2 Kronika 36:1-23
36 Kenca si e, pilih rakyat anak Josia eme Jehoahas+ nggantiken bapakna jadi raja i Jerusalem.+
2 Umur Jehoahas 23 tahun sanga ia jadi raja, janah telu bulan dekahna ia merentah i Jerusalem.
3 Tapi turunken raja Mesir ia arah kedudukenna i Jerusalem. Ipaksana negri e nggalari 3.420 kilo* pirak ras lebih 34 kilo* emas.+
4 Selain si e, iban raja Mesir senina Jehoahas eme Eliakim jadi raja Juda ras Jerusalem, janah gantina gelarna jadi Joyakim. Tapi buat Neko+ me Jehoahas janah babana ku Mesir.+
5 Joyakim+ jadi raja sanga umurna 25 tahun. Lit 11 tahun dekahna ia merentah i Jerusalem. Lalap lakokenna kai si jahat menurut Jahwe Dibatana.+
6 Reh Raja Nebukadnesar+ arah Babilon nyerang ia janah ngiket ia alu dua rante tembaga guna maba ia ku Babilon.+
7 Baba Nebukadnesar piga-piga peralaten arah rumah Jahwe ku Babilon janah tamana bas istanana i Babilon.+
8 Cerita si debanna kerna sejarah Joyakim termasuk perbahanenna si la terpake ras si jahat itulis bas Buku Raja-Raja Israel ras Juda. Anakna si nggantiken ia jadi raja eme Joyakin.+
9 Umur Joyakin+ 18 tahun sanga ia jadi raja, janah telu bulan sepuluh wari dekahna ia merentah bas Jerusalem. Lalap lakokenna kai si jahat menurut Jahwe.+
10 Bas awal tahun,* lit kalak si isuruh Raja Nebukadnesar maba Joyakin ku Babilon,+ bage pe barang-barang si merga si lit bas rumah Jahwe.+ Selain si e, angkatna ka senina bapak Joyakin eme Sedekia jadi raja bas Juda ras Jerusalem.+
11 Umur Sedekia+ 21 tahun sanga ia jadi raja. Lit 11 tahun dekahna ia merentah bas Jerusalem.+
12 Lalap lakokenna kai si jahat menurut Jahwe Dibatana, la peterukna ukurna i lebe-lebe Nabi Jeremia+ si mpeseh perentah Jahwe.
13 Lawan Sedekia me Raja Nebukadnesar+ si enggo erban ia ersumpah bas gelar Dibata. Keras kepala kel Sedekia janah piher ukurna. La ia nggit mulih ku Jahwe Dibata Israel.
14 Kerina peminpin imam-imam bage pe rakyat e enggo tuhu-tuhu lanai setia. Lakoken kalak e perbahanen si ciga ate Dibata bagi bangsa-bangsa si deban. Ban kalak e rumah Jahwe si enggo ipebadia i Jerusalem jadi najis.+
15 Jahwe Dibata nini bulang kalak e lalap nuruh utusen-utusenNa guna mpersingeti kalak e, mulih-ulih persingetiNa, sebap mekuah ateNa bangsaNa e bage pe rumah pertotonNa.*
16 Tapi lalap tokohi kalak e utusen-utusen Dibata si benar e,+ sepeleken kalak e kai si katakenNa,+ janah hina kalak e nabi-nabiNa.+ Emaka merawa kel Jahwe man bangsaNa+ seh ngasa lanai kalak e banci ipepalem.
17 Emaka ban Dibata me raja kalak Kaldea+ nyerang kalak e janah bunuhina anak-anak muda alu pedang+ bas rumah si enggo ipebadia kalak e.+ La mekuah ate raja e man anak perana ntah pe singuda-nguda, man si enggo metua ntah pe si lemah.+ Serahken Dibata kerinana ku bas tan raja e.+
18 Kerina peralaten si galang ntah si kitik si lit bas rumah Dibata si benar, bage pe erta-erta bas rumah Jahwe, erta-erta raja, ras erta pejabat-pejabatna, kerinana babana ku Babilon.+
19 Tutung raja e rumah Dibata si benar,+ runtuhkenna tembok Jerusalem,+ tutungna kerina menarana si erbenteng, janah hancurkenna kerinana si merga.+
20 Kalak si selamat arah pedang nari itabanna ku Babilon.+ Jadikenna kalak e pelayanna+ ras pelayan anak-anakna, seh ngasa kerajan Persia mulai merentah.+
21 Si e terjadi ngasa lunas galari negri e sabat-sabatna.+ Negri e la iperdiateken guna ndalanken Sabat seh asa 70 tahun.+ Alu bage terjadi kai si kataken Jahwe arah Jeremia.+
22 Bas tahun pertama pemerentahen Kores+ raja Persia, ban Jahwe gelah terjadi kai si katakenNa arah Jeremia.+ Emaka ban Jahwe tersuruh ukur Kores raja Persia gelah banna pengumumen bas kerina kerajanna, janah itulisken pengumumen e,+ isina:
23 “Enda si kataken Kores raja Persia, ‘Jahwe Dibata si erkuasa bas surga, enggo mereken kerina kerajan doni+ enda man bangku, janah suruhNa aku mbangun rumahNa i Jerusalem eme i Juda.+ Ise pe umatNa si lit i tengah-tengah kena, mulihlah ku Jerusalem. Mbera-mbera Jahwe Dibatana lit ras ia.’”+