arah Israel,+ bage pe penduduk asing+ si reh arah daerah Israel ras si tading i Juda.
26 Jerusalem dem alu keriahen, sebap mulai jaman Salomo anak Daud raja Israel, lenga pernah terjadi si bage i Jerusalem.+
27 Dungna tedis imam-imam Lewi janah pindona pasu-pasu man Dibata guna kerina kalak e.+ Begiken Dibata sora kalak e janah seh toto kalak e ku surga, eme inganNa tading si badia.
