2 Petrus 2:1-22
2 Mbarenda lit nabi-nabi palsu i tengah-tengah umat Dibata. Bage ka pe, lit ka pagi guru-guru palsu i tengah-tengah kena.+ Alu erbuni-buni, petandaken kalak e pagi sekte-sekte si erban perpecahen si ncedai kiniteken kena. La ka akuina ise si enggo nukur ia,+ emaka kalak e arus meter ikernepken.
2 Selain si e, enterem ka si ngikutken perbahanen kalak e si la meteh mela.*+ Perban si e, dalan kebenaren ihina.+
3 Ban kalak e ranan si la tuhu guna ndatken keuntungen si merangap arah kena nari. Tapi, hukumen man kalak e si enggo ndekah itentuken+ la banci terlambat janah kalak e pasti ikernepken.+
4 Malekat-malekat si erdosa pasti ihukum Dibata.+ BenterkenNa malekat-malekat e ku Tartarus*+ janah iketNa alu rante bas gelap* si seh kel gelapna, seh asa ihakimi.+
5 Doni bas jaman si nai pe ihukum Dibata.+ Ban Dibata terjadi banjir si mbelin i doni si ingani manusia si la mehamat man baNa.+ Tapi selamatkenNa Nuah, sekalak perberita kebenaren+ bage pe pitu kalak si debanna.+
6 Selain si e, ihukum Dibata kota Sodom ras Gomora janah banNa kota e jadi abu.+ Kejadin e jadi persinget kerna kai si terjadi pagi man kalak si la hamatina Ia.+
7 SelamatkenNa ka Lut,+ kalak si benar. Susah kel akap Lut perban perbahanen kalak jahat si la meteh mela.*
8 Sanga tading ia ras kalak e, susah kel kapna tiap wari perban begina janah idahna kejahaten si lakoken kalak e.
9 Jelas me, teh Jahwe* cara mbebasken kalak si nembah Ia arah percuban nari+ janah tehNa ka cara nikapken hukumen man kalak jahat guna ikernepken bas wari penghakimen pagi,+
10 terutama kalak si usahakenna erban daging kalak si deban jadi najis+ janah hinana kalak si erkuasa.+
Perpang kel kalak e janah kai pe ate-atena saja. Hina kalak e kalak si mulia,* la kalak e mbiar.
11 Amin pe ndauh gegehen malekat-malekat ras belinen kuasana asangken guru-guru palsu e, tapi la pernah kalak e ituduh malekat-malekat alu kata-kata hinan, perban hamati malekat-malekat e Jahwe.*+
12 Kalak e bagi binatang si la rukur, si lahir guna itangkap ras ibunuh. Hina kalak e kai si la angkana.+ Ikernepken pagi kalak e perban perbahanenna si jahat.
13 Kalak e ihukum perban perbahanenna si jahat.
Meriah akap kalak e pesta pora,+ amin pe sanga ciger wari. Sanga kena man-man ras kalak e, kalak e bagi kotoren bas baju ras bagi cacat bas ayo, si meriah kel kapna ngajarken ajaren sesat.+
14 Merhat kel kalak e erlua-lua,*+ janah la banci kalak e ngadi ngelakoken dosa, ras godana kalak si lenga paguh kinitekenna. Pusuh kalak e enggo terbiasa merangap. Kalak e kap kalak si ihukum Dibata.
15 Tadingken kalak e dalan si benar, dungna ban kalak ia papak. Ikutkenna dalan Bilham+ anak Beor, si merhat dat upah arah perbahanen si salah.+
16 Perban langgar Bilham undang-undang, dungna ipersingeti ia.+ Kelede si la banci ngerana pe dungna banci ngerana bagi manusia janah halangina perbahanen si la masuk akal si lakoken nabi e.+
17 Kalak e bagi sumber lau si kerah ras bagi remang si embus angin si meter, janah enggo isikapken ingan si seh kel gelapna man kalak e.+
18 Meganjang kel kalak e ngerana tapi situhuna la lit isina. Alu sura-sura dagingna si erdosa+ ras perbahanenna si la meteh mela,* godana kalak si mbaru denga nadingken kalak si ngelakoken perbahanen si salah.+
19 Erjanji kalak e mereken kebebasen, tapi ia pe budak dosa.+ Adi sekalak jelma lit si nguasaisa, ia budak kalak si nguasaisa e.+
20 Kalak si ndatken pemeteh si benar kerna Tuan ras Juru Selamatta Jesus Kristus, enggo kap ibebasken arah doni si najis enda.+ Tapi adi mulihken ka ia janah ikuasai si najis e, emaka kedungenna ndauh keleken asangken si tangtangna mbarenda.+
21 Madin la pernah teh kalak e kerna dalan si benar, asangken tehna si e tapi dungna tadingkenna perentah si badia si enggo pernah alokenna.+
22 Kalak e bagi kuan-kuanen enda: “Biang panna mulihken utahna, babi si enggo iperidi, mulihken masuk ku kubang.”+
Cataten i teruh
^ Ntah banci saja “janah masukkenNa ku lubang.”
^ Maksudna, kalak si lit tanggung jawapna bas runggun.
^ Ntah “Mata kalak e dem alu perbahanen si erlua-lua.”
