2 Kronika 33:1-25
33 Manase+ jadi raja sanga umurna 12 tahun, janah lit 55 tahun dekahna ia merentah i Jerusalem.+
2 Lakokenna kai si jahat menurut Jahwe. Ikutkenna kebiasan bangsa-bangsa si enggo pelawes Jahwe arah lebe-lebe kalak Israel,+ eme kebiasan si ciga ate Dibata.
3 Bangunna ka mulihi ingan-ingan ersembah* si enggo runtuhken Hiskia bapakna.+ Banna ka ingan-ingan nutung* persembahen bage pe tiang-tiang si badia* man Baal. Sujud ia janah layanina kai pe si lit bas langit.+
4 Bangunna ka ingan-ingan nutung persembahen bas rumah Jahwe,+ padahal enggo kataken Jahwe, “GelarKu lit pagi lalap bas Jerusalem.”+
5 Bangunna ka ingan-ingan nutung persembahen bas dua halamen rumah Jahwe man kerina si lit bas langit.+
6 Persembahkenna ka anak-anakna si dilaki jadi korban tutungen+ i Lembah Anak Hinnom.+ Pakena ilmu sihir+ ras ilmu ramal, pilihna ka kalak si beluh ngelebuh begu kalak mate, bage pe si meteh wari.+ Melala kel perbahanen jahat si lakokenna si erban Jahwe merawa man bana.
7 Tamana ka ku rumah Dibata si benar patung berhala si banna,+ padahal enggo kataken Dibata man Daud bage pe man Salomo anakna, nina, “Arah kerina suku Israel, enggo Kupilih rumah enda bage pe Jerusalem jadi ingan gelarKu seh rasa lalap.+
8 Adi patuhi kalak Israel kerina si enggo Kuperentahken bage pe kerina Undang-Undang Musa eme kerna peraturen ras ketetapen si Kubereken arah Musa, lanai pagi kalak e Kupelawes arah negri si enggo Kubereken man nini bulangna.”
9 Lalap sesatken Manase kalak Juda ras penduduk Jerusalem, emaka perbahanen kalak e jahaten asangken bangsa-bangsa si enggo kernepken Jahwe i lebe-lebe kalak Israel.+
10 Amin pe lalap Jahwe ngerana man Manase ras rakyatna, tapi la diate kalak e.+
11 Emaka ban Jahwe peminpin-peminpin pasuken arah raja Assur ngelawan kalak e, tangkapna Manase alu pengkawit* janah iketna alu dua rante tembaga, jenari babana ku Babilon.
12 Perban susah kel akapna, pindona perkuah ate Jahwe Dibatana, janah terus peterukna ukurna i lebe-lebe Dibata nini bulangna.
13 Lalap ia ertoto man Dibata janah pindona kel perkuah ateNa, emaka begiken Dibata pemindonna janah banNa ia mulih ku Jerusalem jadi raja.+ Dungna sadar Manase maka Jahwe ngenca Dibata si benar.+
14 Kenca si e, bangunna tembok si arah darat si seh kel ganjangna guna Kota Daud+ i sebelah barat Gihon+ si lit i lembah.* Tembok e bangunna seh ku Gerbang Ikan+ ras sekeliling Opel.+ Pilihna peminpin-peminpin pasuken bas kerina kota si erbenteng si lit i Juda.
15 Ambekkenna dibata-dibata si deban bage pe patung berhala arah rumah Jahwe.+ Kerina ingan nutung persembahen si bangunna i gunung rumah Jahwe+ bage pe si lit bas Jerusalem ambekkenna ku darat kota e.
16 Sikapkenna ka ingan nutung persembahen Jahwe+ janah mulai persembahkenna korban persadan+ ras korban pengatan bujur+ i datasna, jenari suruhna kalak Juda gelah ngelayani Jahwe Dibata Israel.
17 Amin pe bage, terus denga persembahken rakyat korban bas ingan-ingan ersembah, tapi man Jahwe Dibata kalak e ngenca persembahkenna korban e.
18 Cerita si debanna kerna sejarah Manase, pertotonna man Dibatana, bage pe kata-kata kalak si lit pengenehenenna* si ngerana man bana bas gelar Jahwe Dibata Israel, kerina itulis bas buku sejarah raja-raja Israel.
19 Selain si e, kerna totona,+ uga totona ijawap, kerina dosana ras perbahanenna si la setia,+ i ja saja bangunna ingan-ingan ersembah ras tiang-tiang si badia,*+ bage pe patung-patung ukiren si banna ope lenga peterukna ukurna, kerinana e icatat bas tulisen kalak si lit pengenehenenna.
20 Dungna mate Manase janah ikuburken i deher rumahna, jenari anakna si nggantiken ia jadi raja eme Amon.+
21 Umur Amon+ 22 tahun sanga ia jadi raja. Ia merentah sedekah dua tahun i Jerusalem.+
22 Lalap lakokenna kai si jahat menurut Jahwe bagi si enggo lakoken bapakna Manase.+ Banna persembahen man kerina patung ukiren si iban Manase bapakna+ janah terus layanina patung-patung e.
23 La peterukna ukurna i lebe-lebe Jahwe+ bagi Manase bapakna si enggo mpeteruk ukurna.+ Tapi lalap tambahina dosana.
24 Dungna ersekongkol pelayan-pelayanna guna ngelawan ia,+ janah bunuh kalak e ia bas rumahna.
25 Tapi kerina kalak si ersekongkol ngelawan Raja Amon+ dungna bunuh rakyat, jenari ban kalak e Josia+ jadi raja si nggantiken ia.
Cataten i teruh
^ As. “ingan-ingan si meganjang.”
^ Ntah banci saja “tangkapna Manase si sangana cebuni bas lubang.”
^ Eme kerna kai pe si cidahken Dibata ku bas pikiren sekalak jelma.
