2 Kronika 34:1-33
34 Josia+ jadi raja sanga umurna waluh tahun, janah 31 tahun dekahna ia merentah i Jerusalem.+
2 Lakokenna kai si benar menurut Jahwe janah ikutkenna kerina dalan Daud nini bulangna. La tadingkenna undang-undang Dibata.
3 Bas tahun pewaluhken pemerentahenna, sanga ia anak-anak denga, mulai daramina Dibata Daud nini bulangna.+ Bas tahun si pe-12-ken, mulai bersihkenna Juda ras Jerusalem+ arah ingan-ingan ersembah,*+ tiang-tiang si badia,* patung ukiren,+ bage pe patung-patung si iban arah logam nari.
4 Selain si e, perentahkenna gelah ihancurken ingan-ingan nutung* persembahen man Baal i lebe-lebena, ras ingan nutung kemenyan, tiang-tiang si badia,* patung ukiren, bage pe patung-patung si iban arah logam nari. Ihancurken kerina e jadi abu janah abuna iamburken ku kuburen kalak si mbarenda nembah berhala-berhala e.+
5 Tutungna ka tulan imam-imam bas ingan nutung persembahen kalak e.+ Bage me ia mbersihken Juda ras Jerusalem.
6 Bas daerah si runtuh i sekeliling kota Manase, Eperaim,+ Simeon, seh ku Naptali,
7 hancurkenna ingan-ingan nutung persembahen, tiang-tiang si badia,* patung-patung ukiren,+ janah banna kerina jadi abu. Hancurkenna kerina ingan nutung kemenyan si lit bas kerina daerah Israel.+ Kenca si e, mulih ia ku Jerusalem.
8 Bas tahun pe-18-ken pemerentahenna, kenca enggo bersihkenna negri e bage pe rumah pertoton, suruhna Sapan+ anak Asalia, Maaseya peminpin kota, ras Joah anak Joahas si tukang catat guna mpekena rumah Jahwe Dibatana.+
9 Dahi kalak e Imam si Mbelin Hilkia, janah bereken kalak e man bana sen si enggo ibaba guna rumah Dibata. Sen e ipepulung kalak Lewi si tugasna njaga pintu. Pepulungna sen e arah kalak Manase, Eperaim, ras kerina kalak Israel si debanna,+ bage pe arah Juda nari, Benyamin, ras penduduk Jerusalem.
10 Kenca si e, bereken kalak e sen e man kalak si ipilih guna ngawasi dahin bas rumah Jahwe. Jenari pake sierdahin bas rumah Jahwe e sen e guna mpesikap ras mpekena rumah e.
11 Berekenna sen e man tukang si ahli ras tukang bangunen guna nukur batu-batu si enggo ipotong ras kayu penyangga bage pe balok guna mpekena rumah-rumah si pediat raja-raja Juda ceda.+
12 Kerina kalak e setia ngelakoken dahinna.+ Kalak Lewi si ipilih guna ngawasi kalak e eme Jahat ras Obaja arah keturunen Merari,+ Sakaria ras Mesullam arah keturunen Kohat.+ Kerina kalak Lewi si beluh mainken musik+
13 itugasken ngawasi kalak si ngangkat barang-barang si mberat. Itugasken ka kalak e ngawasi kalak si ngelakoken dahin si debanna. Piga-piga kalak Lewi pe jadi sekertaris, mandor, bage pe penjaga gerbang.+
14 Sanga pedarat kalak e sen si ibaba ku rumah Jahwe,+ dat Imam Hilkia buku Undang-Undang Jahwe+ si berekenNa arah Musa.+
15 Emaka kataken Hilkia man Sapan sekertaris e, “Lit kudat buku Undang-Undang Musa bas rumah Jahwe.” Jenari bereken Hilkia buku e man Sapan.
16 Kenca si e, baba Sapan buku e man raja, nina, “Pelayan-pelayanndu sangana ngelakoken kerina tugas si berekenndu man kalak e.
17 Enggo pedarat kalak e sen si lit bas rumah Jahwe, janah enggo berekenna e man kalak si pilihndu bage pe man kalak si erdahin.”
18 Nina Sapan ka man raja, “Lit sada buku si bereken Imam Hilkia man bangku.”+ Mulai bacaken Sapan buku e i lebe-lebe raja.+
19 Kenca begi raja kata-kata si lit bas Undang-Undang e, mis rigatkenna uisna.+
20 Jenari perentahken raja man Hilkia, Ahikam+ anak Sapan, Abdon anak Miha, Sapan sekertaris e, bage pe Asaya pelayan raja, nina,
21 “Laweslah kam, pindo petunjuk man Jahwe kerna kata-kata si lit bas buku si enggo idat e, guna kepentingenku ras kepentingen kalak si tading denga bas Israel ras Juda. Sebap merawa kel pagi Jahwe man banta perban nini bulangta la matuhi kata-kata Jahwe, janah la patuhina kerina kata-kata si itulisken bas buku enda.”+
22 Emaka lawes Hilkia ras kalak si isuruh raja njumpai Nabiah Hulda.+ Ia diberu Salum. Salum eme anak Tikwa kempu Harhas. Dahin Salum ngurus lemari uis. Hulda tading bas Kota si Mbaru* i Jerusalem. I je kalak e ngerana ras ia.+
23 Nina man kalak e, “Bagenda nina Jahwe Dibata Israel, ‘Kataken man kalak si nuruh kena,
24 “Bagenda nina Jahwe, ‘Kuban pagi terjadi bencana ku ingan enda bage pe man pendudukna,+ kerina cilaka si lit bas buku+ e si ibaca kalak e i lebe-lebe raja Juda.
25 Enggo tadingken kalak e Aku+ janah persembahkenna korban man dibata-dibata si deban. Kerina perbahanen kalak e erban reh rawaKu.+ Emaka merawa Aku ku ingan enda janah rawaKu e lanai banci ngadi.’”+
26 Tapi man raja Juda si nuruh kena mindo petunjuk Jahwe, enda si arus kataken kena man bana, “Bagenda nina Jahwe Dibata Israel, ‘Enggo begindu kata-kata si lit bas undang-undang e.+
27 Kenca begindu kata-kataKu kerna ingan enda ras pendudukna, erpengangka kam janah peterukndu ukurndu i lebe-lebeKu. Sanga Kuidah peterukndu ukurndu janah rigatkenndu uisndu, jenari tangis kam i lebe-lebeKu, emaka Kubegiken totondu,+ nina Jahwe.
28 E me sebapna Kupepulung kam ras nini bulangndu,* janah ikuburken pagi kam alu dame. La pagi idahndu bencana si Kubereken ku ingan enda bage pe man pendudukna.’”’”+
Kenca si e, peseh kalak e jawapen nabiah e man raja.
29 Emaka kirim raja pesan guna ngelebuh kerina peminpin Juda ras Jerusalem.+
30 Kenca si e, lawes raja ku rumah Jahwe ras kerina kalak Juda, penduduk Jerusalem, imam-imam, kalak Lewi ras kerina rakyat, la soal si metua ntah pe si nguda.* Bacaken raja i lebe-lebe kalak e undang-undang perjanjin si idat bas rumah Jahwe ndai.+
31 Tedis raja bas inganna janah banna perjanjin+ i lebe-lebe Jahwe maka ikutkenna Jahwe, perentah-perentahNa, pengingetNa, ras peraturenNa alu bulat ukur ras asa gegehna.+ Dalankenna ka perjanjin si itulis bas undang-undang e.+
32 Kenca si e, suruhna kerina kalak si lit i Jerusalem ras Benyamin gelah setuju man perjanjin e. Emaka ikutken penduduk Jerusalem perjanjin Dibata eme Dibata nini bulangna.+
33 Kenca si e, hancurken Josia kai pe* si ciga ate Dibata si lit bas negri Israel,+ janah banna kerina kalak bas Israel ngelayani Jahwe Dibata kalak e. Segedang geluhna, terus ikutken kalak e Jahwe Dibata nini bulangna.
Cataten i teruh
^ As. “ingan-ingan si meganjang.”
^ Ntah “bas Bagin si Peduaken.”
^ Kalimat enda ngertiken kematen.
^ Ntah “si lemah ntah pe si megegeh.”
^ Ntah “hancurken Josia kerina patung.”
