2 Kronika 9:1-31
9 Enggo begi ratu arah Syeba+ kerna Salomo, emaka reh ia ku Jerusalem nguji Salomo alu penungkunen-penungkunen si mesera.* Reh ia radu ras rombongenna si seh kel teremna, bage pe unta-unta si maba minak balsem,* emas si seh kel lalana,+ ras batu-batu si merga. Dahina Salomo janah belaskenna kerina penungkunen si lit bas pusuhna.+
2 Jawap Salomo kerina penungkunenna. La lit si meserasa akap Salomo njelaskenca.
3 Sanga langsung begi ratu Syeba kepentaren Salomo,+ janah idahna istana si bangunna,+
4 idahna ka pangan si lit i mejana,+ peraturen kerna ingan kundul man pejabat-pejabatna, cara pelayanna ngelayani bas meja makan bage pe peruis pelayanna e, kalak si ngurus inemen bage pe peruisna, ras korban tutungen si ipersembahkenna alu ratur bas rumah Jahwe,+ jengang kel ratu e perban luar biasa kel akapna.
5 Nina ratu e man raja, “Tuhu kepe si kubegi bas negriku kerna kai si enggo ihasilkenndu bage pe kepentarenndu.
6 Tapi la aku tek kai si kataken kalak man bangku adi lenga kin kudahi ku jenda janah aku sendiri si ngenenca.+ Kepeken, lenga setengahna pe si kubegi e. Ndauh belinen kepentarenndu+ asangken si enggo kubegi.+
7 Pasti meriah ukur rakyatndu bage pe pelayan-pelayanndu si lalap ras kam, sebap banci lalap begikenna kata-katandu si pentar.
8 Terpujilah Jahwe Dibatandu si enggo ncidahken ngena ateNa man bandu, janah tamaNa kam i tahtaNa jadi raja guna Jahwe Dibatandu. Perban keleng ate Dibatandu man Israel+ janah ersura-sura Ia gelah Israel tetap lit seh rasa lalap, emaka pilihNa kam jadi raja gelah dalankenndu kai si adil ras si benar.”
9 Jenari, bereken ratu arah Syeba man Raja Salomo 4.104 kilo* emas,+ minak balsem si seh kel lalana, ras batu-batu si merga. Lanai pernah lit kalak si mereken minak balsem man Raja Salomo bage buena, bagi si bereken ratu e.+
10 Labo emas ngenca si ibaba pelayan-pelayan Hiram ras pelayan-pelayan Salomo arah Opir nari,+ tapi babana ka kayu cendana ras batu-batu si merga.+
11 Kayu cendana e ipake raja erban tangga rumah Jahwe+ ras tangga istana raja.+ Pakena ka kayu e guna erban harpa* ras alat musik si ersenar si debanna guna ipake penyanyi-penyanyi.+ Lenga pernah lit bage buena kayu cendana bas negri Juda.
12 Bereken Raja Salomo ka man ratu arah Syeba kai pe si isurakenna ras kai pe si pindona, lebih asa kai* si enggo bereken ratu e man raja. Dung e mulih ratu e ras pelayan-pelayanna ku negrina.+
13 Tiap tahun, aloken Salomo emas si buena kira-kira 23 ton.*+
14 Si e kerina lenga termasuk emas ras pirak si aloken Salomo arah pedagang-pedagang, perbinaga-perbinaga, bage pe arah kerina raja kalak Arab ras gubernur-gubernur bas negri e.+
15 Pake Raja Salomo emas campuren guna erban 200 perisai* si galang.+ Lit kira-kira pitu kilo* emas campuren si pakena guna erban tiap perisai.+
16 Pakena ka emas campuren guna erban 300 perisai si kitik.* Lit kira-kira dua kilo* emas si pakena guna erban tiap perisai. Jenari tamaken raja kerina perisai e bas Rumah Kerangen Libanon.+
17 Ban raja ka tahta si galang arah gading nari, jenari lapisina alu emas murni.+
18 I lebe-lebe tahta e, lit enem anak tangga janah lit sada ingan dedehen nahe si iban arah emas nari si ileketken ku tahta e. Arah kanan ras kiri kursi tahta e lit ingan ngamparken tan, janah bas tiap tepina lit tedis sada patung singa i je.+
19 Bas tiap ujung anak tangga e, i sebelah kanan ras kirina, lit i je tedis sada patung singa, jumlahna kerina lit 12 patung singa.+ La pernah lit kerajan si deban si bage tahtana.
20 Kerina ingan minem Raja Salomo iban arah emas nari. Kerina peralaten si lit bas Rumah Kerangen Libanon iban arah emas murni, la lit si iban arah pirak nari, sebap bas jaman Salomo pirak la ianggap merga.+
21 Kapal-kapal raja erlayar ku Tarsis+ radu ras pelayan-pelayan Hiram.+ Tiap telu tahun sekali, reh kapal-kapal e maba emas, pirak, gading,+ kera, ras burung merak.
22 Ndauh bayaken Raja Salomo janah ndauh ia pentaren asangken kerina raja si deban si lit bas doni.+
23 Kerina raja bas doni usahakenna njumpai Salomo guna megi kepentarenna si bereken Dibata si benar bana.+
24 Tiap reh kalak ndahi Salomo, babana hadiah man bana, eme barang-barang si iban arah pirak ras emas, uis,+ senjata, minak balsem, kuda, ras bagal.* Bage si terjadi tiap tahun.
25 Lit 12.000 kuda* Salomo ras 4.000 kandang si jadi ingan kuda ras gereta-geretana.+ Tamakenna gereta perang e bas kota-kota ingan gereta perang si ndeher ku ingan raja i Jerusalem.+
26 Salomo si erkuasa nandangi kerina raja, mulai Lau Eprat seh ku negri kalak Pilisti bage pe seh ku perbatasen Mesir.+
27 Pirak bas Jerusalem iban raja buena bagi batu, janah kayu aras bali buena bagi batang ara kerangen si lit i Sepela.+
28 Lit ka si mereken melala kuda man Salomo arah Mesir nari+ bage pe arah kerina negri si deban.
29 Cerita si deban kerna sejarah Salomo,+ mulai tangtangna nari seh ngasa kedungenna, icatat bas tulisen Nabi Natan,+ bas ramalen Ahia+ kalak Silo, bage pe bas cataten Iddo,+ eme sekalak dilaki si mpeseh pengenehenen* arah Dibata nari janah tuliskenna kerna Jerobeam+ anak Nebat.
30 Salomo merentah kerina Israel sedekah 40 tahun i Jerusalem.
31 Mate me Salomo. Emaka ikuburken kalak e ia bas Kota Daud bapakna.+ Anakna si nggantiken ia jadi raja eme Rehabeam.+
Cataten i teruh
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Ntah “alu teka-teki.”
^ Harpa eme alat musik si ersenar bagi gitar, tapi bentukna beda.
^ Ntah banci saja “bali ergana bagi.”
^ Ntah “ampang-ampang.”
^ Biasana enda perisai si ibaba sekalak pemanah.
^ Keturunen kelede jantan ras kuda beruna.
^ Ntah “si nangkih kuda.”
^ Eme kerna kai pe si cidahken Dibata ku bas pikiren sekalak jelma.
