2 Kronika 6:1-42
6 Sanga si e ngerana Salomo, “O Jahwe, katakenNdu tading Kam bas embun si seh kel gelapna.+
2 Emaka gundari enggo kubangun sada rumah si mulia man baNdu, si jadi inganNdu tading seh rasa lalap.”+
3 Kenca si e, alaken raja ku kerina kalak Israel si pulung si sangana tedis, janah pasu-pasuna kerina kalak e.+
4 Nina, “Mbera-mbera terpujilah Jahwe Dibata Israel, si enggo langsung erjanji man bapakku Daud, janah banNa janjiNa e terjadi alu tanNa. Enda janjiNa e,
5 ‘Mulai kin Kubaba umatKu ndarat arah taneh Mesir, lenga lit Kupilih sada kota arah kerina suku Israel guna mbangun rumah man gelarKu gelah gelarKu tetap lit i je,+ janah lenga lit Kupilih sekalak peminpin guna umatKu Israel.
6 Tapi enggo Kupilih Jerusalem+ jadi ingan si tetap guna gelarKu. Enggo Kupilih Daud guna minpin umatKu Israel.’+
7 Daud bapakku enggo ersura-sura mbangun rumah guna gelar Jahwe Dibata Israel.+
8 Tapi nina Jahwe man bapakku Daud, ‘Ersura-sura kel kam mbangun rumah guna gelarKu, janah sura-surandu e mehuli kap.
9 Tapi, labo kam pagi si mbangun rumah e. Anakndu* pagi si mbangun rumah guna gelarKu.’+
10 Enggo tepati Jahwe janjiNa, sebap enggo kundul aku i tahta Israel nggantiken bapakku Daud,+ bagi si ijanjiken Jahwe.+ Enggo ka kubangun rumah guna gelar Jahwe Dibata Israel.
11 Enggo kutama i je Peti Perjanjin* si isina perjanjin+ si iban Jahwe ras kalak Israel.”
12 Kenca si e, tedis Salomo i lebe-lebe ingan nutung* persembahen man Jahwe, i lebe-lebe kerina kalak Israel si pulung, jenari angkatna tanna.+
13 Enggo ban Salomo sada panggung arah tembaga nari i tengah-tengah halamen e.+ Gedangna kira-kira dua meter, belangna kira-kira dua meter, ras ganjangna kira-kira sada meter,* janah tedis ia i je. Kenca si e, sujud ia i lebe-lebe kalak Israel si pulung, jenari angkatna tanna ku langit,+
14 nina, “O Jahwe Dibata Israel, la lit Dibata si bagi Kam i surga ntah pe i doni. TepatiNdu janjiNdu janah cidahkenNdu kekelengenNdu si setia man budak-budakNdu si bulat ukurna ngelayani Kam.*+
15 Enggo tepatiNdu janjiNdu man budakNdu Daud bapakku.+ Erjanji Kam, bas wari enda alu tanNdu tepatiNdu janjiNdu e.+
16 Gundari, o Jahwe Dibata Israel, tepatilah janjiNdu man budakNdu Daud bapakku sanga katakenNdu, ‘Adi setia anak-anakndu ndalanken undang-undangKu, bagi kam si enggo setia erdalan bas dalan-dalanku,+ keturunenndu pagi si lalap kundul bas tahta Israel i lebe-lebeKu.’+
17 O Jahwe Dibata Israel, buktikenlah maka janji si enggo banNdu man budakNdu Daud banci terteki.
18 “Tapi, banci kin Dibata tading ras manusia i doni?+ Langit si mbelang pe la siat man inganNdu tading,+ apai ka rumah si kubangun enda!+
19 O Jahwe Dibataku, perdiatekenlah toto ras pemindon budakNdu enda. Bas wari enda, ertoto budakNdu enda i lebe-lebeNdu. Begiken min soraku tangis mindo penampat bage pe pertotonku enda.
20 Mbera-mbera mataNdu lalap ngenen rumah e suari ras berngi, sebap enggo katakenNdu maka tamaNdu gelarNdu i je.+ Emaka begikenNdu min budakNdu si ertoto si pengalana ku ingan enda.
21 Begiken min budakNdu si mindo penampat bage pe pemindon umatNdu Israel si ertoto si pengalana ku ingan enda.+ Mbera-mbera begikenNdu arah inganNdu nari, arah surga nari.+ Mbera-mbera begikenNdu janah ampuniNdu.+
22 “Adi lit sekalak jelma ituduh ersalah man temanna janah isuruh ia ersumpah* maka cilaka ia adi tuhu kin ia ersalah, jenari lawes ia ku lebe-lebe ingan nutung persembahen bas rumah enda paksa ia i teruh sumpah denga,+
23 begiken min surga nari janah ban min tindaken ras hakimi budak-budakNdu. Mbera-mbera balasNdu janah hukumNdu kalak jahat menurut kai si enggo lakokenna.+ Mbera-mbera umumkenNdu kalak si benar la ersalah janah upahiNdu ia menurut perbahanenna si benar.+
24 “Adi umatNdu Israel italuken musuh perban lalap erdosa man baNdu,+ kenca si e mulihken kalak e man baNdu, muliaken kalak e gelarNdu,+ janah ertoto+ ras mindo perkuah ateNdu i lebe-lebeNdu i rumah enda,+
25 mbera-mbera begikenNdu surga nari+ janah ampuniNdu dosa umatNdu Israel ras babaNdu kalak e mulih ku taneh si enggo berekenNdu man kalak e bage pe man nini bulang kalak e.+
26 “Sanga tertutup langit janah la nusur udan+ perban lalap kalak e erdosa man baNdu,+ jenari ertoto kalak e janah pengalana ku ingan enda, muliaken kalak e gelarNdu. Dungna ertobat kalak e arah dosana nari perban pediatNdu kalak e susah.*+
27 Mbera-mbera begikenNdu arah surga nari janah ampuniNdu dosa budak-budakNdu kalak Israel. Ajari min kalak e dalan si mehuli si arus dalanina+ janah berekenlah udan+ ku taneh si enggo berekenNdu man bangsaNdu jadi warisen.
28 “Adi terjadi bas negri enda kelihen,+ wabah penakit,+ angin si melas si ncedai sinuan-sinuan, hama jamur,+ labang si seh kel lalana ntah pe si merangap,+ ntah adi kalak e ikepung musuh bas salah sada kota bas negri e,*+ ntah reh penakit kai pe,+
29 jenari lit sekalak jelma ntah pe kerina umatNdu Israel ngangkat tanna ku arah rumah enda,+ guna ertoto kerna kai pe+ ntah mindo kai pe,+ perban susah akapna ntah perban mesui akapna,+
30 mbera-mbera begikenNdu arah inganNdu tading i surga,+ mbera-mbera ampuniNdu,+ janah mbera-mbera upahiNdu tiap kalak menurut perbahanenna, sebap itehNdu kap isi pusuhna. Kam ngenca situhu-tuhu meteh uga isi pusuh manusia.+
31 Alu bage mbiar kalak e man baNdu janah ikutkenna dalan-dalanNdu segedang geluhna bas negri si enggo berekenNdu man nini bulang kami.
32 “Selain si e, adi lit kalak asing si labo bagin arah umatNdu Israel, si reh arah ingan si ndauh perban gelarNdu si mbelin+ bage pe perban tanNdu si megegeh ras erkuasa, reh ia guna ertoto janah pengalana ku arah rumah enda,+
33 mbera-mbera begikenNdu arah inganNdu tading i surga, janah berekenNdu pemindon kalak asing e, gelah kerina jelma bas doni enda meteh gelarNdu+ janah mbiar man baNdu bagi umatNdu Israel. Mbera-mbera iteh kalak e maka gelarNdu lit bas rumah si enggo kubangun enda.
34 “Adi suruhNdu umatNdu erperang ngelawan musuh-musuhna, i japa pe kalak e,+ ertoto kalak e+ man baNdu janah alakenna ku kota si pilihNdu enda bage pe ku rumah si enggo kubangun man gelarNdu enda,+
35 begikenNdu min surga nari pertoton bage pe pemindon kalak e janah berelah keadilen man kalak e.+
36 “Labo lit kalak si la erdosa. Adi erdosa kalak e man baNdu,+ jenari merawa Kam man kalak e, janah pediatNdu kalak e italuken musuh, itaban ku negri si ndauh ntah pe si ndeher,+
37 kenca si e sadar kalak e bas negri inganna itaban, emaka mulih kalak e ku Kam janah pindona perkuah ateNdu bas inganna itaban, alu ngataken, ‘Kami enggo erdosa ras ersalah. Enggo lakoken kami kai si jahat,’+
38 janah mulih kalak e ku Kam alu bulat ukur+ ras asa gegehna bas kota inganna itaban,+ jenari ertoto kalak e janah pengalana ku taneh si enggo berekenNdu man nini bulang kalak e, ku negri si enggo pilihNdu,+ ku rumah si enggo kubangun man gelarNdu,
39 begikenNdu min arah inganNdu tading i surga nari pertoton ras pemindon kalak e, berelah kalak e keadilen+ janah ampuni min umatNdu si enggo erdosa man baNdu.
40 “O Dibataku, mbera-mbera perdiatekenNdu janah begikenNdu pertoton si ipeseh bas ingan enda.+
41 Gundari o Dibata Jahwe, rehlah Kam ku ingan istrahatNdu,+ Kam bage pe Peti Perjanjin si mbuktiken maka lit kuasaNdu. O Dibata Jahwe, mbera-mbera imam-imamNdu ruisken keselamaten janah kalak si setia man baNdu ermeriah ukur perban kiniulinNdu.+
42 O Dibata Jahwe, ula tulakNdu kalak si pilihNdu.+ Mbera-mbera ingetNdu kekelengenNdu si setia man budakNdu Daud.”+
Cataten i teruh
^ As. “Anakndu, anak si ndarat arah awakndu.”
^ Ntah “Peti Perpadanen.”
^ As. “si bulat ukurna erdalan i lebe-lebeNdu.”
^ Sumpah si imaksud i je eme sumpah si banci erban kena hukumen adi kai si ikataken e la tuhu.
^ Ntah “perban peterukNdu kalak e.”
^ As. “bas gerbang-gerbang negrina.”
