2 Kronika 31:1-21
31 Kenca dung si e kerina, kerina kalak Israel si pulung ndai lawes ku kota-kota Juda, hancurken kalak e tugu-tugu si badia,+ bage pe tiang-tiang si badia.*+ Runtuhkenna kerina ingan-ingan ersembah*+ bage pe ingan-ingan nutung* persembahen+ bas kerina daerah Juda, Benyamin, bage pe Eperaim ras Manase,+ ngasa hancur kerinana. Kenca si e, kerina kalak Israel mulih ku rumahna ku kota-kota inganna tading.
2 Ibagi Hiskia imam-imam ras kalak Lewi jadi piga-piga kelompok+ menurut tugasna masing-masing.+ Tugasna eme+ mpersembahken korban tutungen ras korban persadan, ngelayani, ngata bujur, ras mereken pujin i gerbang-gerbang halamen rumah Jahwe.+
3 Bereken raja ka sumbangenna guna persembahen tutungen+ tiap erpagi-pagi ras karaben,+ persembahen tutungen guna wari Sabat,+ guna bulan baru,+ bage pe guna perayan-perayan,+ bagi si tertulis bas Undang-Undang Jahwe.
4 Perentahken Hiskia man penduduk Jerusalem gelah bereken kalak e bagin imam bage pe bagin kalak Lewi.+ Alu bage banci kalak e mereken dirina guna tuhu-tuhu matuhi undang-undang Jahwe.
5 Kenca perentah e iumumken, melala kel baba kalak Israel sumbangenna eme buah si pertama arah sinuan-sinuanna, anggur si mbaru,+ minak, madu, bage pe kerina hasil juma kalak e.+ Melala kel si baba kalak e arah sepersepuluh si lit bas ia.+
6 Kalak Israel ras kalak Juda si tading bas kota-kota Juda pe maba sepersepuluh arah lembu ras biri-biri, bage pe sepersepuluh arah kai si badia+ si ipebadia man Jahwe Dibata kalak e. Emaka melala kel si ipepulung kalak e.
7 Bas bulan si peteluken,+ mulai pepulung kalak e kerina sumbangenna bas sada ingan. Si e dung bas bulan pepituken.+
8 Sanga reh Hiskia ras pejabat-pejabatna janah idahna seh kel lalana sumbangen si enggo ibaba ku je, puji kalak e Jahwe janah pasu-pasu kalak e kalak Israel.
9 Sungkun Hiskia imam-imam ras kalak Lewi kerna sumbangen si enggo ipepulung e.
10 Ngerana Asaria eme imam kepala arah keluarga Sadok, nina, “Kenca ibaba sumbangen ku rumah Jahwe,+ enterem kalak man ngasa besur, tapi lit denga si sisa, sebap enggo pasu-pasu Jahwe umatNa. Jadi enda sisana, seh kel buena.”+
11 Megi si e, suruh Hiskia gelah sikapken kalak e gudang-gudang*+ bas rumah Jahwe, emaka sikapken kalak e.
12 Lalap kalak e setia maba sumbangen, sepersepuluhen,+ ras kai pe si badia. Si itugasken jadi pengawasna eme Konania kalak Lewi, si nampatisa eme Simei seninana.
13 Kalak si nampati Konania ras seninana Simei eme Jehiel, Asasia, Nahat, Asahel, Jerimot, Josabat, Eliel, Ismakia, Mahat, ras Benaya. Kalak enda si ipilih Raja Hiskia guna nampatisa. Si ngawasi rumah Dibata si benar eme Asaria.
14 Kore anak Imnah eme kalak Lewi si njaga gerbang sebelah timur.+ Ia itugasken ngurus sumbangen sukarela+ si ibereken man Dibata si benar. Ia ka si mbagi-bagiken sumbangen si ibereken man Jahwe+ ras kai pe si badiana.+
15 Selain si e, Kore si ngawasi Eden, Miniamin, Jesua, Semaya, Amaria, ras Sekanya. Kalak e ndatken jabaten kepercayan si itugasken bas kota imam-imam.+ Tugas kalak e mbagiken bagin senina-seninana menurut kelompok-kelompokna.+ Seri buena bagin kalak e la soal nguda ntah pe metua.
16 Selain si e, sumbangen e ibagiken ka man dilaki-dilaki si umurna telu tahun ntah pe lebih si lit bas daftar silsilah. Kalak e reh tiap wari ku rumah Jahwe guna ngelayani bage pe guna ndalanken tugas menurut kelompokna.
17 Iban daftar silsilah imam-imam menurut keluarga bapakna,+ bage ka pe kalak Lewi si umurna 20 tahun ras si 20 tahun+ ku datas menurut tugas kelompok kalak e.+
18 Si termasuk bas daftar silsilah e eme kerina anak-anakna si dilaki ras si diberu, ndehara-ndeharana, ras kerina anggota keluarga kalak Lewi. Sebap terus jaga kalak e dirina tetap badia guna ngurus kai pe si badia perban kalak e dat jabaten kepercayan.
19 Keturunen Harun pe lit ka bas daftar e bage pe imam-imam si tading bas daerah mbalmbal si lit i sekeliling kota-kota kalak e.+ Bas kerina kota, lit piga-piga dilaki si itugasken guna mbagiken bagin imam-imam ras kerina kalak si lit bas daftar silsilah kalak Lewi.
20 E me si lakoken Hiskia bas kerina daerah Juda. Terus lakokenna kai si mehuli, kai si benar, janah setia ia i lebe-lebe Jahwe Dibatana.
21 Kerina dahin si lakokenna guna ndarami Dibatana termasuk si lit hubungenna ras pelayanen bas rumah Dibata si benar,+ si lit hubungenna ras Undang-Undang, bage pe si lit hubungenna ras perentah Dibata, kerinana berhasil perban bulat ukurna ngelakokenca.
