2 Kronika 35:1-27
35 Rayaken Josia Paskah+ guna Jahwe i Jerusalem. Geleh kalak e korban Paskah+ bas wari si pe-14-ken bas bulan pertama.+
2 Tentukenna tugas imam-imam janah semangatina kalak e ngelakoken pelayanenna bas rumah Jahwe.+
3 Kenca si e, nina man kalak Lewi eme guru-guru kerina kalak Israel+ si enggo ipebadia man Jahwe, “Tamalah Peti Perjanjin* si badia bas rumah si bangun Salomo anak Daud raja Israel.+ Lanai perlu angkat kena bas bara kena.+ Gundari layanilah Jahwe Dibata kena bage pe bangsaNa eme kalak Israel.
4 Ersikaplah kena menurut keluarga bapak kena bage pe menurut kelompok kena, ngikutken kai si enggo itulis Daud+ raja Israel bage pe Salomo anakna.+
5 O kena kalak Lewi, tedislah bas ingan si badia menurut kelompok kena masing-masing. Aturkenlah gelah tiap kelompok arah kena banci nampati tiap kelompok arah bangsa e.
6 Gelehlah korban Paskah e,+ janah pebadia diri kena. Banlah persikapen gelah banci lakoken senina-senina kena kai si kataken Jahwe arah Musa.”
7 Sumbangken Josia 30.000 anak biri-biri jantan ras anak kambing jantan, bage pe 3.000 lembu, jangna kerina e. Berekenna kerina e man kerina rakyat si lit i je, gelah banci persembahken kalak e jadi korban Paskah.+
8 Pejabat-pejabat pe mereken sumbangen sukarela man rakyat, imam-imam, ras kalak Lewi. Hilkia,+ Sakaria, ras Jehiel eme peminpin bas rumah Dibata si benar mereken 2.600 korban Paskah ras 300 lembu man imam-imam.
9 Peminpin-peminpin kalak Lewi pe eme Konania ras senina-seninana Semaya ras Netanel, bage pe Hasabia, Jeiel, ras Josabat mereken 5.000 korban Paskah ras 500 lembu man kalak Lewi.
10 Kenca kerinana enggo isikapken, imam-imam tedis bas inganna bage pe kalak Lewi tedis menurut kelompokna+ bagi perentah raja.
11 Geleh kalak e korban-korban Paskah.+ Sanga percikken imam-imam dareh si enggo alokenna,+ kuliti kalak Lewi binatang-binatang e.+
12 Kenca si e, sikapken kalak e persembahen tutungen guna ibagiken man rakyat si ikelompokken menurut keluarga bapakna. Alu bage banci persembahken kalak e man Jahwe bagi si enggo itulis bas buku Musa. Bage ka me si ban kalak e man lembu e.
13 Tanggerken* kalak e persembahen Paskah i datas api bagi biasana.+ Tanggerken kalak e persembahen si badia e bas panci, kudin, bage pe belanga. Jenari minter babana man bangsa e.
14 Kenca si e, sikapken kalak Lewi korban Paskah man dirina sendiri bage pe man imam-imam keturunen Harun. Sikapkenna man dirina sendiri bage pe man imam-imam, sebap imam-imam e terus mpersembahken korban tutungen ras lemak seh ngasa berngi.
15 Kalak si rende, eme anak-anak Asap,+ ertugas bas inganna masing-masing bagi si perentahken Daud,+ Asap,+ Heman, bage pe Jedutun+ eme kalak si mpeseh pengenehenen* man raja. Penjaga gerbang ertugas bas erbage gerbang.+ La perlu tadingken kalak e tugasna sebap senina-seninana eme kalak Lewi enggo erban persikapen guna kalak e.
16 Bas wari e, enggo dung kerina persikapen si ipindo Jahwe si arus lakoken kalak e guna erban Paskah,+ bage pe guna mereken persembahen tutungen bas ingan nutung* persembahen Jahwe bagi si perentahken Raja Josia.+
17 Kalak Israel si reh paksa si e ngerayaken Paskah jenari rayaken kalak e Perayan Roti si La Itama Ragi pitu wari dekahna.+
18 Lenga pernah irayaken Paskah si bage bas Israel kenca jaman Nabi Samuel. Raja-raja Israel si deban pe lenga pernah banna Paskah bagi si ban Josia,+ imam-imam, kalak Lewi, kerina kalak Juda ras Israel si lit i je, bage pe penduduk Jerusalem.
19 Paskah enda irayaken bas tahun pe-18-ken pemerentahen Josia.
20 Kenca si e kerina, sanga enggo dung sikapken Josia rumah pertoton, reh Neko+ raja Mesir guna erperang i Karkemis i deher Lau Eprat. Lawes Josia nyerang ia.+
21 Emaka kirimna pesan arah kalak si mpeseh berita, nina, “O Raja Juda, kai kin urusenndu? Reh aku bas wari enda labo guna ngelawan kam, tapi guna ngelawan musuh-musuhku. Suruh Dibata aku gelah meter kulakoken si e janah Dibata pe ndukung aku. Emaka guna kepentingenndu, ula min lawanndu peraten Dibata. Adi lang, kernepkenNa kari kam.”
22 Tapi Josia la nggit mundur, malahen menyamar+ ia guna nyerang Neko. La begikenna kai si kataken Dibata arah Neko nari. Emaka lawes ia erperang ku Lembah Megido.+
23 Kena panah Raja Josia, emaka nina man pelayan-pelayanna, “Baba aku ndarat arah jenda nari sebap parah lukaku.”
24 Emaka angkat pelayan-pelayanna ia arah geretana janah tamakenna ku gereta perangna si peduaken, jenari babana ku Jerusalem. Mate ia janah ikuburken bas kuburen nini bulangna.+ Kerina kalak Juda ras Jerusalem erceda ate perban mate Josia.
25 Endeken Jeremia+ lagu perngandungen man Josia. Kerina penyanyi si dilaki ras si diberu+ pe ngendeken lagu perngandungen kalak e kerna Josia seh ngayak gundari. Emaka iban keputusen maka kerina lagu perngandungen e arus iendeken bas Israel. Kerina lagu e itulis bas buku lagu perngandungen.
26 Cerita si debanna kerna sejarah Josia, ras perbahanenna si mbuktiken kekelengenna si setia bas ndalanken kai si tertulis bas Undang-Undang Jahwe,
27 bage pe kerina perbahanenna mulai tangtangna nari seh ku pendungina, itulis bas Buku Raja-Raja Israel ras Juda.+
Cataten i teruh
^ Ntah “Peti Perpadanen.”
^ Ntah banci saja “Panggang.”
^ Eme kerna kai pe si cidahken Dibata ku bas pikiren sekalak jelma.
