2 Kronika 7:1-22
7 Kenca dung Salomo ertoto,+ nusur api langit nari+ janah pan api e korban tutungen bage pe persembahen e, jenari kemulian Jahwe dem bas rumah e.+
2 Lanai banci masuk imam-imam ku rumah Jahwe, perban kemulian Jahwe enggo dem bas rumah Jahwe e.+
3 Kerina kalak Israel ngidah api si nusur e bage pe kemulian Jahwe si ndemi rumah e. Sujud kalak e i lante janah ngataken bujur man Jahwe “sebap mehuli kap Ia janah kekelengenNa si setia tetap lit rasa lalap.”
4 Kenca si e, raja bage pe kerina rakyat mpersembahken korban i lebe-lebe Jahwe.+
5 Persembahken Raja Salomo 22.000 lembu ras 120.000 biri-biri. Bage me raja ras kerina bangsa e ngeresmiken rumah Dibata si benar.+
6 Imam-imam tedis bas ingan si enggo itetapkan. Kalak Lewi pe tedis janahna njemak alat-alat musik si ipake guna muji Jahwe.+ Raja Daud si erbanca alat-alat musik e, tujunna guna ngataken bujur man Jahwe. Kataken Daud pengatan bujurna man Dibata radu ras kalak e* “sebap kekelengenNa si setia tetap lit rasa lalap.” Jenari, embus imam-imam me trompet+ alu megang i lebe-lebe kerina kalak Israel si sangana tedis.
7 Kenca si e, ipebadia Salomo bagin tengah halamen si lit i lebe-lebe rumah Jahwe. Persembahkenna i je persembahen tutungen+ ras lemak korban persadan, sebap ingan nutung* persembahen si iban Salomo arah tembaga nari+ enggo lanai siat nampung kerina persembahen tutungen, persembahen pangan,*+ ras lemak e.+
8 Paksa si e, Salomo ras kerina kalak Israel erban perayan pitu wari dekahna.+ Enterem kel kalak Israel si reh, mulai daerah Hamat* nari seh ngasa daerah Lau* Mesir.+
9 Enggo ban kalak e acara guna ngeresmiken ingan nutung persembahen pitu wari dekahna. Jenari ban kalak e ka perayan pitu wari dekahna. Bas wari pewaluhken,* ban kalak e acara perpulungen si istimewa.+
10 Bas wari si pe-23-ken bas bulan si pepituken, isuruh raja kerina kalak e mulih ku rumahna. Mulih kalak e alu meriah ukur+ janah senang kel akap kalak e sebap enggo idah kalak e kerina perbahanen Jahwe si mehuli man Daud, Salomo, ras umatNa Israel.+
11 Bage me Salomo ndungi rumah Jahwe ras istana raja.+ Kerina sura-surana kerna rumah Jahwe ras istana raja enggo berhasil lakokenna.+
12 Kenca si e, sanga berngi cidahken Jahwe diriNa man Salomo,+ janah nina, “Enggo Kubegiken totondu, janah enggo Kupilih rumah enda guna jadi ingan mpersembahken korban man bangKu.+
13 Adi Kututup langit janah la nusur udan, ntah adi Kusuruh labang mangani sinuan-sinuan bas negri enda, ntah adi Kukirim wabah penakit man umatKu,
14 jenari reh umatKu si maba gelarKu,+ peterukna bana,+ ertoto ia, daramina Aku, janah ertobat* ia arah perbahanenna si jahat,+ emaka Kubegiken pagi ia arah surga nari, Kuampuni dosana, janah mejile ka Kuban mulihi taneh bas negrina.+
15 Mulai gundari nari, Kubegiken kalak si ertoto i bas ingan e janah Kuperdiateken kalak e.+
16 Gundari enggo Kupilih ras enggo Kupebadia rumah e gelah gelarKu lit i je seh rasa lalap.+ Rasa lalap pagi Kuperdiateken rumah e ras Kulindungi.+
17 “Janah kam, adi setia kam ngikutken dalanKu bagi bapakndu Daud, janah lakokenndu kerina perentahKu, patuhindu peraturenKu ras undang-undangKu,+
18 Kuban pagi paguh tahta kerajanndu,+ bagi janjiKu man Daud bapakndu.+ Enggo Kujanjiken man bana, ‘Keturunenndu pagi si lalap merentah Israel.’+
19 Tapi adi lanai ikutken kena Aku janah la patuhi kena undang-undangKu ras perentah si enggo Kubereken man kena, jenari lawes kena nadingken Aku janah sembah kena dibata-dibata si deban ras sujud kena man bana,+
20 Kupelawes* pagi kalak Israel arah negri si enggo Kubereken man kalak e.+ Janah Kutadingken rumah si enggo Kupebadia guna gelarKu e. Kuban ka rumah e jadi rumah si ihina ras itokoh-tokohi i tengah bangsa-bangsa.+
21 Rumah e pe hancur pagi. Tiap lit kalak si lewat mamang atena ngidahsa,+ nina, ‘Uga maka bage naring ban Jahwe man negri enda ras man rumah enda?’+
22 Jenari nina kalak, ‘Em perban enggo tadingken kalak e Jahwe,+ Dibata nini bulangna, si enggo maba kalak e ndarat arah negri Mesir nari.+ Ikutken kalak e dibata-dibata si deban, jenari sujud janah sembahna dibata-dibata si deban e.+ E me sebapna kerina bencana enda terjadi man kalak e.’”+
Cataten i teruh
^ Mungkin maksudna radu ras kalak Lewi.
^ Ntah “daerah dalan masuk ku Hamat.”
^ Sada wari kenca wari perayan, eme wari pe-15-ken.
^ Ntah “jera janah robah.”
^ As. “Kucabut.”
