2 Kronika 8:1-18
8 Kenca bangun Salomo rumah Jahwe ras istanana sedekah 20 tahun,+
2 bangunna ka mulihi kota-kota si ibereken Hiram+ man bana, jenari suruhna kalak Israel tading i je.
3 Kenca si e, lawes Salomo ku Hamat-Soba, janah rebutna daerah e.
4 Bangunna mulihi Tadmor si lit i taneh mesawang,* janah pekenana ka kerina kota si jadi ingan penyimpanen+ si enggo pernah bangunna i Hamat.+
5 Bangunna ka Bet Horon Datas+ bage pe Bet Horon Teruh.+ Banna kota e reh paguhna alu mbangun bentengna, gerbangna, ras palangna.
6 Bangunna ka Baalat+ ras kerina kota si jadi ingan penyimpanen Salomo, bage pe kerina kota si jadi ingan gereta perang,+ ras kota-kota si jadi ingan prajurit si erkuda. Bangun Salomo ka kerina si enggo irencanakenna bas Jerusalem, bas Libanon, bage pe bas kerina daerah si ikuasaina.
7 Kerina kalak si tading denga arah suku Het, Amori, Peris, Hewi, ras Jebusi,+ labo bagin arah Israel.+
8 Keturunen kalak e si tading bas Israel janah si la ibunuh kalak Israel,+ perentahken Salomo gelah kalak e kerja paksa jadi budak seh ngasa wari enda.+
9 Tapi la lit sekalak pe kalak Israel si iban Salomo jadi budak,+ sebap banna kalak e jadi prajurit, peminpin ajudan, bage pe peminpin prajurit si ergereta ras si erkuda.+
10 Enterem kalak si erdahin guna Raja Salomo, janah lit 250 pejabat daerah si jadi pengawas kalak e.+
11 Pindahken Salomo ka putri raja Mesir*+ arah Kota Daud ku rumah si bangun Salomo man putri e,+ perban katakenna, “Amin pe ia diberuku, labo ia banci tading bas istana Daud raja Israel, sebap badia kap kerina ingan si enggo pernah jadi ingan Peti Perjanjin* Jahwe.”+
12 Kenca si e, persembahken Salomo korban tutungen+ man Jahwe bas ingan nutung* persembahen+ Jahwe si enggo banna i lebe-lebe teras rumah e.+
13 Persembahken Salomo ka tiap wari korban-korban si wajip persembahkenna. Bage ka si lakokenna bas wari Sabat,+ perayan bulan baru,+ ras telu perayan tahunen,+ eme Perayan Roti si La Itama Ragi,+ Perayan Peranin,+ ras Perayan Sapo-Sapo.+ Si e kerina bagi si perentahken Musa.
14 Ikutken Salomo kai si enggo itetapken Daud bapakna. Bagina imam-imam ku bas piga-piga kelompok+ menurut tugas pelayanenna. Tugaskenna ka kalak Lewi gelah tiap wari muji Dibata+ janah ngelayani i lebe-lebe imam-imam. Bagina ka kalak si njaga gerbang ku bas piga-piga kelompok guna njaga gerbang-gerbang menurut giliren kelompokna.+ Ban Salomo kerina e bagi si perentahken Daud, budak Dibata si benar.
15 Kerina perentah raja man imam-imam ras man kalak Lewi kerna gudang-gudang bage pe kerna kai pe si debanna, enggo ikutken kalak e kerinana.
16 Kerina dahin si enggo irencanaken Salomo erdalan alu mehuli, mulai kin tangtangna pondasi rumah Jahwe iban+ seh ngasa dung kerinana. Emaka dung me rumah Jahwe ibangun.+
17 Kenca si e, lawes Salomo ku Esion-geber+ ras ku Elat+ si lit i pantai i negri Edom.+
18 Kirimken Hiram+ kapal-kapal man Salomo. Suruhna ka pelayan-pelayanna maba pelaut-pelaut si erpengalamen ndahi Salomo. Jenari lawes kalak e erlayar ku Opir+ ras pelayan-pelayan Salomo, guna muat 15 ton 390 kilo* emas.+ Kenca si e, bereken kalak e man Raja Salomo.+
Cataten i teruh
^ Taneh si mbelang si jarang iingani.
^ As. “Paro; Firaun.” Penggelaren man raja Mesir.
^ Ntah “Peti Perpadanen.”
